Search form

Jabuli 92

Wer me pako Rwot pi berre

1Miyo pwoc bot Rwot en gin maber,

wero wer me pako nyiŋi bene en gin maber, ai In Mamalo Twal.

2Tuco mar meri ma pe-lokke odiko,

ki nyuto adani otyeno bene ber,

3kun gigoyo naŋa ki gitta,

ma gilubo dwan opuk bene.

4Pien in, ai Rwot, pi ticci me aura ma itiyo omiya yomcwiny,

pi tic ma itiyo miyo awero wer ki yomcwiny.

5Ticci dit tom mene, ai Rwot!

Dok tammi tut rom mene!

6Dano ma lamiŋ pe twero ŋeyo lok man,

dano ma wiye odiŋ pe twero niaŋ i kom lok man, ni,

7kadi lubal gidoŋo macalo lum,

dok kadi lutim maraco gibedo ki kwo maber,

ento gibityekogi woko matwal.

8Ento in, ai Rwot, ibedo dit nakanaka.

9Lumerokki, ai Rwot,

ada gibinekogi woko liweŋ,

jo ducu ma gin lutim maraco gibiketogi woko ata.

10Imiyo adoko tek macalo jubi ma i tim,

ityeko wira woko ki moo manyen.

11Atyeko neno can ma poto i kom lukworra ki waŋa,

dok atyeko winyo ki ita kit ma giloyo kwede jo maraco

ma onoŋo gutiŋŋe i koma.

12Jo ma kitgi atir gidoŋo calo yadi otit,

gidoŋo maboco calo yadi cedar me Lebanon.

13Gipitogi i ot pa Rwot,

gituru i dyekal me ot pa Lubaŋawa.

14Kadi guti ento pud gibinyak,

piggi bibedo dwoŋ miyo pe gibiner.

15Man binyuto ni Rwot cwinye atir en gotta ma pe tiyo gin mo marac.

Baibul 1985

© 1985 The Bible Society of Uganda

More Info | Version Index