Search form

LYI 7

Yhensain Dius Nyau

(Dyu 34:11-16)

1Nvng loh sain nyeis das mau mas Yhensain, nah Mangso nvng lyis shwih wvng las houmha yah dius nyau nyoshoq khat tyamp das. Namoq jweh zis yah dvyhangteh namoq thoq lyis zes kuh, yomsoq zes bos dah dius nyhet nyau ge, Hiti, Girgashi, Amori, Khanan, Perizi, Hiwi yahge Yebusi jens lyis khat tyamp das.2Yhensain, nah Mangso hauh bang lyis nah loq mas kyauh lyis nvng nyamoq lyis ung lhyi shank shoq sat chah. Nvng nyamoq yah thanghchvp vtoh, nhaiqnyen cho eq vchixoeuq. 3Nyamoq dvyuk yuk lyis phoengh vhwank yoeus. Namoq lonyi jens eq nyamoq lyis vdyei zo. 4Khasoeh ge lyis gohtoeu mangso jens lyis paiq das xiklyis nah lo jens lyis Yhensain jyank masyah she loh das. Housoeh bweh lyis Yhensain nhaiqyo las nvng lyis dvlhain dvm mhont das. 5Housoeh las nyamoq dah phon lhyi thyoq tyamp geh, nyamoq paiq lukzains lyis khwih tyamp geh, nyamoq dah gywes nyih Ashera gungslho zains lyis jap tyamp las nyamoq dah phvra lyis ngheq tyamp geh. 6Namoq gas Yhensain namoq Mangso yah sen yvmvyah haih zis kuot. Namoq lyis nyah lhyenwhei dius kuot das ge, nyeisjvng thoq mas dius jens dvnganh masyah namoq lyis khyen yoeus.

7Namoq gas gohtoeu dius jens thoq lyis zes nyo yvmvyah Yhensain namoq lyis jyetdap, khyen yoeus zis ma nghuot; namoq gas nyeisjvng thoq mas nain thank dius nyau dvnghuot. 8Yhensain namoq lyis jyetdap las eq, nyang namoq dah phauh thyeih moq yah toh dah dangthoengh goeng nhang mes. Housoeh las nyang namoq lyis nyah kuhxing yomsoq yah namoq Egutu hwankti jyank mas jons duot nyeis masyah khyuot lhuiq kat. 9Yhensain, nah Mangso kyingh Mangso nghuot las wontang yvlyis soh geh. Nyang lyis jyet las nyang tyingtoh yvlyis chank kuot bang lyis dvkhyoengh caiq jweh shoq nyah thanghchvp tyink las nyah mathank magons jyetdap cho chixoeuq das. 10Nghuot laus eq nyang lyis hoeng bang lyis gas ma sheq toh lo mhont das. 11Housoeh las gvshih ngos namoq lyis jyauh goeus zis chank nyeis geh. Khvnyhik ngos namoq lyis dyei dah lyi dvnganh chank geh.

Domsyos Gyo Shvmanh

(Lyi 28:1-14)

12Nvng haih tyingtoh dang gyo yoeus las lomluk luk chank lyis, Yhensain, nah Mangso nah phauh thyeih moq lyis dangthoengh toh vgus, nvng yah thanghchvp tsoq tyink las nyah mathank magons jyetdap cho chixoeuq das.13Nyang namoq lyis jyetdap zis yah shvmanh dyei das, housoeh namoq jebais los las loshang nyoshoq bos das. Nyang namoq xiklyis maunyeis lyis shvmanh dyei das las namoq jyo, zvbiq, tsanlun coeu yoh das. Namoq lyis noeu, yvng nyoshoq dyei zis yah shvmanh das. Namoq phauh thyeih moq lyis dangthoengh toh dah mau mas nyang namoq lyis haih shvmanh dvnganh dyei das. 14Mungkvn mas namoq teh shvmanh gvgis yoh bang hank ma bos. Namoq mas, nghuot ya namoq nyhoeu dah gaunyhauq mas vthonh ma bos das. 15Yhensain ka namoq lyis nos thyoh dvnganh masyah gos toh dyei das. Namoq Egutu mas seq ku dah gyukphoh noslom namoq jyank mas ma she los dyei das. Namoq dah jeswus dvnganh thoq mas dvshe los das. 16Nvng Yhensain, namoq dah Mangso namoq lyis kyauh los dah dius nyau jens dvnganh lyis mhont geh. Nhaiqnyen cho dvtsiq eq vchixoeuq. Nyamoq dah mangso jens lyis vpaiq, houka namoq dah lhyik duot das.

17Haih dius jens gas ngamoq thoq lyis nyo, nyamoq lyis khasoeh yoh khat tyamp das oen vtaiq zo. 18Nyamoq lyis vgyuk: Yhensain, nah Mangso Egutu hwankti yahge nyah dius jens dvnganh lyis khasoeh kuot yvlyis soh aq. 19Yhensain, nah Mangso nvng lyis khyuot lhuiq los uhlyis nah nyoqjeih yah nyvng dah gyukphoh yomh, yomsoq muh, mauh loqmuh, kuhxing yomsoq yahge yom lyis soh aq. Nyang Egutu dius jens lyis mhont tyamp zis yah dvyhangteh, gvshih nvng gyuk nyeis dah dius jens lyis eq housoeh kuot das. 20Nvng lyis phang luiq las tamh joq bang lyis yangh nyang yau nhang lha mhont das. 21Housoeh las haih dius jens lyis vgyuk. Yhensain, nah Mangso namoq mas nyeis. Nyang gas Yomzains Mangso nghuot las gyukphoh soeu nghuot. 22Nvng jweh wvng zis yah dvyhangteh nyang haih dius nyau jens lyis dvtsiq dvtsiq khat tyamp dyei das. Nvng yewus nyo los das yvlyis chiq chank bos yvmvyah, nyamoq lyis dvnganh dvlhain dvm ma gis mhont tyamp. 23Yhensain ka nah jeswus lyis nah loq mas kyauh das las nyamoq dye dyoqbis shoq nyamoq lyis yau nhang das. 24Nyamoq dah hwankti jens lyis eq nah loq mas kyauh das. Nvng nyamoq lyis sat das las nyamoq lyis tohnyhik tyamp das. Nvng yuk khanghmuh lyis mhont das las nvng lyis hank ma yoh tomp toh das. 25Nyamoq dah phvra lyis ngheq tyamp geh: hauh thoq mas dah ngwis xing lhyi v-omes, namoq xiklyis vyoeus toh goh. Namoq yoeus lyis hauh zis namoq xiklyis lhyik bweh das: khasoeh ge lyis Yhensain ka phvra lyis hoeng. 26Haih phvra dvkoeuq eq namoq yhen mha vchi los. Ma nghuot lyis hauh thoq mas nhoengh zis nah thoq mas jweh das. Hauh phvra lyis Yhensain nhoengh toh yvmvyah nvng hauh yvlyis hoeng lha choqh chah.

Ngochang Common Language Bible

© Bible Society of Myanmar 2010

More Info | Version Index