Search form

Jabuli 104

Rwot gwoko ginaketane

1Pak Rwot, in tiponal

Ai Rwot Lubaŋana, in idit twatwal!

Irukke ki dit ki deyo;

2iumo komi woko ki ceŋ calo iruko boŋo.

Iyaro polo woko macalo kema ma giyaro,

3dok igero kicika me otti malo i wi pii.

Iloko pol odoko gadigadini,

ituk iŋweco woko ki gadigadini i dye yamo.

4-Iloko yamo odoko laorri,

kun leb mac ma lyel gubedo luticci.

5Iketo lobo ocuŋ matek i kom gutine,

ma pe biyeŋŋe wacel.

6Iumo woko ki nam matut calo giumo ki ginaruka,

ki pii bene omwonyo godi woko ducu.

7Ento i kare ma ijuko pii, ci oriŋo woko;

i kare ma owinyo dwani omor kun idaŋŋe natek,

ci orwenyo woko liweŋ.

8Omol ki i wi godi okato ocito piny i luŋ,

i kabedo ma yam iyero pire.

9Iketo ki pii waŋ lobo ma pe myero oŋol okat i ŋeye,

wek pe dok oum lobo woko odoco.

10Imiyo pii nyette mol i luŋ,

kun mol ki i kin godi.

11Lee tim ducu gimato pii meno,

kana me tim bene gimato gineko ki orwo.

12Lwak winyi gigero odigi i wi yadi ki i ŋet kulu,

ci gibedo ka koko i jaŋ yat.

13Icwalo kot ki i polo cwer piny i wi godi,

lobo opoŋ ki jami ducu ma in itiyo.

14Imiyo lum lot doŋo me cam pa dyaŋ,

ki ginapita ma myero dano oti kwedgi,

wek dano opur lobo ci onoŋ cam,

15ki koŋo vino ma yo mo cwiny dano,

ki moo me wir wek waŋe obed ma ryeny aryenya,

ki dok ocam kwon ma miye teko.

16Yadi pa Rwot limo pii mabup,

gin aye yadi cedar me Lebanon ma yam en opitogi-ni.

17Lwak winyi mapol gigero odigi i wi yadi-kunnu;

winyi aramatala bene gibedo i wi yadi maboco.

18Dyegi me tim gibedo i wi godi ma malo twatwal,

ki okile giriŋo gikanne i got.

19Iketo dwe me poko kare; ceŋ ŋeyo kare me potone.

20In aye ma iketo colpiny omiyo dyewor tye;

i kare meno aye lee ma gibedo i buŋa gicako kwede wotgi.

21Litino labwor gidwaro lee ki koko,

kun giyenyo cam ma Lubaŋa miyo botgi.

22Ka ceŋ otuc gidok woko cen,

ci gibuto i gorogi.

23Dano kato woko cito ka tic ci tiyo ticce nio wa otyeno.

24Ai Rwot, in doŋ itiyo lwak jami mapol!

Itiyogi ducu ki ryeko,

omiyo lobo opoŋ ki ginaketani.

25Nam madit malac bene tye kuca,

lwak ginaketa ma welgi pe kwanne bedo iye,

gin makwo matino ki madito.

26-Mel bene woto ki iye,

dok twol ma min kulu* ma iketo-ni bene tuko iye.

27Gin ducu gineno boti,

gimito imigi cam i kare ma mitte kikome.

28Ka imiyogi cam, ci gigamo gicamo woko;

ka iyabo ciŋi imiyogi cam,

ci giyeŋ ki jami mabeco mada.

29Ka ikanne woko ki botgi, ci gineno can;

ka ikwanyo yamo me yweyoni woko ki botgi ci gito woko,

gidok i apwa ka ma yam gua ki iye.

30Ka iketo yamo me yweyoni i igi ci gibedo kwo;

dok bene imiyo lobo doko nyen.

31Deyo pa Rwot myero ori nakanaka!

Rwot myero obed ki yomcwiny pi gin ma en otiyo.

32Rwot neno lobo ci miyo yeŋŋe,

en gudo godi ci giduny yito.

33Abiwero wer bot Rwot pi kare me kwona ducu;

abiwero wer me pako Lubaŋana ka pud akwo.

34Wek lok ma alwodo ki i cwinya oyom cwiny Rwot,

pien en aye ma miyo abedo ki yomcwiny.

35Wek gityek lubalo woko liweŋ ki i lobo,

dok wek jo maraco bene gurweny woko matwal!

Pwo Rwot, in tipona! Wupwo Rwot!

Baibul 1985

© 1985 The Bible Society of Uganda

More Info | Version Index