Search form

Jabuli 75

Lubaŋa keto jo maraco bedo mayot ento iilo jo ma kitgi atir malo

1Wapwoyi, ai Lubaŋa, wapwoyi!

Watito pi dit me nyiŋi

ki pi tic me aura ducu ma doŋ ityeko tiyogi.

2“Atyeko yero kare me ŋolo kop”,

Lubaŋa ma owaco,

“abiŋolo kop atir dok kakare.

3Kadi bed lobo oyeŋŋe, kacel ki jo ma bedo iye ducu,

ento an abegwoko wir ma lobo ocuŋ iye ducu cuŋ matek kakargi.

4Awaco bot luwakke ni, ‘Pe wuwakke’,

bot jo maraco bene awacci, ‘Pe wulyerre ma wuwakke awaka.’

5Dok atito botgi ni pe myero gukette kengi malo twatwal,

dok bene gugik loko lok anywar woko.”

6Medo rwom pa dano pe bino kun a ki yo tuŋ wokceŋ nyo potoceŋ,

kadi ki yo tuŋ tim nyo yo tuŋ godi;

7ento Lubaŋa kene aye ma ŋolo kop pa dano,

dwoko ŋat man piny dok tino dano mukene malo.

8Rwot omako kikopo i ciŋe ma opoŋ ki koŋo vino,

ma yenyo ayenya ki bwoyo, ma girubo maber;

en miyo jo maraco ducu ma tye i lobo gimato,

gimato nio waŋ ma gityeko woko ducu.

9Ento an abibedo ki yomcwiny nakanaka,

abiwero wer kun apako Lubaŋa pa Yakobo.

10En bityeko twero pa jo maraco woko liweŋ,

ento bimedo twero bot jo ma kitgi atir.

Baibul 1985

© 1985 The Bible Society of Uganda

More Info | Version Index