Search form

LYI 15

Nyhet Vzvn

(Lew 25:1-7)

1Nyhet zvn thank khanghmuh nvng lyis ngwis jyen shauh bang lyis lhuiq tyamp dyei chah. 2Heika nvng khasoeh kuot chah zis nghuot. Israel lyis ngwis jyeih dyei toh soeu ka jyen lhuiq tyamp chah. Jyen vdoq lo. Yhensain nyang jyen lhuiq tyamp goeus ge taiq hoeuh goeus. 3Lvbaus nvng lyis jyen shauh lyis gas nvng jyen yoh doq. Nghuot laus eq nah dius nyau nvng lyis jyen shauh lyis gas jyen lhuiq tyamp dyei chah.

4Yhensain, nah Mangso nvng lyis dyei dah mau mas nyang nvng lyis shvmanh dyei das las nah dius jens dvyuk eq ma nyungs das. 5Nvng nyah domsyos gyo las khvnyhik ngos nvng lyis tying toh zis dvnganh vlhomuh chank kuot lyis gas, 6Yhensain nyah dangthoengh joq vgus namoq lyis shvmanh dyei das. Nvng dius nyau nyoshoq lyis ngwis yoh jyeih dyei das. Nvng gas hank jyank masyah eq ma jyeih noh. Nvng dius nyau nyoshoq lyis xauh joeu das. Nghuot laus eq namoq thoq mas chah dius nyau eq ma joeu das.

7Yhensain namoq Mangso namoq lyis dyei dah mau dvwus wus mas Israel jens chah nyeis lyis vxungh nyeis, nyamoq lyis pangh das zis vngoek. 8Hauh gungsthaiq nvng dyei gvm mes ehnyet yah nyamoq chah nyhoq jyeih dyei chah. 9Jyen lhuiq tyamp dyei zvn ni goeus yvmvyah dvja ja jyeih nghoh dyei das zis vngoek. Nah ehnyet mas ma gis dah nghamh cho vwvng los nhang. Nvng jyen kat das zis ngoek lyis gas, nyang nvng yah tyi lha Yhensain lhyi lui das las nah jyank mas yobos jweh das. 10Nyamoq lyis dyei mes ehnyet yah mvgon dyei aq. Housoeh lyis Yhensain ka nvng kuot cho dvnganh mas shvmanh dyei das. 11Nah mau mas nyungs las chah nyeis dah Israel jens vjangh nyeis das. Housoeh las nyamoq lyis dyei gvm mes dah ehnyet yah dyei geh oen ngos namoq lyis tying toh.

Jons lyis Lhuiq

(Dyu 12:1-11)

12Israel vbusbih, vmesbih nah jyank mas nyamoq gungs jons khyvlyis los ungh lyis nyamoq nvng lyis khyuk zvn phuqsoe thang lhyi nyamoq lyis kat kat chah. Nyhet vzvn jweh lyis nvng nyamoq lyis luiq loh nhang chah.13Nvng nyamoq lyis lhuiq kat lyis gungskom vnhang kat. 14Yhensain nvng lyis shvmanh dyei zis yah dvyhangteh nvng dyei gvm ehnyet yah nah yvng, jyo, yahge zvbiq masyah dyei kat chah. 15Nvng Egutu mas jons duot ku zis eq, Yhensain, nah Mangso nvng lyis lhuiq kat cho eq soh aq. Housoeh yvmvyah khvnyhik ngos namoq lyis haih tying dang dyei nyeis.

16Nghuot laus eq nah jons gas, Ngos nvng yahge nah yhenbang lyis jyet, pyo nyeis, ma mes thuq loh, ge mvbeh. 17Hauh thang lhyi nvng nyang lyis nah khomh mas shwih loh las nyah no chuq dyei das. Housoeh nyang gas dvcaiq yah nah jons duot nyeis das. Nah jons nyhiq lyis eq housoeh kuot chah. 18Nvng nah jons lyis lhuiq kat das zis yom vgyau. Nyamoq nvng lyis khyuk zvn top uhkung phauh dvgohyih yah phuqsoe goeus. Haih zis kuot aq, Yhensain, nah Mangso nvng kuot muh dvnganh mas shvmanh dyei das.

Noeu, Yvng Suot xeih

19Nah noeu yahge yvng suot xeih vlus dvnganh lyis Yhensain, nah Mangso xiklyis gvm toh aq. Haih noeu jens lyis muh zwi das zis vyhung. Haih yvng jens lyis eq mauh vgom.20Paiq joqyos, Yhensain xikkhonh mas zvn yau zvn, nvng yahge nah yhenbang dvgeh zo chah. 21Nghuot laus eq hau gaunyhauq mas dvja ja chah lyis, nyoqjet khyei gyau, chah zis bos lyis Yhensain, nah Mangso lhyi vphudyei. 22Housoeh teh gaunyhauq gas yhen mha zo chah. Cvt shoh chei shoh zo teh lhoqshang bang ma lhoqshang bang dvgeh gis zo. 23Suih gas vzo goh, jeis huot teh nyeisjvng mas huot chah.

Ngochang Common Language Bible

© Bible Society of Myanmar 2010

More Info | Version Index