Search form

Carolok 9

Lwoŋo pa ryeko ki miŋo pa dako ma lamiŋ

1Ryeko otyeko gero ode, ocibo iye wir ma romo abiro.

2En oneko lee pi karama me donyo iye,

oonyo koŋo vinone,

dok oyubo jami ducu oketo i wi meja.

3Doŋ ocwalo aŋecane ma gucito ka lwoŋo dano

ki i kabedo ma tye malo twatwal ma i gaŋ madit, kun giwacci,

4“Wubin kany, wun lumiŋ!”

Bot ŋat ma wiye odiŋ en wacci,

5“Bin icam kwoŋŋa,

dok imat koŋo vino ma aonyo-ni.

6Wek miŋ obedi, ci ibibedo kwo,

dok bene ibibedo ki niaŋ matut.”

7Dano ma mito ni ejuk laŋala,

laŋala nywaro woko anywara,

ki ŋat ma mito ni ejuk latim marac,

ci latim marac dok keto ret i kome.

8Pe myero ijuk ŋat ma laŋala,

pien miyo bikweri woko;

juk dano maryek, ci bimari.

9Pwony dano maryek,

ci ryekone bimedde ameda;

pwony dano ma kite tye atir ci en bimedde ameda ki pwony meno.

10-Ka dano lworo Rwot, ci cako noŋo ryeko;

dano ma ŋeyo Ŋat Maleŋ bibedo ki niaŋ matut.

11Ryeko bimiyo nino me kwoni nya doko mapol;

dok bimedo mwaka me kwoni, miyo iri i lobo.

12Ka ce iryek, ci in kikomi aye ma ibinoŋo berre;

ento ka ibedo laŋala, ci meno bene biketo peko i komi keni.

Dako ma latarwaŋ

13Dako ma lamiŋ nino ducu wo twatwal;

dok en ŋat ma waŋe tar ma pe lewic mako.

14En bedo i doggolane,

nyo i kabedo ma malo ma tye i gaŋ madit,

15ci cako lwoŋo jo ducu ma gikato ki kenyo,

ma noŋo gitye ka wot me cito anyim i yo wotgi, ni,

16“Ŋat ma lamiŋ myero olokke obin kany!”

Bot ŋat ma wiye odiŋ en waco ni,

17“Pii akwala lim matek,

ki kwon ma icamo i muŋ bene yomo cwinyi mada.”

18Ento laco meno pe ŋeyo ni jo ducu

ma gicito bot dako-nu gito woko,

jo ma gucito bot dako-nu ducu guto giyikogi i lyel.

Baibul 1985

© 1985 The Bible Society of Uganda

More Info | Version Index