Search form

DYUNG 24

Thanghchvp Kyihau tap

1Yhensain Moshe lhyi taiq, Nvng yahge Aron, Nadab, Abihu moq yahge Israel jens dah uhshe bang nyhetci boms mas ngah jyank mas tsain doq los las, namoq we we dvnghuot shih lyis paiq gop joq bas jungh. 2Gohyhamh ma bos, nvng kyingh ngah jyank mas ni los aq. Dius jens gas boms mas yangh ma doq los bas jungh.

3Moshe gyoh los las Yhensain dah tying dang yahge nyang dyei lyi dvnganh dius jens lyis taiq kyoh. Dius jens dvnganhmoq eq, Yhensain taiq ya taiq zis ngamoq chank kuot das, ge xonh toeuh. 4Moshe ka Yhensain dah tying dang dvnganh lhaih toh. Nungsnvp noq yah boms khyei mha phon ci lha Israel dvci aiq nyau mas dvnyau mas dvkoeuq mulas luk dvci aiq lom cuk toh. 5Hauh thang lhyi nyang Israel wotyamh jens lyis nhang lha nyamoq gas Yhensain xiklyis ngheq dyei jyungshuk yahge nyenstap jyungshuk noeulu tsain phudyei. 6Moshe ka suih dvgohyih lyis khuq mas kat toh; dvgohyih lyis gas phon mha sanh gyuon. 7Hauh thang lhyi nyang hau Yhensain dah tying dang lhaih toh dah thanghchvp maussauh yoeus las moqphung lhyi thwe than than yah nghap kyoh. Nyamoq eq, Yhensain dah domsyos gyo das, nyang taiq ya taiq zis dvnganh kuot das, ge.

8Hauh thang lhyi Moshe ka hau khuq mas dah suih yoeus las dius jens lyis sanh gyuon. Nyang taiq zis gas, Haih suih gas Yhensain namoq lyis tying dang dyei uhlyis kuot toh dah thanghchvp lyis kyihau tap toh dah thanghchvp suih nghuot, ge.

9Moshe yahge Aron, Nadab, Abihu moq yahge Israel uhshe bang nyhetci boms mas tsain loh las, 10nyamoq gas Israel dah Mangso lhyi nyvng. Nyah khyei o mha maukhung lanh teh dah phauhdap saphira luk nyhoeuh toh. 11Mangso ka Israel zau jens lyis ma nos nhang; nyamoq eq Mangso lhyi nyvng las hauh thang lhyi nyamoq dvgeh zo shuk.

Moshe Sina Boms Mas

12Yhensain Moshe lhyi taiq zis gas, Hau boms mas ngah jyank doq los aq. Nvng heimha nyeis uhlyis ngos dius jens lyis taiq shet dah lyi lhaih toh dah luk lhyoq aiq koeuq ngos nvng lyis dyei das, ge. 13Moshe yahge nyah zainsthuk Yoshua sont las, Moshe ka Mangso dah gyingshang boms mas doq loh. 14Moshe uhshe bang lyis taiq zis gas, Ngah aiq yuk namoq jyank mas doms jweh lyih shoq hai thoenggus mas langh nyeis geh. Aron yahge Hur gas heimha namoq yah dvgeh nyeis las soe bos bang hank eq nyah aiq yuk jyank mas yoh e, ge.

15Moshe ka Sina boms mas doq loh; jyommauh eq hauh boms mas nhoenk toh. 16Yhensain dah phunk Sina boms mas bvng joq; jyommauh eq khyuk nyeih top nhoenk joq; nyhet vnyeih lyis nyang hau jyommauh khau mhayah Moshe lhyi lui. 17Yhensain dah phunk lyis Israel jens tsain nyvng, houka hauh boms thoq mas doedoe duk nyeis dah nyi teh bvng joq. 18Housoeh Moshe ka hau jyommauh khau mha wvng las boms mas doq loh. Moshe ka hauh boms thoq mas nyeici nyeih nyeici nyens nyeis.

Ngochang Common Language Bible

© Bible Society of Myanmar 2010

More Info | Version Index