Search form

DYUNG 19

Israel jens Sina Boms mas

1-2Israel jens gas Rephidim masyah thuq las, Egutu masyah thuq thang lhyi lhamhmuh somh vkhyvp canh dvnyeih lyis Sina mhanhdyvp mas jweh loh. Nyamoq hau Sina boms khyei mha tsain thoeng nyeis. 3Moshe ka Mangso yah xauhgoh das xiklyis boms mas doq loh.

Yhensain eq hauh boms masyah nyang lyis lui las, Nvng Yakop dah diusjangh caiq Israel jens lyis heisoeh taiq aq. 4Ngos Yhensain Egutu bang lyis cha kuot cho yahge ngos namoq lyis ngah jyank mas zonsmuh gas nyah lo lyis nyah dungs thoq mas kih dvng teh shwih los yvlyis namoq nyvng goeus. 5Gvshih namoq ngah domsyos gyo las ngah thanghchvp chank nyeis lyis gas, namoq ngah dius nyau duot das. Nyeisjvng gonh ngah zis nghuot laus eq namoq gas ngos khyen yoeus dah dius nyau nghuot das. 6Namoq kyingh ngos yah sen bang nghuot las, ngah munghdan mas dah phudyei bang yahge gyingshang dius nyau duot das. Nvng Israel jens lyis haih dang taiq chah, ge. 7Housoeh Moshe gyoh los las dius jens dah uhshe bang lyis khi tsainh las Yhensain nyang lyis tyingtoh dang dvnganh nyamoq lyis taiq kyoh. 8Dius jens dvnganh eq, Yhensain taiq ya taiq zis ngamoq kuot das, ge chomp toeuh. Moshe eq haih zis Yhensain lhyi taiq kyoh.

9Yhensain Moshe lhyi taiq zis gas, Ngos jyommauh puk masyah nah jyank mas los das. Housoeh las ngos nvng yah jisgoh zis dius jens xauhgyo das las gvshih masyah nvng lyis lomsjingh das, ge.

Moshe ka dius jens khasoeh toeuh cho Yhensain lhyi taiq kyoh. 10Yhensain nyang lyis taiq zis gas, Dius jens jyank mas loh las, khvnyhik phvnaq nyeihyo shishenh yoeus las paiq das nyhenshang nyamoq cheihshang yoeus geh, oen taiq aq. Nyamoq dah dyimis cheih chah. 11Sangphoq nyeihyo nyamoq cicont nghuot bas jungh: hauh nyeih lyis dius jens yoh nyvng dah Sina boms mas ngos gyoh los das. 12Boms lhaink las dius jens ma gis lai dah vjyih kuot toh aq. Boms mas vdoq loh goh, oen taiq toh aq. Houmha yangh vni loh goh. Dvyuk yuk houmha khyei khyoq lyis hauh soeu ka sat zis xauh chah. 13Nyang lyis hank loq yah eq ma tanh, luk yah doeuh, nghuot ya lyei yah (nyo) baiq sat chah. Dius eq gaunyhauq eq shei chah. Lvbuh muot lyis dius jens boms mas dvyoh ni loh das, ge.

14Hauh thang lhyi Moshe ka hauh boms masyah gyoh loh las dius jens lyis paiq cho cicont kuot das nyhenshang taiq. Housoeh las nyamoq dyimis tsain cheih. 15Nyang dius jens lyis taiq, Somh vnyeih lyis cicont kuot geh. Hauh gyo lyis vmesbih yah vzomhgoh goh, ge.

16Somh vnyeih nvp lyis maujau jau, maunyoq nyik las hauh boms thoq mas jyommauh thoeu thoeu thuq los. Lvbuh thwe than nyings zis xauhgyo. Dius jens dvnganhmoq gyuk las nvn nyeis.17Moshe ka nyamoq lyis Mangso yah xauhgoh das xiklyis dvp masyah shwih thuq. Nyamoq eq boms khyei mha yap joq. 18Yhensain ka nyi yah Sina boms thoq mas gyoh los yvmvyah, hau dvboms gonh nyikhauh nhoenk toh. Hauh nyikhauh gas nyitsau mha nyikhauh teh nhoenk doq loh las dius jens dvnganh svsoh nvn nyeis. 19Hauh lvbuh thwe zes zes nyings los. Moshe dang jis lyis, Mangso ka nyang lyis maujau thwe yah phuk taiq. 20Yhensain ka Sina boms thyoh mas gyoh los las, Moshe lhyi hauh boms thyoh mas khi. Moshe eq houmha doq loh. 21Yhensain Moshe lhyi taiq, Dius jens ngos lyis yoeuh das ge vkyo mha ma lai bas jungh nyamoq lyis zaih nhang das zis gyoh loh aq. Nyamoq lai lyis nyoshoq shei das. 22Ngah jyank mas ni los dah phudyei bang yangh nyamoq nyang cheihshang chah, ma nghuot lyis ngos nyamoq lyis joeng das, ge.

23Moshe Yhensain lhyi taiq zis gas, Dius jens Sina boms mas ma yoh doq los das. Khasoeh ge lyis nvng ngamoq lyis hauh boms gyingshang yvlyis nghamh yoeuh aq, lho lhyi boms lhaink kyoq toh aq, ge tying toh, ge.

24Yhensain toeuh zis gas, Nvng gyoh loh las Aron lyis shwih doq los aq; nghuot laus eq phudyei bang yahge dius jens gas ngah jyank doq los das ge, vkyo mhayah ma gis lai wvng los; ma nghuot lyis gas ngos nyamoq lyis joeng das, ge. 25Housoeh las Moshe ka dius jens jyank mas gyoh loh las Yhensain taiq kat yvlyis taiq kyoh.

Ngochang Common Language Bible

© Bible Society of Myanmar 2010

More Info | Version Index