Search form

Mika 6

Rwot laro lok ki jo Icrael

1Wuwiny gin ma Rwot owaco:

Wua, wupid lokwu i nyim godi,

wek cere ducu owiny dwanwu.

2Wun godi, wuwiny daa pa Rwot,

ki wun guti me te lobo ducu ma ri nakanaka;

pien Rwot tye ki daa i kom jone, en bilaro lok ki jo Icrael.

3“Wunjona, atimo gin aŋo i komwu?

Ceŋ amiyo wuol i gin aŋo?

Wudokka iye!

4-Pien ceŋ akwanyowu ki i lobo Ejipt,

dok akokowu ki i ot me opii;

kun acwalo Moses i nyimwu kacel ki Aron ki Miriam bene.

5-Wun jona, wupo lok ma Balak kabaka me Moab oporo,

ki gin ma Balaam wod pa Beor odokke iye,

ki gin ma ceŋ otimme nia i Cittim nio i Gilgal,

wek wuŋe kit ma Rwot otiyo kwede pi larowu.”

Gin ma Rwot mito

6“Abibino i nyim Rwot ki gin aŋo,

ka wek aguŋ i nyim Lubaŋa ma tye malo?

Abibino i nyime ki gitum awaŋa,

nyo ki roci me mwaka acel acel?

7Tika Rwot bibedo ki yomcwiny kom nyogi romi alip,

ki dok i kom kulu alip apar ma moo opoŋ i igi?

Abimiyo latin kayona pi tim aranyina,

ami latinna ma an kikoma aye anywalo pi bal ma i cwinya?”

8Rwot doŋ onyutti gin maber, in dano;

gin ma Rwot mito ki boti

en aye timo tic ma nen atir, ki maro kica,

ki wot kacel ki Lubaŋani ki mwolo.

9Rwot daŋŋe ki dwan maloŋo bot wegi gaŋ,

dok bedo me ryeko mada me lworo nyiŋe:

“Wuwiny, wun kaka ki wun jo mucokke i gaŋi

10Wiya pe twero wil i kom lonyo ma tye i ot pa dano ma latim marac,

kacel ki lapim jami ma pe pimo kakare,

ma cwinya dag nenone.

11Myero awek dano ma tye ki mijan marac

ma kicaane opoŋ ki kidi me bwola ma pe pimo kakare-ni?

12Jowu ma gulony gin jo mager mada;

jo ma gibedo i gaŋiwu giloko lok goba,

lebgi aye kelo lok goba i doggi.

13Pi meno doŋ acako pwodowu,

kun awekowu wudoŋ wi obur ata pi balwu.

14Jowu gibicamo cam, ento pe gibiyeŋ,

kec binekowu;

wubikano ento pe wubigwoko,

dok gin ma wugwoko abimiyo ki pala lucwan.

15Wubicoyo kodi, ento pe wubikayo;

wubinyono jeituni, ento pe wubiwirre ki moone;

wubibiyo olok, ento pe wubimato koŋo vinone.

16-Pien wugwoko cik pa Omri,

ki tic ducu me ot pa Akab; kun wulubo tamgi;

wek ami gaŋwu odoŋ obur, ki jowu gibibedo me acaya;

pi meno wubiciro anywar pa lurok.”

Baibul 1985

© 1985 The Bible Society of Uganda

More Info | Version Index