Search form

DYUNG 16

Mana yahge Mvne

1Hauh thang lhyi nyamoq gas Elim masyah cheh loh las, Israel jens moqphung dvkoeuq gonh Egutu masyah thuq thang lhyi lhamhmuh aiq vkhyvp dvci oeng vnyeih lyis, Elim yahge Sina boms vjo, Sin ge dah mhanhdyvp mas jweh loh. 2Hau mhanhdyvp mas nyamoq dvnganhmoq Moshe yahge Aron lyis tsain lop. 3Nyamoq nyah zomh lyis taiq zis gas, Yhensain ngamoq lyis Egutu mas sat nhang mes. Nain thank ngamoq houmha tsung lha shoh eq gohtoeu zonoms eq jo jo xauh zo. Nghuot laus eq nah zomh ngamoq lyis haih mhanhdyvp mas dvnganh yuot shei bas jungh ge shwih los, ge.

4Yhensain Moshe lhyi taiq zis gas, Gvshih ngos namoq dvnganhmoq xiklyis maukhung mhayah zonoms khoq dyei das. Nyamoq nyeih yau nyeih dvnyeih xiklyis geh ko top kui yoeus chah: Heisoeh nyamoq ngos taiq shet cho vchank kuot lah zis ngos nyamoq lyis shi yoeuh das. 5Khyuk vnyeih lyis gas nyeih yau nyeih kui yoeus dah aiq nyhoq kui yoeus las ba toh chah, ge.

6Moshe yahge Aron Israel jens dvnganh lyis taiq zis gas, Houka namoq lyis Egutu masyah shwih los dah Yhensain nghuot yvlyis nyenhthang lhyi seq das. 7Nvpyo eq namoq Yhensain dah phunk lyis nyvng das. Namoq lop dah dang nyang xauhgyo: ngah zomh lyis lop zis ma nghuot, ngah zomh gas cha ma nghuot, nyang taiq shet zis dvkuot, ge. 8Moshe taiq zis gas, Nyenhthang lhyi namoq zo das shoh yahge nvpyo lyis namoq o nyhoq ohlhyoq dyei das zis gas Yhensain nghuot. Khasoeh ge lyis namoq, nyang lyis tyi lha kha iq lop zis gas nyang xauhgyo goeus. Namoq ngah zomh lyis tyi lha lop zis gas Yhensain lhyi tyi lha lop zis dvnghuot, ge.

9Moshe Aron lyis taiq zis gas, Nyamoq lop zis Yhensain xauhgyo goeus yvmvyah, moqphung gonh nyah xikkhonh mas los yap geh, oen taiq aq, ge. 10Aron moqphung gonh lyis taiq zis yah dvyhangteh, nyamoq hau mhanhdyvp pheh lhain yoeuh lyis, Yhensain dah phunk nyetlos nyettant hau jyommauh mas thuq los. 11Yhensain Moshe lhyi taiq zis gas, 12Israel jens lop zis ngos xauhgyo; nyamoq buiswvng zoh lyis shoh xauh zo das; nvpyo lyis gas ohlhyoq yah jo das: hauh uhlyis ngos Yhensain, nyamoq dah Mangso nghuot yvlyis nyamoq seq das, oen nyamoq lyis taiq aq, ge.

13Housoeh nyenhthang lhyi mvne thoenggus mas dyingh shoq dang gyoh boms joq. Nvpyo lyis eq hau vyvm vwi mas jyweh gyoh nyeis. 14Jyweh bi tyamp lyis, mhanhdyvp mas gyuchen lom teh zis joq. 15Israel jens hauh yvlyis tsain nyvng lyis, hauh zis cha nghuot yvlyis nyamoq ma seq las, Hai cha nghuot lah, ge nyang changh nyang nyei goh.

Moshe ka, Namoq zo das xiklyis Yhensain dyei dah zonoms gas haih zis nghuot. 16Yuk khanghmuh vsainnyang zo ko kui bas jungh; nyah yhenbang xiklyis dvyuk aiq thunk kui bas jungh, ge Yhensain taiq toh, ge.

17Israel jens eq dvyhamh nyo nyo, dvyhamh nainlo kui yoeus. 18Nyamoq pan mha laiq lyis nyo kui soeu ma nyo, ma tham kui soeu eq luk zo. Dvyuk dvyuk luk zo ko kui yoeus.19Moshe nyamoq lyis taiq zis gas, Hank eq nvpyo nyhenshang vyung toh goh, ge. 20Nghuot laus eq dvyhamh gas Moshe dang ma gyo, dvkhamh yung toh. Nungsnvp lyis houka luk luk las bop shom nvm joq. Housoeh las Moshe ka nyamoq lyis nhaiqyo. 21Nvp yau nvp hank eq hank luk zo ko kui yoeus. Buis ngeh los goeus ya nyeisjvng mas nyet joq zis gas yaus tyamp.

22Khyuk vnyeih lyis gas xikpheh thoq lyis aiq nyhoq, dvyuk xiklyis dvpan kui yoeus. Moqphung vgyis jens hauh cho Moshe lhyi loh tsain taiq kyoh. 23Nyang nyamoq lyis taiq zis gas, Phvnaq nyeihyo gas Yhensain dah gyingshang No Buisnyeis nghuot. Namoq kank mes zis kank, puh mes zis puh las nyet zis dvnganh nvpyo xiklyis gvm toh geh, ge Yhensain tying toh, ge. 24Nyamoq eq Moshe tying toh vgus nyet zis nvpyo jweh shoq toh. Houka ma dyoq luk eq ma luk. 25Moshe taiq zis gas, Khvnyhik gas Yhensain dah No nyeih nghuot las namoq nyhet toh zis zo geh. Namoq khvnyhik thoenggus nghe pheh hauh zis ma nyvng das. 26Khyuk nyeih top namoq zonoms tsain xauh kui das. Nyhet vnyeih gas no nyeih nghuot las hauh zis ma joq das, ge.

27Nyhet vnyeih lyis dvyhamh bang gas zonoms kui das ge thuq loh laus eq, cha ma nyvng. 28Housoeh las Yhensain Moshe lhyi taiq zis gas, Dius jens namoq khanhamp jweh shoq ngos tyingtoh dang lyis domsyos gyo cho ngoek das lah? 29Ngos Yhensain namoq lyis No Buisnyeis dvnyeih dyei toh. Housoeh las khyuk vnyeih lyis aiq nyeih xiklyis zonoms vjangh luk shoq dyei das zis soh geh. Nyhet vnyeih lyis yuk khanghmuh hank eq hank nyang zvng mas nyeis geh; vsainnyang zvng masyah vthuq goh, ge. 30Housoeh las nyhet vnyeih lyis dius jens muh ma zwi.

31Israel jens gas hauh zonoms lyis Mana ge nyhink. Houka ngis las thyoeu dah vjeih teh zis nghuot. Hauh whitau ka dyoyhei yah kuot dah ohlhyoq bu teh chau. 32Moshe taiq zis gas, Yhensain tying toh zis gas, nyang yang lyis Egutu masyah shwih thuq los uhlyis mhanhdyvp mas yang lyis gvmtsoh dah zonoms nghuot zis yah diusjangh caiq nyvng das xiklyis mana dvtsiq yung toh geh, ge. 33Moshe Aron lyis taiq zis gas, Yam dvkoeuq yoeus las houmha hau mana aiq thunk kat yung toh aq. Hauh zis yah diusjangh caiq xiklyis Yhensain dah xikkhonh mas toh aq, ge. 34Yhensain Moshe lhyi tying toh vgus, Aron gas hauh Thanghchvp Kwi xikkhonh mas Mana yung toh. 35Israel jens gas nyamoq nyeis loh das joqyos Khanan mau jweh shoq nyeici zvn top Mana tsain zo. 36Nyamoq mana laiq pan ka aiq thunk wvng. Houka dv-epha dah ciboms dvboms nghuot.

Ngochang Common Language Bible

© Bible Society of Myanmar 2010

More Info | Version Index