Search form

Jabuli 148

Gilwoŋo ginaketa ducu me pako Rwot

1Wupak Rwot!

Wupak Rwot ki i polo,

ki wun jo ma wubedo malo ka mabor bene wupake!

2Wun lumalaikane ducu, wupake,

ki wun dul monnye bene wupake!

3Wun ceŋ ki dwe wupake,

wun lakalatwe ma ryeny, wupake!

4Wupake, wun polo ma tye malo twatwal,

ki wun pii ma wutye malo i wi polo bene wupake!

5Wek gin ducu gupak nyiŋ Rwot!

En ociko acika keken ci gukette.

6En oketogi i kabedogi doŋ me bedo iye matwal,

oketo Waŋ apokkigi bene ma pe gitwero kato ki iye.

7Wupak Rwot ki i lobo,

wun nyaŋ madoŋo me nam,

kacel ki nam madoŋo matut-gu,

8wun mac ki pee, toyo ki ŋico,

ki yamo lapiru ma kodo matek pi cobo gin ma en ociko!

9Wupake, wun godi ki cere-gu,

wun yadi ma nyak ki yadi cedar ducu!

10Lee tim-gu ki dyaŋi ducu,

gin makwo ma lak alaka i ŋom ki winyo ducu ma tuk!

11Wupake, wun luker me lobo kacel ki lwak me rok ducu,

rwodi ki luloc ducu me lobo!

12Awobe ki anyira kacel,

jo muti ki litino!

13Wek gupak nyiŋ Rwot,

pien nyiŋe keken aye dit makato ducu;

deyone bene kato polo ki lobo woko.

14En doŋ omiyo lwakke odoko tek,

en mumiyo jone ducu gipake,

gin jo Icrael ma pigi tek mada bote.

Wupak Rwot!

Baibul 1985

© 1985 The Bible Society of Uganda

More Info | Version Index