Search form

Luŋolkop 1

Jo Juda ki jo Cimeon gumako Adoni-bejek

1Ka Yocwa doŋ oto, jo Icrael gucako penyo dog Rwot ni, “Aŋa ma bikwoŋo cito piwa ka lweny i kom jo Kanaan?” 2Ci Rwot ogamo ni, “Jo Juda aye gibicito; nen, atyeko miyo lobo-ni i ciŋgi.” 3Jo Juda guwaco bot utmegigi jo Cimeon ni, “Wubin wunywak kwedwa wot i lobo ma gipoko botwa ki kwir-ri, wek walweny i kom jo Kanaan, Wan bene wabinywako kwedwu wot kit meno i lobo ma gipoko botwu,” Mumiyo jo Cimeon gucito kwedgi. 4Ka jo Juda gucito kunnu, Rwot omiyo jo Kanaan ki jo Periji i ciŋgi, ci guloyo dano alip apar i Bejek. 5Gurwatte ki Adoni-bejek kabaka me Bejek i gaŋŋe kunnu, gulwenyo i kome, ci guloyo jo Kanaan ki jo Periji. 6Adoni bejek oriŋo woko, ento gulubo kore, gumake, guŋolo twoni ciŋe woko, ki twoni tyene. 7Adoni-bejek owacci, “Yam luker pyerabiro ma giŋolo twoni ciŋgi ki twoni tyengi gubedo ka coko ŋide cam i te mejana; kit ma yam atimo i komgi-ni, Lubaŋa oculla kit meno.” Gitere i Jerucalem, ci oto kunnu.

Jo Juda guloyo Jerucalem ki Kebron

8Ka dok jo Juda gulwenyo i kom Jerucalem, gumako woko, guneko jo ma tye iye ki pala lucwan, ka guwaŋo woko ki mac. 9Ka lacen jo Juda dok gucito ka lweny i kom jo Kanaan ma gibedo i lobo godi, ki i Negeb, ki i pwor got. 10Jo Juda gucito bene ka lweny i kom jo Kanaan ma gibedo i Kebron, ci guloyo Cecai, Akiman ki Talmai. Gaŋ ma koni gilwoŋo ni Kebron, yam nyiŋe obedo Kiriat-arba.

Otiniel oloyo Debir ci gimiye Akaca obed dakone

(Yoc 15.15-19)

11Ka gua ki kunnu, gucito ka lweny i kom jo ma gibedo i Debir. Nyiŋ Debir yam obedo Kiriat-ceper. 12Ci Kaleb owacci, “Ka ŋatti mo olwenyo i kom Kiriat-ceper ce omako, ci abimiye nyara Akaca obed dakone.” 13Otiniel wod pa Kenaj, ma omin Kaleb matidine, aye omako, ci Kaleb omiye nyare Akaca obedo dakone. 14Ka nyako ocito bot cware, ci odiye ni openy poto mo bot wonne. Opye piny ki i wi kanane ci Kaleb openye ni, “Imito gin aŋo?” 15Nyare ogamo ni, “Miya mot mo; macalo doŋ iketa wa i lobo Negeb, dok imiya waŋ it mo bene.” Kaleb omiye waŋ it ma tuŋ malo ki waŋ it ma tuŋ piny bene.

Kabedo ma jo Juda ki Benjamin gumayo

16Likwayo pa jo Keni, ma jo pa oc Moses, gucito kacel ki jo Juda kun gia ki i gaŋ Otit, gucito wa i tim me lobo Juda ma tye i Negeb ma cok ki Arad; gucito, gubedo kacel ki jo Amalek. 17Jo Juda gucito kacel ki utmegigi jo Cimeon, ci guloyo jo Kanaan ma gibedo i Jepat, Gudyero gaŋ meno i ciŋ Rwot, gujwero woko; mumiyo nyiŋ gaŋ meno gilwoŋo ni Korma*. 18Juda dok omako Gaja ki lobo ma i ŋete, Acikelon ki lobo ma i ŋete ki Ekron ki lobo ma i ŋete. 19Rwot obedo ki Juda, mumiyo ocamo lobo godi odoko mere; ento ryemo jo ma gibedo i bar oloye, pien onoŋo gitye ki gadigadi lweny me nyonyo. 20Kebron gimiyo bot Kaleb, kit ma yam Moses ociko-ni; en oryemo likwayo pa Anak adek woko ki kunnu. 21-Ento jo Benjamin pe guryemo jo Jebuc ma gibedo i Jerucalem, mumiyo jo Jebuc gunywako bedo i Jerucalem kacel ki jo Benjamin o kwede wa onyoo.

Likwayo pa Yucepu gumayo Betel

22Jo me ot pa Yucepu bene gucito ka lweny i kom Betel, ci Rwot obedo kwedgi. 23Gucwalo lurot-piny i Betel, meno aye gaŋ ma yam gilwoŋo ni Luj. 24Ka lurot-piny guneno dano mo ka bino kun oa ki i gaŋ, guwacce ni, “Nyut botwa yo me donyo i gaŋ ba, ci wabitimi maber.” 25En onyuto botgi yo me donyo i gaŋ, ci guneko dano ina gitye iye ki pala lucwan; ento guweko laco meno ki ludoggolane gucito. 26Dano meno ocito i lobo pa jo Kit, ogero iye gaŋ, ocako nyiŋe ni Luj; meno aye obedo nyiŋe o kwede wa onyoo.

Kabedo ma jo Manace ki jo Epraim gumayo

27-Jo Manace pe guryemo jo ma gibedo i Bet-cean ki i gaŋi matino ma i ŋete, kadi jo ma gibedo i Taanak, Dor, Ibleam ki Megido ki i gaŋi matino ma i ŋetgi; ento jo Kanaan gucerre ci gubedo i lobo-nu. 28Ka jo Icrael gudoko tek, ci gudiyo gin jo Kanaan ki tic muroni, ento pe guryemogi woko ducu.

29-Jo Epraim pe guryemo jo Kanaan ma gubedo i Gejer, ento jo Kanaan gubedo i kingi i Gejer.

Kabedo ma kaka mukene gutero

30Jo Jabulon pe guryemo jo ma gibedo i Kitron, kadi jo ma gibedo i Nakalol; ento jo Kanaan gubedo i kingi, ci guketogi i tic muroni.

31Jo Acer pe guryemo jo ma gibedo i Akko, kadi jo ma gubedo i Cidon, Aklab, Akijib, Kelba, Apik ki Rekob. 32Ento jo Acer gubedo i kin jo Kanaan ma gin wegi lobo-nu, pien pe guryemogi woko.

33Jo Naputali pe guryemo jo ma gibedo i Bet-cemec ki Bet-anat, ento gubedo i kin jo Kanaan ma gin wegi lobo-nu. Kadi bed kumeno, guketo jo Bet-cemec ki Bet-anat i tic muroni.

34Jo Amor gudiyo jo Dan, gudwokogi wa i lobo godi, pe guye ni gucit i bar. 35Jo Amor gucerre gubedo i got Kerec, i Aijalon ki i Calabim. Ento jo me ot pa Yucepu gubedo ka diyogi matek, ci guketogi i tic muroni. 36Waŋ lobo pa jo Amor ocakke ka ma giito iye malo i Akrabim, oa ki i Cela ocito malo.

Baibul 1985

© 1985 The Bible Society of Uganda

More Info | Version Index