Search form

Luŋolkop 12

Jeputa ki jo Epraim

1Jo Epraim guywayo mony, guŋolo loka, guo i Japon, guwaco bot Jeputa ni, “Piŋo icito ka lweny i kom jo Ammon, ci pe ilwoŋowa wacito kwedi? Wabiwaŋo wii woko i odi.” 2Jeputa ogamo doggi ni, “An ki lwakka yam wabedo ki mone madit ki jo Ammon, ento ka alwoŋowu, wun pe wulara ki i ciŋgi. 3Ka aneno ni pe wutwero lara, ci adyero koma aŋolo loka ca i kom jo Ammon, ci Rwot omiyogi i ciŋa, Piŋo tin dok wubino bota ka lweny i koma?” 4Ci Jeputa ocoko jo Gilead ducu, olwenyo ki jo Epraim, ci jo Gilead guloyo jo Epraim. Onoŋo jo Epraim guwacci, “Wun jo Gilead ma wubedo i kin jo Epraim ki Manace, wun giwu jo Epraim aye ma yam wuriŋo wularo komwu.” 5Mumiyo jo Gilead gumako waŋ wat ducu me kulu Jordan pi geŋo jo Epraim. Ka dano mo i kin jo Epraim ma oriŋo olaro kome owacci, “Wek aŋol akat loka ca,” ci jo Gilead giwaco bote ni, “In i jo Epraim?” Ka ogamo ni, “Pe,” 6ci giwaco bote ni, “Koŋ iwac Cibolet,” ci en wacci, “Sibolet,” pien pe twero lwoŋone maber matir; ci gimake, gineke woko i waŋ wat kunnu. Jo Epraim guto ma romo alip pyeraŋwen wiye aryo i nino meno.

7Jeputa obedo laŋolkop i Icrael pi mwaka abicel, Ka Jeputa ma Lagilead oto, ci giyike i gaŋŋe ma i Gilead.

Ibijan Elon ki Abudon

8Dano ma olube me bedo laŋolkop i Icrael obedo Ibijan, dano me Beterekem. 9En yam tye ki awobene pyeradek, ki anyira pyeradek. Omiyo anyirane ginyomogi i kaka mukene, dok okelo anyira ma i kaka mukene pyeradek pi awo bene. Obedo ka ŋolo kop i Icrael pi mwaka abiro. 10Ka Ibijan oto, ci giyike i Beterekem.

11Ci Elon Lajabulon dok olubo kore, obedo laŋolkop i Icrael. Obedo ka ŋolo kop i Icrael pi mwaka apar. 12Ka Elon Lajabulon oto, ci giyike i Aijalon i lobo pa jo Jabulon.

13Ki I ŋeye dok Abudon wod pa Ilel ma Lapiraton aye obedo laŋolkop i Icrael. 14Yam tye ki awobene pyeraŋwen ki likwaye pyeradek ma giwoto ki kanagi pyerabiro. Obedo ka ŋolo kop i Icrael pi mwaka aboro. 15Ka dok Abudon wod pa Ilel ma Lapiraton oto, ci giyike i Piraton ma i lobo Epraim, i lobo godi pa jo Amalek.

Baibul 1985

© 1985 The Bible Society of Uganda

More Info | Version Index