Search form

DYUNG 22

Khyauh Chah Lyi

1Dvyuk yuk noeu, yvng dvja ja khauh las, hauh yvlyis sat laus eq, ungh laus eq, noeu dvdoeu mas noeu oeng doeu, yvng dvdoeu mas yvng nyei doeu khyauh chah. 2-4Khauh soeu ka nyang khauh zis doms dyei chah. Nyang cha ma yoh lyis gas, nyang khauh loh vyhang xiklyis nyah gungs lyis jons khyvlyis ungh tyamp chah. Nyang khauh loh noeu, mauhlyihzoe, yvng cha nghuot nghuot nyang sain yvmas vdwis nyvng lyis gas, nyang dvdoeu mas aiq doeu khyauh chah.

Khauh soeu nyenh lyis yhen thyoq nyeis yvmas xauh nyhik las sat zis xauh laus eq sat soeu dius sat yobos ma bos. Nghuot laus eq nyeih lyis nghuot lyis gas nyang dius sat yobos bos.

5Dvyuk yuk nyah gaunyhauq lyis nyah yos mas, zvbiq khyam mha kat tsoh masyah whang loh las gohyuk dah yos mas, zvbiq khyam mha loh zo dyei lyis, gaunyhauq sain ka nyah yos, nyah khyam mha dah gis thank jyo cap chah.

6Dvyuk yuk nyah yos mas nyi ngheq las mhanh masyah gohyuk dah yos mas ngeh las gukyos, gukphu, guk dain mas ngeh loh lyis nyi ngheq kat soeu hau yuonh loh yvlyis cap chah.

7Dvyuk yuk nyah yhenkyoh jyank mas ngwis xing phauhdap vyhang tsomh toh nhang lha, tsomh dyei soeu yhen mhayah khauh thyuk lyis, khauh soeu lhyi nyvng lyis gas, khauh soeu aiq huon khyauh chah. 8Khauh soeu ma nyvng kat lyis gas, tsomh dyei soeu nyang, yhenkyoh dah zisyos ma yoeus cho, shvmanh dung joqyos mas kyamp xauh tang das.

9Noeu, mauhlyihzoe, yvng, dyimis teh zis yahge dyuk dah vyhang dvja ja bos dah zisyos kyahsoe cho mha xam ma xonhgoh cho dah soe khanghmuh gas tsomh dyei soeu yahge tsomh nhang soeu aiq yuk yah shvmanh dung joqyos mas jweh las yobos bos, ge thyet dyei zis xauh soeu ka thyi gohtoeu dvyuk lyis mon dah phauh mas aiq huon khyauh chah.

10Dvyuk yuk nyah yhenkyoh lyis, Bos yoeuh dyei aq, ge nyah mauhlyihzoe, noeu, yvng dvja ja tsomh nhang toh yvmas, shei laus eq, gudwvng laus eq, komp loh dyuk laus eq, houmha kanghjyoeng ma bos lyis gas, 11Tsomh dyei soeu ka, yhenkyoh dah gaunyhauq nyang ma yoeus cho Shvmanh dung joqyos mas kyamptang lyis gaunyhauq sain lhom yoeus chah. Tsomh dyei soeu eq ma cap noh. 12Nghuot laus eq hauh gaunyhauq khauh loh nghuot lyis gas nyang gaunyhauq sain lhyi khyauh chah. 13Yewus ngatzo nghuot lyis gas kanghjyoeng xiklyis shohkhyamh chi los chah. Ngatzo dah nyhenshang nyang ma khyauh noh.

14Dvyuk yuk yhenkyoh jyank masyah gaunyhauq nghoh las yhensain yah dvgeh ma nghuot uhlyis shei, nghuot ya gudwvng lyis gas, nyang khyauh chah. 15Nghuot laus eq gaunyhauq sain nyvng yvmas bweh lyis gas nghoh soeu ma cap noh. Noeu khoq nghuot lyis gas khoq phauh kyingh dvsang das.

Lomsnoq cho Lyi

16Dvyuk yuk gas hank ma kwank shih dah lonyi gyingh lyis chuq las nyang yah yhet lyis, nyang lyis phauh kat las yoeus nyang yoeus chah.17Nghuot laus eq nyah uwus ma dyeizo mes lyis gas lonyi phauh dyei chah nyhoq ngwis khyauh chah.

18Jonzwi vmesbih hank lyis laus eq sat chah.

19Gaunyhauq yah zomhgoh soeu hank lyis laus eq sat chah.

20Ngos Yhensain mha lai las gohtoeu mangso lhyi phudyei soeu ka shank shoq dyoqbis das.

21Namoq Egutu mas boengh duot ku yvlyis soh las boenghwus lyis vzaiq.22Chauhmuh chauhlo hank lyis eq vzaiq 23Nvng nyamoq lyis zaiq las nyamoq ngos lyis pangh aq ge lui lyis ngos Yhensain nyamoq dah dang gyo dyei das. 24Housoeh ngos nhaiqyo zis yah nvng lyis jes mas sat das. Namoq dah yhensain nyhiq jens chauhmuh muh las, namoq dah lo jens eq chauhlo duot das.

25Nvng ngah dius jens shohjyen bang lyis ngwis jyeih dyei lyis gas, ngwis jyeih zo soeu teh vkuot, ngwis lhyi vsang.26Nvng dvyuk yuk los tank toh dah shanhzoe lyis buis ma wvng shih lyis nyang lyis doms dyei chah.27Khasoeh ge lyis nyang wuot yhet das zis hou kyingh dvnghuot. Nyang cha wuot yhet das? Ngos gas nhaiqnyen soeu nghuot yvmvyah, nyang ngos lyis pangh aq ge dung lyis ngos gyo dyei das.

28Nvng Mangso lhyi goes vsang, nah dius dah uhshe soeu lhyi vnhoengh.

29Nah jyo, nah zvbiq yoh los lyis hou mhayah ngos lyis dyei aq.

Nah yukgis lomons ngos lyis dyei aq.

30Nah noeu eq yvng eq cangxeih suot zis ngos lyis dyei aq. Cangxeih suot dah vlus lyis nyah ungwes yah nyhet nyeih toh las, xet vnyeih lyis hauh zis ngos lyis los dyei aq.

31Namoq ngah gyingshang dius nghuot las, namoq gas yewus ngat sat shoh vzo goh, houka lvkhuih lyis doeuh dyei geh.

Ngochang Common Language Bible

© Bible Society of Myanmar 2010

More Info | Version Index