Search form

Jabuli 67

Rok ducu myero gupak Lubaŋa

1Lubaŋa onyutwa kicane dok omiwa gum,

ci onenwa bene ki waŋ me kica,

2wek dano ma i lobo ducu guŋe kiti;

nyut bene twero me larri bot rok ducu.

3Mi rok ducu me wi lobo gupaki, ai Lubaŋa:

wek lwak me rok ducu gupaki!

4Wek lurok ducu cwinygi obed yom kun giwero wer me pwoc,

pien in aye iŋolo kop pa rok ducu maromrom,

dok in aye ma it ye ka telo rok ducu me wi lobo.

5Mi rok ducu me wi lobo gupaki, ai Lubaŋa;

wek lwak me rok ducu gupaki!

6Lobo doŋ oceko cam mabup:

Lubaŋa ma Lubaŋawa doŋ omiyowa gum.

7Lubaŋa doŋ omiyowa gum;

pi meno dano ma i lobo ducu myero guwore.

Baibul 1985

© 1985 The Bible Society of Uganda

More Info | Version Index