Search form

DYUNG 28

Phudyei Shanhzoe

(Dyu 39:1-7)

1Ngos lyis phudyei bang teh phuqsoe das xiklyis nvng nah vmang Aron yahge nyah loloeu jens Nadab, Abihu, Eleaza, Ithama moq lyis Israel dius jens masyah nah jyank mas khyen khi yoeus aq. 2Nah vmang Aron nyoqnho ngelang yahge yungh cho bos das xiklyis nvng nyang lyis gyingshang dyimis kuot huot aq. 3Aron ngah xikkhonh mas phudyei muh yoh kuot das las, nyang lyis gyingshang nhang das xiklyis, ngos kank bos nhang zis xauh dah loqmuh dap bang dvnganh lyis nvng khi lha nyamoq lyis Aron dyimis kuot das cho taiq aq. 4Heika nyamoq kuot chah dah dyimis tsain nghuot: Sainhkhonh gos, ephod, shanhzoe, khohkat dyi, uhthop yahge dyichih tsain nghuot.Nah vmang Aron yahge nyah loloeu jens ngah xikkhonh mas phudyei muh wons nyeis das xiklyis, nyang yahge nyah lo jens lyis nyamoq gyingshang dyimis kuot dyei chah. 5Loqmuh dap bang gas xing, khying vlanh, nesnoq, vnes yahge jeiyhwiq seh tsain yhung das.

6Nyamoq gas hau ephod lyis xing yahge vlanh, nesnoq, nes dah jei yhwiq khying yah khoh daq kat bang yoq chah. 7Ephod tsoq das xiklyis dvshot dvjang masyah kvtoq twih aiq khvt bos chah. 8Xing, khying vlanh, nesnoq, vnes yahge jei yhwiq khying yah dyichih yungh dvkoeuq yoq las ephod mha tap las hau aiq koeuq gas dvkoeuq teh nghuot das. 9Nvng unuk luk aiq koeuq yoeus las Yakop lo jens dvci aiq yuk dah nyings lyis houmha thwang tap chah. 10Nyamoq dah nyenhkyi kuh masyah ngis vzoh yah luk dvkoeuq mas khyuk nyings, gohtoeu dvkoeuq mas eq khyuk nyings nghuot chah. 11Luk seq thwang soeu hau luk aiq koeuq mas Yakop lo jens dah nyings kyihau tap teh thwang tap las hauh yvlyis xing yah khomp toh chah. 12Hauh luk aiq koeuq lyis Yakop lo jens 12 nyau dah nyoqnyhank khyvlyis, ephod kvtoq twih mas tsain tap toh chah. Heisoeh Aron gas nyamoq dah nyings lyis nyah kvtoq aiq shot mas wons toh das. Housoeh ngos Yhensain ka ngah dius jens lyis vjangh soh nyeis das. 13Nvng xing khomp aiq koeuq kuot las, 14xing gyingh yah twih teh aiq khvt lhyent las hau xing khomp mas tap aq.

Sainhkhonh nghop chuq

(Dyu 39:8-21)

15Mangso dah ehnyet thyet yvmas yhung das xiklyis phudyei zainsmuh xiklyis sainhkhonh gos dvkoeuq kuot chah: houka ephod kuot teh hauh yvlyis xing, khying vlanh, nesnoq, vnes yahge khying yhwiq yah khoh kat yoq chah. 16Houka soehuqthunk kuot las aiq puk nghuot das: xing choeu loq 9 shih, khonh choeu loq 9 shih nghuot das. 17Houmha phauhdap luk nyei jens tap chah: cangxeih vjens mas pvtvmya, utapvya, myaq tsain nghuot das. 18Aiq vjens mas luknes, nila, sing; 19Somh vjens mas wakintu, mvhoya, thitun nila; 20nyei vjens mas myet-yweh, unuk, nvgvtweq nghuot das las, dvkoeuq dvkoeuq xing kyunk mas tap chah. 21Israel dvci aiq koq nghuot vgus, hau luk eq nyamoq nyings chank las dvci aiq nghuot chah. Kyihau thwang toh teh luk mas nyamoq dah nyings tsain thwang tap las, hau dvci aiq koq xiklyis nghap das. 22Sainhkhonh gos mas xing gyingh yah twih teh lhyent dah jvngchoh tsain kuot chah. 23Xing khwank aiq koeuq kuot las, hau sainhkhonh gos thoq pheh vthang mha dvshot dvkoeuq tap las, 24hau vkhwank aiq koeuq mas lhyent toh dah xing jvngchoh aiq koeuq tap chah. 25Hau jvngchoh aiq koeuq dah vthang lhyi hau xing kyunk aiq koeuq mas twih tap aq, housoeh ephod dah xik pheh kvtoq twih aiq koeuq mas dap joq chah. 26Nvng xing khwank aiq koeuq kuot las hau sainhkhonh gos ephod pheh tanh dah vkhau vthang aiq thunk mas tap toh chah. 27Xing khwank aiq koeuq kuot shih las, ephod xik pheh kvtoq twih vjang nvm yahge yoq dah dyichih yungh goq mas tsain tap toh chah. 28Sainhkhonh gos vkhwank aiq koeuq yahge ephod vkhwank aiq koeuq lyis xom lha, twih lanh yah twih toh lyis Sainhkhonh gos gas dyichih goq mas joq las ma shwe das.

29Aron gas hau gyingshang joqyos mas wvng uhlyis, nyang hai Israel jens dah nyings thwang tap toh dah sainhkhonh gos lyis wuot das, housoeh ngos, Yhensain ka ngah dius jens lyis vjangh soh das. 30Nvng hau sainhkhonh gos vkhau mha Urim yahge Thumim kat toh das; housoeh Aron gas ngah gyingshang joqyos mas wvng uhlyis, nyang hauh yvlyis wons toh das. Housoeh teh shishenh lyis nyang vjangh haih sainhkhonh gos wuot toh chah, housoeh lyis Israel dius jens xiklyis ngah ehnyet lyis yoh nghamh thyet das.

Gohtoeu Phudyei Dyixing

(Dyu 39:22-31)

31Ephod vkhau mha wuot dah shanhzoe lyis, sauhkhying lanh yah kuot chah. 32Hauh yvmas uhloms kat das xiklyis dyigop phank las ma juiq das xiklyis, yoq dah misseh yah dyigop kyet chah. 33-34Vlanh, nesnoq, vnes khying yah tvleh chvp teh vshiq kuot las shanhzoe dyithang chank yah lhangh toh. Hauh vjo mas xing jyoeu tsain tap. 35Aron gas phudyei muh kuot nyeis uhlyis hauh dyi wuot toh das: nyang gyingshang joqyos, ngah xikkhonh mas thuq wvng kuot uhlyis hau jyoeu nyings thwe xauhgyo das las nyang sat zis ma xauh das.

36Xing gyingh yah vlhyoq lainh dvkoeuq kuot las hauh thoq mas, Yhensain xiklyis gyingshang, oen thwang tap aq. 37Hauh yvlyis twih lanh yah uhthop dah ngelang pheh twih tap aq. 38Aron gas hauh yvlyis nyah ngelang mas tap toh das las, ngos Yhensain ka Israel jens dyei dah jyungshuk, dius jens dyei cho mha ma jus cho bos laus eq lhom yoeus dyei das.

39Aron xiklyis jeiyhwiq yah yoq dah dyi eq, misyhwiq yah kuot dah uhthop eq khohkat dyichih eq dvkhvt kuot dyei chah.

40Aron dah loloeu jens shop shop mus las yungh bas jungh, dyi eq, dyichih, uhthop eq tsain kuot dyei chah. 41Housoeh haih dyimis nah vmang Aron yahge nyah loloeu jens lyis huot aq. Hauh thang lhyi nyamoq ngah xikkhonh mas phudyei muh wons wuq nyeis das xiklyis, nyamoq lyis tsanlun coeu juot dyei geh. 42Nyamoq dah xoq zis ma thuq das xiklyis thyikdom masyah tanghbauh jweh dah misyhwiq lhuhkhyaq tsain kuot dyei chah. 43Aron yahge nyah loloeu jens shei zis ma xauh bas jungh, zvng mas wvng uhlyis eq, gyingshang joqyos mas phudyei muh kuot das zis phudyei phon mha loh uhlyis eq nyamoq hauh lhuhkhyaq wuot chah. Houka Aron yahge nyah diusjangh caiq dah vcaiq vto lyi nghuot.

Ngochang Common Language Bible

© Bible Society of Myanmar 2010

More Info | Version Index