Search form

DYUNG 33

Sina masyah Thuq lo Aq

1Yhensain Moshe lhyi taiq zis gas, Nvng yahge nvng Egutu masyah shwih los dius jens, hei mhayah thuq las, ngos Abraham, Isak, Yakop yahge nyamoq dah vnyau lyis dyei das oen dangthoengh toh mau pheh loh geh. 2Ngos nah xik mas loeuswons nhang lha, Khanan, Amori, Hiti, Perizi, Hiwi, Yebusi dius jens lyis khat tyamp das. 3Housoeh noeunauh yahge dyoyhei yaus mau mas namoq loh das: nghuot laus eq ngos namoq yah dvgeh ma loh. Khasoeh ge lyis namoq nhaiqlom than vnyau nghuot las, ngos namoq lyis cho mha zangh mhont das, ge.

4Dius jens hau loeus xauhgyo lyis kuk las, phauhdap luk yah shunk zis hank eq ma tsain chi. 5Yhensain Moshe lhyi taiq zis gas, Israel jens lyis heisoeh oen taiq aq: Namoq nhaiqlom than bang nghuot. Ngos namoq mas dvsoq jweh lyis yangh ngos namoq lyis tyeih tyeih thyuk das. Housoeh yvmvyah ngos nvng lyis khasoeh kuot das zis yoh seq bas jungh, nah phauhdap luk yah shunkzis shang tyamp aq, oen taiq aq, ge. 6Housoeh Israel jens gas Horeb boms jweh lyis nyamoq dah phauhdap luk yah shunk zis tsain shang tyamp.

Yhensain Nyeis dah Zvng

7Israel moq dvp thoeng khanghmuh, Moshe ka gyingshang zvng lyis yoeus las dvp nghe we we lo mas kuot lho lha Yhensain nyeis dah Zvng ge nyhink. Housoeh las Yhensain lhyi xo bang hank laus eq dvp nghe hau zvng mas tsain thuq e. 8Moshe hau zvng mas e loh khanghmuh, dius jens dvnganh toq yap las hank eq hank nyang zvng khomh masyah, Moshe zvng khau mha wvng loh shoq yoeuh nyeis. 9Moshe zvng khau mha wvng lyis, jyommauh punk gyoh los las zvng khomh mas no joq, las Yhensain jyommauh masyah Moshe yah jisgoh. 10Zvng khomhdwang mas jyommauh punk no joq yvlyis dius jens nyvng yah dvyih nyamoq dvnganhmoq paiq. 11Yhensain ka Moshe yah buisnoms jhent teh nhuottsuk jisgoh. Moshe ka dvp mas tauh wvng los; nghuot laus eq nyah phuqsoe soeu, Nun dah loloeu lo Yoshua gas hau zvng masyah ma thuq los lungh joq shih.

Yhensain Dangthoengh

12Moshe Yhensain lhyi taiq zis gas, Yoeuh aq, nvng ngos lyis, Haih dius jens lyis shwih loh aq, ge nghuot laus eq nvng ngos yah dvgeh hank lyis nhang zis ngos lyis ma taiq kyoh. Nghuot laus eq nvng ngos lyis seq toh, nvng ngos lyis nhaiqdoeus, ge. 13Housoeh las ngos nah xikkhonh mas nyoqnho yoh lyis gas, ngos nyoqnho yoh cho yoh seq shoq, nvng lyis eq ngos seq shoq nah cho ngos lyis chixoeuq aq: haih dius jens nah vnyau nghuot zis soh aq, ge.

14Yhensain ka, Ngos namoq yah dvgeh loh das, namoq lyis nhaiqtaink cho dyei das, ge.

15Moshe eq, Ngamoq yah dvgeh nvng ma loh lyis gas, ngamoq lyis hei mhayah vtoq nhang. 16Nvng ngamoq yah dvgeh ma loh lyis gas, Ngos yahge nah dius jens nah xikkhonh mas nyoqnho yoh zis hank khasoeh yoh seq das? Ngos yahge nah dius jens, nyeisjvng thoq dius jens dvnganh yah shaih das zis gas, nvng ngamoq yah dvgeh loh lyis dvyoh seq das ma nghuot lhyeh, ge.

17Yhensain Moshe lhyi taiq zis gas, Nvng sang khyvlyis ngos chank kuot das, khasoeh ge lyis ngos nvng lyis nah nyings masyah seq las, ngos nvng lyis nhaiqdoeus, ge.

18Moshe ka, Nah phunk ngos lyis jenh chixoeuq aq, ge.

19Yhensain ka, Ngah dah gis zis dvnganh nah xik mas lai xoeuq das, ngos Yhensain ngah nyings lyis hoeuh das las nvng xauhgyo das. Ngos jyehjuh chixoeuq mes soeu lhyi jyehjuh chixoeuq las, nhaiqnyen cho chixoeuq mes soeu lhyi nhaiqnyen cho chixoeuq das. 20Nghuot laus eq nvng ngah nyoqnho ma yoh nyvng; ngos lyis nyvng soeu ma yoh dwis nyeis. 21Yhensain taiq zis gas, Yoeuh aq, ngah nvm mas joqyos dvkoeuq joq, hau lukkhyung thoq mas nvng yap joq chah. 22Housoeh ngah phunk lai loh lyis, ngos nvng lyis lukjyvp mas kat toh las, ngos lai loh shoq nvng lyis ngah loq yah nghop toh das. 23Ngah loq she thang lhyi nvng ngah nunghkhung lhyi nyvng das, nvng ngah nyoqnho yoh nyvng das zis ma nghuot, ge.

Ngochang Common Language Bible

© Bible Society of Myanmar 2010

More Info | Version Index