Search form

Jabuli 114

Wer ma giwero i nino maditme Kato

1-I kare ma jo Icrael gua woko ki I Ejipt,

i kare ma likwayo pa Yakobo

guweko lobo pa lurok ma jone loko leb mapat atika.

2Juda odoko kabedo maleŋ pa Rwot,

ci Icrael odoko lobone ma en loyo.

3-Nam oneno ci oriŋo woko,

kulu Jordan ocuŋ woko ma pe mol.

4Godi gupye calo nyogi romi,

ki cere-gu gupye calo litino romi.

5In nam, aŋo mutimme mumiyo iriŋo woko-ni?

Dok in Jordan, icuŋ woko ma pe imol piŋo?

6Wun godi kono, piŋo wubedo ka pye calo nyogi romi?

Wun cere, piŋo wubedo ka pye calo litino romi?

7In lobo, myero iyeŋŋe, pien Rwot doŋ cok bino;

yeŋŋe i nyim Rwot, Lubaŋa pa Yakobo,

8-ma loko pata got doko ka ma pii poŋ iye,

ki got mabit-gu loko doko waŋ it ma gunnye agunya.

Baibul 1985

© 1985 The Bible Society of Uganda

More Info | Version Index