Search form

DYUNG 13

Loxeih Kyauh

1Yhensain Moshe lhyi taiq zis gas, 2Israel jens mas dius eq gaunyhauq eq loxeih dvnganh gas ngah xiklyis gyingshang nhang toh geh; houka ngos yah sen, ge.

Bicheih ma Kat Ohlhyoq zo Pwe

3Moshe dius jens lyis taiq zis gas, Namoq jons duot nyeis dah Egutu masyah thuq los, haih buisnyeis lyis soh geh: Yhensain namoq lyis yomsoq bos dah loq yah hou mhayah shwih yoeus goeus. Namoq bicheih ma kat ohlhyoq zo chah. 4Abi lhamhmuh khyvp khvnyhik nyang, namoq Egutu masyah thuq los. 5Namoq lyis dyei das ge, nah phauh thyeih moq lyis maukhi toh, noeu nauh yahge dyoyhei yaus, Khanan, Hiti, Amori, Hiwi, Yebusi jens nyeis dah mau mas Yhensain namoq lyis shwih toh uhlyis, zvn yau zvn hai cangxeih vkhyvp lyis namoq haih pwe kuot chah. 6Namoq nyhet nyeih top bicheih ma bos ohlhyoq zo las, nyhet vnyeih lyis Yhensain lhyi chungh pwe nghuot das. 7Nyhet nyeih gonh bicheih bos ohlhyoq ma gis zo. Namoq mau khamha eq bicheih nghuot ya bicheih bos ohlhyoq ma gis joq. 8Haih pwe xi lhyi nah loloeu jens lyis, Ngos Egutu masyah thuq los uhlyis ngah xiklyis Yhensain kuot dyei dah jyehjuh gvng mas haih pwe kuot, oen phui kyoh chah. 9Haih pwe ka nvng lyis soh nhang das. Yhensain dah lyi nah nhuot yah comh nyeis das nyhenshang nah loq mas vlho dvja ja, nah ngelang mas taiq kyingh vyhang teh nghuot joq das: khasoeh ge lyis Yhensain ka nyah kuhxing yomsoq yah nvng lyis Egutu masyah shwih los. 10Housoeh las zvn yau zvn toeuq toh shishenh lyis haih pwe kuot chah.

Loxeih

11Yhensain ka nvng lyis eq, nah phauh thyeih moq lyis eq maukhi toh, Khanan mau mas nvng lyis shwih los das. Nyang namoq lyis hauh zis dyei lyis, 12yukgis loxeih khanghmuh gas Yhensain lhyi dyei chah. Gaunyhauq suot xeih vlus khanghmuh eq Yhensain yah sen. 13nghuot laus eq mauhlyihzoe loxeih lyis gas nvng yvnglo yah wis thaiq chah: hauh zis ma mes doms wis lyis gas nyah lainzain khyauh dyei chah. Namoq dah yukgis loxeih khanghmuh lyis doms khyuot chah. 14Thang pheh nah lo nvng lyis, Hai zis chah vjyuk nghuot lah, ge nyei lyis nvng gas, Ngamoq jons duot nyeis joqyos Egutu masyah Yhensain ka yomsoq zainsmuh yhung lha shwih los. 15Egutu hwankti nhaiqlom than lha ngamoq lyis ma nhang kat lhyi, Yhensain ka Egutu mau mas dah dius loxeih yahge gaunyhauq suot xeih khanghmuh lyis sat. Housoeh las yang cangxeih suot dah vlus khanghmuh Yhensain lhyi phudyei zis nghuot. Nghuot laus eq yukgis loxeih lyis gas doms khyuot, oen taiq kyoh das. 16Haih pwe ka yah loq mas vlho dvja ja, yah ngelang mas taiq kyingh vyhang teh tsain duot das: khasoeh ge lyis Yhensain ka nyah kuhxing yomsoq yah ngamoq lyis Egutu masyah shwih los, ge.

Jyommauh Punk, Nyizains

17Egutu hwankti Pharao hauh dius jens lyis nhang kat uhlyis, Philisti mau pheh bangh loh jyankyvm cho ka chokyank nghuot joq laus eq, Mangso ka nyamoq lyis houcho ma shwih los: khasoeh ge lyis dius jens jeszan chah das cho nyvng lyis nyamoq ehnyet thaiq las Egutu pheh ma mes tauh e nhang, ge Yhensain nghamh. 18Hauh gungsthaiq Mangso ka nyamoq lyis Thomh Nes pheh loh dah mhanhdyvp cho shwih lhain los. Israel jens gas jeszan das xiklyis jeslo jens teh sham lham chi toh.

19Yosep gas Israel jens lyis, Mangso ka namoq lyis lyih khyuot uhlyis namoq ngah shohyau lyis haih joqyos masyah yoeus loh chah, ge vlhomuh maukhi nhang toh zis yah dvyhangteh, Moshe ka Yosep dah shohyau lyis nyang yah dvgeh yoeus doq los.

20Nyamoq gas Sukot masyah toq las mhanhdyvp vthang Etham mha thoeng nyeis. 21Yhensain ka nyamoq nyeih eq nyenh eq yoh loh das xiklyis, nyeih lyis choshe das zis jyommauh punk, nyenh lyis pank dyei das zis nyizains yah nyamoq xik mas loh. 22Nyamoq dah xik mas nyeih lyis jyommauh punk, nyenh lyis nyizains vjangh joq.

Ngochang Common Language Bible

© Bible Society of Myanmar 2010

More Info | Version Index