Search form

Jekaria 2

Dano ma pimo piny ki tol

1Atiŋo waŋa malo ci aneno dano mo ma tye ki tol lapim piny i ciŋe! 2Dok apenye ni, “In mono ibicito wa kwene kaa?” En owacca ni, “Acito ka pimo Jerucalem, wek anen kit ma lacce tye kwede ki kit ma borre tye kwede.” 3Lamalaika ma obedo ka lok kweda-ni ocako bino, ki lamalaika mukene bene obino ka rwatte kwede. 4Ci owaco bot lawote ni, “Riŋ icit wa bot awobi ca iciwacce ni, ‘Jerucalem bibedo apero laboŋo cel murume, pi lwak dano ki lim makwo madwoŋ ma bibedo iye. 5Pien an kikoma aye abibedo macalo cel gogo me mac ma orumogi, an aye abibedo deyone ma nen ki i iye kunnu, man lok pa Rwot kikome.’ ”

Lwoŋo opii pi dwogo paco

6Wun jo-ni! Wun jo-ni! Wuriŋ, wua woko ki i lobo ma yo tuŋ acam, man lok pa Rwot kikome, pien con aketo iwu woko atata macalo yamo aŋwen me polo, man lok pa Rwot kikome. 7Wun jo-ni, wulwi, wuriŋ woko wa i Cion, wun jo ma wubedo i Babilon. 8Pien ŋat ma ogudo komwu noŋo ogudo pal cwiny Rwot me mony, I kare ma en Won Deyo oora bot lurok mapatpat ma yam guyakowu, en Rwot me mony owaco kuman ni, 9“Koŋ wunen ba, abiyeŋo ciŋa i wigi ci gin lurok gibidoko ginayaka pa jo ma yam koŋ gubedo opii-gi. Tim macalo meno bimiyo wuŋeyo ni, Rwot me mony aye muora. 10Doŋ wuwer ki yomcwiny, wun jo Cion; pien nen an doŋ abino ka bedo i dyewu, man lok pa Rwot kikome. 11Rok mapol gibiribbe i kom Rwot i nino meno, ci doŋ gibidoko jona. An bene abibedo i dyewu, dok wubiŋeyo ni, Rwot me mony aye muora botwu. 12Rwot bigamo Juda macalo dul ma gipokke ki i lobo maleŋ; en dok biyero Jerucalem aye.”

13Wuliŋ mot i nyim Rwot wun jo ducu, pien en doŋ oco woko ki i kabedone maleŋ.

Baibul 1985

© 1985 The Bible Society of Uganda

More Info | Version Index