Search form

Jabuli 64

Lega pi gwoko dano ki i ciŋ lukwor ma gukanne woko

1Winy dwana ma akok kwede boti, ai Lubaŋa;

atye ki lworo, lara do ki i cin lukworra!

2Gwoka ki i kom lok pa jo maraco ma gipiro i koma i muŋ,

konya i kom lwak lutim maraco.

3Gipako lebgi calo gipako pala lucwan,

ma giketo cwinygi i loko lok makec calo atero ma gimito celone.

4Gikanne, gibayo aterogi kun gicelo ki dano ma pe ki bal mo,

gibayo aterogi gicelo woko oyotoyot laboŋo lworo mo.

5Tamgi omoko likiŋ i kom gin marac ma giparo me timone;

gitye ka lok kekengi pi ciko owicgi i muŋ,

kun gitamo ni, “Aŋa ma twero nenowa?

6Aŋa kono ma twero yenyo balwa wek enoŋ?

Wabedo ki tam, omiyo wapiro lok me ryeko ma pe wacce.”

Gin ma tye i tam ki i cwiny dano niaŋ Iye tek,

pien tye ka matut!

7Ento Lubaŋa bicelo aterone cito i komgi;

ci gibilimo ret woko oyotoyot.

8En bityekogi woko matwal pi lokgi ma giloko;

dano ducu ma binekogi gibiyeŋo wigi.

9Bimiyo jo ducu gibedo ki lworo;

ci gibitito pi gin ma Lubaŋa otimo,

kun gitamo bene mot pi gin ma en otyeko tiyone.

10Wek jo ma kitgi atir gubed ki yomcwiny i Rwot,

dok guriŋ gular bote,

wek jo ducu ma cwinygi atir gupake!

Baibul 1985

© 1985 The Bible Society of Uganda

More Info | Version Index