Search form

Wer pa Solomon 6

Wer pa anyira Jerucalem

1In nyako maber ma nen mwonya makato anyira ducu-ni,

en ŋat ma imaro-ni kono ocito kwene?

En olokke odok yo tuŋ kwene?

Wacwa, wek wakonyi ki yenyone.

Wer pa nyako ger

2En ma amaro-ni ocito odok gire

yo tuŋ piny i potone,

ka ma yadi ma ŋwecgi kur doŋo iye.

En tye ka kwayo romine i poto,

en tye bene ka pwono ature leŋa.

3Laco ma amaro-ni mera kikome ki an bene a mere.

En kwayo romine i kin leŋa ma oturu.

WER ME ABIC

Wer pa lanyom

4In nyako ma amaro iber calo gaŋ Tiŋa,

inen mwonya mada calo gaŋ Jerucalem,

inen lik calo buca mony ma gutiŋo bendera.

5Lok waŋi cen pe inena, pien miyo apari mada.

Yer wii ocuŋ lijur calo lwak dyegi,

ma giwoto gicito piny i kor got Gilead.

6Laki tar calo megi romi matar ma

giŋolo yer komgi woko,

calo megi romi ma pud gia ka lwoko alwoka.

Gin ducu gigwaro rut keken,

pe tye mo acel i kingi ma orwenyo.

7Lemi ducu noŋo opoŋ woko calo nyig pomegranat ma gipoko iye i dul aryo,

ma nen ki i ŋe kitambara me wii.

8Mon ker welgi romo pyerabicel ki mon aŋeca welgi pyeraboro,

ki anyira doŋ welgi pe kwanne.

9Ento nyako ma amaro en ŋat acel keken

ma nen mwonya mada calo akuri.

En latin nyako acel keken bot minne,

en latin ma kite ber ma minne maro adada.

Anyira ducu ginene ci gilwoŋe ni layomcwiny

lwak mon ker ki mon aŋeca-gu giwero wer me pako en.

10Man aŋa ma nen calo rupiny-nyi?

En nen mwonya mada calo dwe ma ryeny,

dok calo cen ma ryeny maleŋ,

ma nen lik calo buca mony ma gutiŋo bendera.

Wer pa nyako ger

11Acito i poto ka ma gipito iye yadi ma nyak nyiggi calo yaa,

ka aneno ginapita ma pud doŋo adoŋa ma tye i nota,

dok acito ka neno ka olok doŋ ocako luro me keto nyige,

ki me neno ka yadi pomegranat doŋ turu.

12Ma pud peya onoŋo ayubbe, abedo ka tamo ni

wabedo kwedi atena i gadigadi me ker.

Wer pa anyira me Jerucalem

13Dwog cen, dwog cen, in nyako me Culam,

dwog cen, dwog cen, wek waneni.

Wer pa lanyom

Piŋo wumito neno nyako me Culam,

kun myelo i nyim dul lumyel aryo ducu?

Baibul 1985

© 1985 The Bible Society of Uganda

More Info | Version Index