Search form

Jabuli 6

Lega pi kica i kare me can

1-Ai Rwot, kiniga pe omaki, pe ijuka,

dok pe ipwoda ma itye ki akemo.

2Kica omaki i koma do, ai Rwot,

pien tipo koma doŋ oto woko lirut;

ai Rwot, caŋa, pien koma ducu doŋ mwodde amwoda wa i cogo.

3Kwona ducu opoŋ ki can.

Ai Rwot, i bigalle pi kare ma rom mene?

4Bin ilara, ai Rwot;

lara ki i to, pien imara ki mar meri ma pe lokke.

5Pe gipo piri i lobo pa jo muto;

ŋat mo ma paki ki i lyel kunnu pe!

6Doŋ aol woko ki kumo;

i dyewor ducu noŋo pig waŋa oluk i kabutona woko,

koko ma omiyo kabutona odyak woko.

7Waŋa okwot woko pi koko me cwercwiny,

waŋa ocido woko, pe doŋ aneno piny maber;

man ducu otimme pien lukworra giliba.

8-Wua wucit woko cen, wun lutim maraco;

pien Rwot otyeko winyo dwana ka akok.

9Rwot otyeko winyo ka abako doga;

dok Rwot ogamo Legana.

10Lewic bimako lukworra ducu dok

gibibedo ki cwercwiny madit twatwal;

gibilokke gidok cen cut ki lewic.

Baibul 1985

© 1985 The Bible Society of Uganda

More Info | Version Index