Search form

DYUNG 15

Moshe Chungh Dang

1Hauh thang lhyi Moshe yahge Israel jens gas haih chunghthwe yah Yhensain lhyi chungh las taiq zis gas,

Yhensain ka yomsoq zains yah ung goeus yvmvyah ngos nyang lyis chungh das.

Nyang gas nyang jens yahge nyang ji bang lyis thomh mas khyoq tyamp.

2Yhensain ka ngos lyis khomp dyei dah yombos soeu nghuot.

Nyang gas ngos lyis khyuot yoeus soeu nghuot.

Nyang gas ngah Mangso nghuot las ngos nyang lyis chungh das;

Nyang ngah uwus dah Mangso nghuot las ngos nyah kuhxing cho lhyi chunghthwe kat das.

3Yhensain ka jeszan kunk soeu nghuot;

Nyah nyings Yhensain nghuot.

4Nyang Egutu jesphung yahge nyamoq dah jeslhyingh lhyi hauh thomh mas khyoq tyamp.

Gis thank jeszau jens eq Thomh Nes mas nyop tyamp.

5Jeis noq thomh nyamoq lyis nghop tyamp.

Nyamoq thomh theh mas lukgoq teh gyoh loh.

6Yhensain eh, nah yomsoq gas gyukphoh nghuot.

Houka jeswus lyis mhont tyamp.

7Nvng nah jeswus lyis nah phunk bos ung cho yah zan shuq tyamp.

Nah nhaiqyo zis gas nyi soeh ngeh las, nyamoq mhotkhyot teh ngeh tyamp.

8Nvng thomh mas muot las jeis gas nyhang shoq boms doq los;

hauh zis tyoyvm teh zungh toq yap doq joq;

Thomh noq thank yvmas eq vtomp mus joq.

9Jeswus gas, Ngos nyamoq lyis chank khat las duons das;

Ngos nyamoq zisyos gvm las ngos o zis dvnganh yoeus das.

Ngos ngah moengsa she lha nyamoq yoh zis dvnganh yoeus das, ge.

10Nghuot laus eq Yhensain eh, nvng nah soq dvlhain muot kat lyis Egutu bang nyop loh.

Nyamoq gyukphoh jeis mas cui teh nyop loh.

11Yhensain eh, mangso jens mas nvng teh zis hank bos lah?

Gyingshang yvmas nvng teh mauhphoh soeu hank nghuot lah?

Nah yomsoq muh yahge yomzains muh hank yoh kuot lah?

12Nvng nah yomsoq chixoeuq las,

nyeisjvng gas ngamoq dah jeswus lyis nyhau tyamp.

13Nvng nah dangthoengh lyis wontang zis yah nvng khyuot kat dah dius jens lyis shwih los.

Nah gyingshang maunyeis mas nvng nah yom yah nyamoq lyis cho she los.

14Dius nyau jens gas hauh zis xauhgyo las gyuk zis yah nvn nyeis.

Philisti dius jens gas svsoh gyuk nyeis.

15Edom zau jens gyuk dvn nyeis,

Moab thoeuqzoe jens nvn nyeis.

Khanan bang gas womh ehnyet ma bos lo.

16Gyuk cho dvn cho nyamoq thoq gyoh los.

Yhensain eh, nyamoq nah yom lyis nyvng las,

jons duot masyah nvng lhuiq kat dah dius jens,

jens lai loh shoq nyamoq gyuk nvn yap joq.

17Yhensain eh, nvng nah yhen xiklyis khyen toh,

nvng nah loq yah kuot toh dah

Yhenmuh pheh shwih los las khyei khyoq nhang toh.

18Yhensain eh, nvng gas vcaiq vto Hwankti nghuot das, ge.

Miriam dah Chungh Dang

19Israel jens gas thomh mas tungyos cho yah suh lai los. Nghuot laus eq Egutu bang dah nyang jens yahge jeslhyingh, komp bang gas hauh thomh mas wvng lyis, Yhensain ka jeis lyis tauh los nhang lha hauh zis nyamoq lyis nghop tyamp.

20Aron dah vbi lvpe vmesbih Miriam gas nyah loq mas jyoeu dap zainslo chi lha, lonyi jens dvnganh eq zainslo bat las nyah thang mha tsain chank goh. 21Miriam nyamoq xiklyis chunghthwe kat zis gas,

Yhensain ka phunk bos dah ung cho yoh goeus yvmvyah nyang lyis chunghthwe kat geh.

Nyang jens yahge nyang ji bang lyis thomh mas khyoq tyamp, ge.

Jeis Khoh

22Hauh thang lhyi Moshe ka Israel vnyau lyis Thomh Nes masyah shwih thuq las Shur mhanhdyvp mas wvng loh. Nyamoq houmha somh nyeih cho loh laus eq jeis ma nyvng. 23Hauh thang lhyi nyamoq Mara ge joqyos mas jweh lyis Mara mas jeis khoh las ma yoh tsain shuk. Housoeh yvmvyah hauh yvlyis khoh ge dah vjyuk yah Mara ge nyhink. 24Dius jens Moshe lhyi lop zoh lyis nyei zis gas, Yang jeis cha shuk das, ge. 25Moshe ka Yhensain lhyi dung. Yhensain eq nyang lyis saiq dvzains tuonh shet las, nyang hauh saiq lyis jeis mas doeuh kat lyis hauh jeis nghamh los.

Houmha Mangso nyamoq xiklyis lyi tsain toh dyei las nyamoq lyis eq shi yoeuh. 26Nyang taiq zis gas, Ngos jus oen nghamh yvlyis chank kuot zis yah ngah domsyos gyo las ngos tyingtoh dang lyis chank nyeis lyis gas Ngos Egutu bang mas she los dah noslom dvja eq nvng lyis ma khyoq das. Ngos gas nvng lyis gis los nhang dah Yhensain nghuot, ge.

27Nyamoq hou mhayah jeisthuq dwang dvci aiq koeuq bos las dyoms nyhetci zains bos dah jeisyvm, Elim mas tsain thoeng nyeis.

Ngochang Common Language Bible

© Bible Society of Myanmar 2010

More Info | Version Index