Search form

Wel 12

Miriam ki Aron guloko lok akeca i kom Moses

1Onoŋo Moses onyomo dako mo ma nya jo Kuc, ci Miriam ki Aron gucako loko lok akeca i kom Moses pi dako-nu. 2Gubedo ka waco ni, “Rwot obedo ka lok ki dog Moses kene bo? Pe obedo ka lok ki dogwa bene?” Ci Rwot owinyo yo. 3Moses onoŋo yam mwol matek, mwol makato dano ducu ma onoŋo yam gitye i wi lobo-ni. 4Cutcut Rwot owaco bot Moses ki Aron ki Miriam ni, “Wukat woko, wun adek ducu, wubin i kema me rwatte.” Gin adek ducu gukato woko. 5Ci Rwot olor piny ki wir me pol, ocuŋ i dog kema me rwatte, ka olwoŋo Aron ki Miriam. Gin aryo ducu gukato anyim. 6Ci owacci, “Wuwiny lokka. Ka ce tye lanebi mo i kinwu, an Rwot aweko en ŋeya ki i ginanyuta, aloko kwede ki i waŋ lek. 7-Ento bot laticca Moses pe bedo kit meno; pien atyeko keto oda ducu i ciŋe. 8Abedo ka lok kwede waŋ ki waŋ, ka maleŋ atyer, pe agoŋo lok; en neno kit ma Rwot cal kwede, Piŋo pe wulworo loko lok akeca i kom laticca Moses?”

9Kiniga omako Rwot i komgi, ci ocito woko. 10Ka pol owarre woko ki i wi kema me rwatte, ci nen, kom Miriam orugo woko cut, okwor matar macalo pee. Ka Aron olokke yo tuŋ bot Miriam, oneno kome orugo woko matar 11ci owaco bot Moses ni, “Ai, laditta, pe iket can i komwa pien watimo lok me miŋo, doŋ wabalo. 12Pe iwek en obed macalo latin ma ginywalo ma doŋ oto, ma riŋo kome nucune doŋ oballe woko ma pud oa aaya ki i minne.” 13Moses okok bot Rwot ni, “Caŋe ba, ai Lubaŋa, abako doga boti do.” 14-Ento Rwot owaco bot Moses ni, “Ka nene wonne aye onoŋo oŋulo laa i waŋe keken, kono pe en obedo ki lewic pi nino abiro? Wek koŋ gitweye woko i ŋe gony pi nino abiro, ka lacen gibikele doŋ i gony.” 15Kit meno gitweyo Miriam woko i ne gony pi nino abiro; ci lwak pe gumedo ki dak ka mo nio waŋ ma gimiyo Miriam odwogo woko i gony. 16Ka doŋ lacen dano gucako wot nia ki i Kajerot, ci gugony i tim Paran gubedo iye.

Baibul 1985

© 1985 The Bible Society of Uganda

More Info | Version Index