Search form

Jabuli 90

BUK ME AŊWEN

Kwo pa dano tum woko oyotoyot

1Rwot, in aye ibedo kalarrewa ma con ki con.

2In Lubaŋa ma bedo nakanaka;

ma pud peya iketo godi ki lobo,

onoŋo in doŋ it ye.

3Iloko dano doko apwa,

kun iwacci, “Wudok cen, wun litino pa dano!”

4-Mwaka alip kulu ki boti rom ki nino ma okato laworo;

nyo rom ki cawa acel ma i dyewor.

5Ijwero dano woko, gikato calo lek,

gicalo lum ma lot odiko.

6Odiko lot, doŋo;

otyeno ner, ci two woko.

7Akemoni otyekowa woko;

kinigani omiyowa lworo madwoŋ.

8Ityeko keto gin marac ma watimo ducu i nyimi,

wa balwa ma watimo i muŋ ducu onen i waŋi ka maleŋ.

9Kare me kwowa kato akata i te akemoni,

mwakawa tum woko i kare manok twatwal.

10Kare me kwowa romo mwaka pyerabiro,

nyo pyeraboro ka komwa yot;

ento gin ducu kelo can ki ayelayela keken,

pien gikato oyot, waŋ bene warwenyo woko.

11Aŋa ma paro pi tek me akemoni,

ki pi lworo ma kinigani kelo?

12Pwonywa me kwano nino me kwowa,

wek wabed ki cwiny me ryeko.

13Lok cwinyi, ai Rwot!

Imito wanen can pi kare ma rom mene?

Wek kica omaki i kom luticci!

14Kwe cwinywa odiko ki mar meri ma pe lokke,

wek wawer wer wabed ki yomcwiny pi kare me kwo mewa ducu.

15Miwa yomcwiny pi kare ma rom ki nino ma imiyowa iye can;

ma rom bene ki mwaka ma walimo iye ayelayela.

16Wek wan luticci wanen tic meri, wek deyo me tek meri onen bot litinowa.

17Rwot Lubaŋawa, wek gum meri obed i komwa;

mok ticwa ducu ma watiyo wek obed maber!

Iyo mok tic mewa ducu ma watiyo wek obed maber!

Baibul 1985

© 1985 The Bible Society of Uganda

More Info | Version Index