Search form

Wel 21

Jo Kanaan gulwenyo kom jo Icrael

1-Ka kabaka me Arad, ma en Lakanaan ma bedo i Negeb, owinyo ni jo Icrael gibibino ki i yo Atarim, ci olwenyo komgi, oyako jo mogo woko ki i kingi. 2Ci jo Icrael gukwoŋo kwoŋ bot Rwot kun giwaco ni, “Ka ibimiyo jo man i ciŋwa ada, ci wan wabidyerogi i ciŋi, wabijwero gaŋigi woko liweŋ.” 3Rwot owinyo lega pa jo Icrael, omiyo guloyo Lukanaan, ci gin gudyerogi i cin Rwot kacel ki gaŋigi, gujwero woko; mumiyo nyiŋ kabedo meno gilwoŋo ni Korma*.

Twol ma giteto ki mola

4-Jo Icrael gua ki i te got Kor, gucako lubo yo ma cito i Nam Makwar, kun girabo lobo Edom. Ci cwiny dano oballe woko ma gitye iyo, 5-gucako loko lok akeca i kom Lubaŋa ki, i kom Moses kun giwaco ni, “Piŋo wukwanyowa woko ki i Ejipt wek wato i tim? Cam pe, pii bene pe, owinywa ocido woko ki cam ma konnye pe-ni.” 6Rwot ocwalo twol ma kwirgi kec i kom lwak, ci gucako toŋo dano; jo Icrael guto mapol. 7Dano gubino bot Moses, guwaco ni, “Doŋ watyeko balo, pien waloko lok akeca i kom Rwot ki i komi. Leg Rwot wek okwany twol woko ki i kinwa.” Ci Moses olego pi lwak. 8Rwot owaco ki Moses ni, “Tet cal twol ma kwirre kec-ci, iket iŋab malo i kom tal; ci dano ducu ma twol otoŋo, ka oneno kome, ci bedo kwo.” 9-Kumeno Moses oteto twol mola, oŋabo malo i wi tal; ci ka twol otoŋo dano mo en neno kom twol mola, ci kwo.

Jo Icrael gurabo lobo Moab

10Jo Icrael gucako wot, ci gugony i Obot. 11Dok gua woko ki i Obot, gugony i Iye-abarim, i tim ma okemo Moab, yo tuŋ wokceŋ. 12Dok gua ki kunnu, gumedo wot, gugony i nota me Jered. 13Gua ki kunnu, gumedo wot, gugony loka kulu Amon, ma tye i dye tim, ma oa wa i waŋ lobo pa jo Amor, Amon en aye waŋ lobo pa jo Moab, ma i kin Moab ki jo Amor. 14En aye ka ma giwaco i Buk me Lweny pa Rwot ni,

“Waeb ma i Cupa,

ki nota me Amon ducu,

15ki luŋ me nota mapol

ma oyarre nio wa i kabedo ma gilwoŋo ni Ar,

ojeŋŋe wa i waŋ lobo me Moab.”

16Gua ki kunnu, gubino i Beer*. En aye waŋ it ma yam Rwot owaco iye bot Moses ni, “Cok lwak kacel, wek ami pii botgi.” 17I kare meno jo Icrael guwero wer man ni,

“Gunnye malo, in waŋ it! Wakoro ki wer!

18Man waŋ it ma luker gukwinyo,

ma twoni ma i lwak gugolo matut ki tal ker ki odoogi.”

Ka dok gua i dye tim, gucito i Matana 19Nia i Matana gucito Nakaliel, ki nia ki kunnu gucito Bamot. 20Nia ki kunnu gucito i nota ma otoŋŋe i lobo Moab, i te lacol got Piciga, ma neno piny tuŋ tim aroo.

Jo Icrael guloyo Cikon kabaka pa jo Amor

(Nwo 2.26-37)

21Jo Icrael gucwalo lukwena bot Cikon, kabaka pa jo Amor, ma giwaco ni, 22“Ber iwek wawok ki i lobowu, Pe wabiŋak wawok ki i poto mo, nyo i poto olok, pe wabimato pii ma i waŋ it. Wabimol ma walubo gudo pa Kabaka madit-ti nio ka wawok wakato waŋ lobowu.” 23Ento Cikon pe oye ni jo Icrael guwok ki i lobone. Ocoko jone ducu, ogurogi kacel, ci ocito ka lweny i kom jo Icrael i tim. Ka oo i Jakaj, ocako lweny i kom jo Icrael. 24Ento jo Icrael guneko jone mapol ki pala lucwan, ci gucamo lobogi cakke ki i kulu Amon o kwede wa i Jajer ma tye i waŋ lobo pa jo Ammon. 25Jo Icrael gumako gaŋi ducu pa jo Amor, gucako bedo iye, i Kecbon ki i gaŋi matino ducu ma i ŋete. 26Kecbon onoŋo obedo gaŋ kai pa Cikon kabaka pa jo Amor. Cikon yam con koŋ olwenyo i kom kabaka pa jo Moab ci okwanyo lobone woko ducu ki i ciŋe nio wa i Amon. 27Mumiyo lurot wer giwaco ni,

“Wubin i Kecbon, gaŋ kai pa Cikon!

Wek giger odoco, giyub ocuŋ matek.

28-Pien mac yam oa ki i Kecbon,

olyel matek kun oa ki i gaŋ kal pa Cikon.

Owaŋo gaŋ Ar pa jo Moab,

ma gin rwodi me wi godi me Amon.

29Can madwoŋ opoto i komi, in Moab!

Wuto wutum woko do, wun lwak pa Kemoc!

Jok Kemoc omiyo awobene guriŋo gularo komgi,

oweko anyirane giyako

gitero i ciŋ Cikon kabaka pa jo Amor.

30Kit meno likwayogi gityeko woko

nia ki i Kecbon nio wa i Dibon.

Wajwero piny woko nio ka mac

oryeyo piny wa i Medeba.”

Jo Icrael guloyo Og kabaka me Bacan

(Nwo 3.1-11)

31Kit meno jo Icrael gubedo i lobo pa jo Amor. 32Ka dok Moses ocwalo dano ka roto Jajer. Gumako gaŋi matino ma i ŋete, ci guryemo jo Amor ma gibedo kunnu. 33Ka gulokke, gudok yo tuŋ Bacan. Ci Og kabaka me Bacan ocorre ka lweny i komgi, en ki lwakke ducu, ci lweny ogeto i Edrei. 34Ento Rwot owaco bot Moses ni, “Pe ilwore; pien atyeko miye i ciŋi, en ki lwakke ducu, ki lobogi bene. Ibitimo en kit ma itimo i kom Cikon kabaka pa jo Amor ma yam obedo Kecbon.” 35Kit meno jo Icrael guneko Og ki awobene ducu, gujwero lwakke ducu nid waŋ ma ŋat acel mo pe odoŋ mubwot makwo; ci gucamo lobogi woko.

Baibul 1985

© 1985 The Bible Society of Uganda

More Info | Version Index