Search form

DYUNG 10

Janghgyik

1Hauh thang lhyi Yhensain Moshe lhyi taiq zis gas, Pharao jyank loh aq: khasoeh ge lyis ngos Pharao yahge nyah zau jens lyis ngah yomsoq muh yoh chixoeuq shoq ngos nyamoq dah nhaiqlom lyis than nhang. 2Ngos Egutu bang lyis ngah yomsoq muh yah khasoeh kuot yvlyis nah lo nah nyei jens lyis yoh taiq kyoh das. Housoeh ngos Yhensain nghuot yvlyis seq das.

3Housoeh Moshe yahge Aron gas Pharao jyank mas loh las, Yhensain Hebre jens dah Mangso heisoeh ge: Nvng ngah o mha gyoh das zis khanhamp jweh shoq ngoek nyeis das lah? Ngah dius jens ngos lyis loh yoh paiq bas jungh, nyamoq lyis loh nhang aq. 4Nvng ngah dius jens lyis loh nhang das zis ngoek shih lyis gas, nvpyo ngos nah mau mas janghgyik nhang kat das. 5Houka tsoh ma nyvng lo shoq nghop joq das: gyu ma mhont, nyet shih yvlyis eq, nah yos mas nyet shih saiqzains dvnganh lyis eq zo tyamp das. 6Hauh janghgyik gas nah hwankti yhen, nah zau jens dvnganh dah yhen, nah dius jens dvnganh dah yhen mha dyingh joq das. Houka namoq dah phauh thyeih moq ma nyvng ku svsoh xungh zis nghuot das, ge taiq lho lha Pharao jyank masyah thuq loh.

7Housoeh las Pharao dah zau jens gas nyang lyis, Haih soeu yang lyis khanhamp jweh shoq yau dyei nyeis shih das lah? Yhensain, nyamoq dah Mangso lhyi loh paiq bas jungh, yukgis jens lyis loh nhang goh. Egutu mau gonh dyoqbis goeus zis nvng ma soh lhyeh, ge.

8Housoeh Moshe yahge Aron lyis Pharao jyank mas doms shwih los las taiq zis gas, Yhensain, namoq dah Mangso lhyi loh paiq geh, nghuot laus eq hank hank tsain loh das, ge.

9Moshe toeuh zis gas, Ngamoq loh das lyis gas, ngamoq Yhensain lhyi chungh pwe kuot das yvmvyah, ngamoq dah loshang jens, lokhoq jens, ngamoq dah loloeu lonyi jens, ngamoq dah yvng shvbeq, noeu phung dvnganh yah dvgeh loh das, ge.

10Pharao taiq zis gas, Ngos nvng lyis namoq dah loshang jens yahge vmesbih jens lyis ma shwih loh nhang oen Yhensain mha maukhi. Houka namoq toeu-nghank das cho da zis bvng bvng nghuot. 11Housoeh ma yoh kuot, namoq o zis yah dvyhangteh Yhensain lhyi yukgis jens kyingh loh paiq geh, ge nyah zomh lyis Pharao xikkhonh masyah khat tyamp.

12Hauh thang lhyi Yhensain Moshe lhyi taiq zis gas, Nah loq Egutu mau thoq mas toeu lha janghgyik she kat aq. Hauh zis gas yuk dah vzains dvnganh, gyutomp bat masyah doeng los zis dvnganh zo tyamp das, ge. 13Housoeh las Moshe nyah lhamloq lyis Egutu mau thoq mas toeu lhyi Yhensain ka hau dvnyeih dvnyens gonh buisthuq lyeis hauh mau thoq mas muot nhang lha nungsnvp gas hauh lyeis yah janghgyik shwih los. 14Hauh janghgyik gas Egutu mau gonh los nghop toh. Houka svsoh thoeu lha housoeh teh zis xikpheh ma nyvng ku, thang pheh eq ma doms nyvng ku lo das. 15Hauh zis gas maunyeis eq noq shoq los nghop toh las gyutomp ma zangh dah zains mas shih dvnganh zo tyamp. Egutu mau gonh mas dah saiqzains yahge pa mha dah anghphoq nyaus zis cha eq ma nyet lo.

16Housoeh las Pharao gas Moshe yahge Aron lyis lvnyap khi yoeus las taiq zis gas, Ngos Yhensain, nah zomh dah Mangso lhyi eq, nah zomh lyis eq shuot goeus. 17Gvshih hai dvlhain ngah yobos khyuot dyei las, ngah jyank masyah hai xungh dah joeng cho yoeus tyamp dyei bas jungh, Yhensain, nah zomh dah Mangso lhyi dung dyei geh, ge. 18Moshe ka Pharao jyank masyah thuq las Yhensain lhyi dung dyei. 19Yhensain eq buisthuq lyeis lyis thaiq las buiswvng lyeis than muot los nhang zis yah janghgyik lyis Thomh Nes mas dvng khyoq tyamp. Egutu mas janghgyik dvdoeu eq ma nyet lo. 20Nghuot laus eq Yhensain ka Pharao dah nhaiqlom lyis than nhang lha Israel jens lyis ma loh nhang doms kuot.

Mauchuot

21Tsai, Yhensain Moshe lhyi taiq zis gas, Nah loq maukhung pheh toeu aq, hauh uhlyis yoh wu yoeuh dah chuot zis gas Egutu mau lyis nghop toh das, ge. 22Moshe ka nyah loq maukhung pheh toeu lhyi, Egutu mas svsoh thoeu shoq chuot joq zis somh nyeih nghuot. 23Housoeh las Egutu jens nyang changh nyang ma nyvng goh, hauh gyo lyis hank eq vsainnyang yhen mhayah ma yoh thuq loh: nghuot laus eq Israel jens nyeis yvmas gas bvng zis tsain yoh.

24Pharao gas Moshe yahge Aron lyis khi yoeus las taiq zis gas, Yhensain lhyi loh paiq geh: namoq dah vmesbih jens, lo jens eq shwih loh geh: nghuot laus eq yvng shvbeq, noeu phung ka heimha nyeis chah, ge.

25Housoeh Moshe toeuh zis gas, Yhensain, ngamoq dah Mangso lhyi phudyei das xiklyis gaunyhauq yahge ngheq dyei jyungshuk eq nvng dyei chah. 26Ngamoq dah gaunyhauq eq komp loh das, dvdoeu eq ma nyhet toh khoq das: khasoeh ge lyis ngamoq hou mhayah khyen yoeus las Yhensain, ngamoq dah Mangso lhyi paiq phuqsoe das: houmha ma jweh shih lyis Yhensain lhyi khah zis sat ngheq dyei das zis gas ngamoq ma seq, ge.

27Yhensain ka Pharao dah nhaiqlom lyis than nhang lha nyang nyamoq lyis ma mes loh nhang. 28Nyang Moshe lhyi taiq zis gas, Ngah nyoqlvtjvng masyah thuq loh aq, nvng ngos lyis khanhamp eq vlos nyvng nhang lo. Ngos nvng lyis nyvng nyeih lyis, nvng shei das, ge.

29Moshe toeuh zis gas, Nvng taiq zis jus goeus. Ngos nah nyoqnho lhyi khanhamp eq ma doms nyvng lo das, ge.

Ngochang Common Language Bible

© Bible Society of Myanmar 2010

More Info | Version Index