Search form

Jabuli 129

Lega i kom lukwor pa jo Icrael

1Jo Icrael myero guwacci,

“Guketo can i koma marac

twatwal nia wa ka tinona,

2guketo can i koma marac twatwal nia wa ka tinona,

ento pe guloya kadi ki acel.

3Wegi kweri dyaŋ gipuro ŋeya;

guryeyo pottigi obedo maboco.”

4Rwot oporre,

en doŋ oŋolo tol pa jo maraco woko.

5Wek dano ducu ma kwero Cion

giket lewic i wigi dok gidwokgi bene cen!

6Wek gubed macalo lum ma tye i wi ot malo,

ma two woko ma noŋo peya odoŋo ocito malo,

7ma dano ma nyaro bene pe mako poŋo ciŋe,

kadi ŋat ma tweyo kacel bene pe gwaro poŋ kore,

8ci miyo jo ma kato ki kenyo pe giwacci,

“Gum pa Rwot obed i komwu!

Walamo gum i komwu i nyiŋ Rwot!”

Baibul 1985

© 1985 The Bible Society of Uganda

More Info | Version Index