Search form

DYUNG 35

No nyeih Lyi

1Moshe ka Israel jens moqhuom dvnganh khi huom las taiq zis gas, Haih zis gas namoq chank kuot das zis Yhensain tyingtoh dang nghuot. 2Namoq namoq nyang dah muh zwi das khyuk nyeih top yoh; nghuot laus eq nyhet vnyeih gas, namoq mas gyingshang nyeih, Yhensain xiklyis no nyeis das yhaugyen No Buisnyeis nghuot. Hauh nyeih mas muh zwi soeu ka shei chah. 3No Buisnyeis lyis namoq yhen mha nyi yangh yoh khat das zis ma nghuot, ge.

Gyingshang Zvng Vlu

(Dyu 25:1-9)

4Israel jens moqhuom dvnganh lyis Moshe taiq zis gas, Heika Yhensain tyingtoh dang nghuot. 5Yhensain xiklyis namoq mas dah vlu tsainh geh. Hank eq dyei mes ehnyet bos bang gas, Yhensain dah vlu ge, ngwis, xing, thunk; 6misyhwiq seh; sauhkhying vlanh, nesnoq, vnes; beq mauh yah kuot misseh; 7cauh nes dah yvnglus yeis; shohyeis yungh; akhesha saiq; 8nyituonh coeu; juot coeu yahge xangh coeu; 9unuk luk yahge phudyei zainsmuh dah ephod dyi yahge sainhkhonh nghop mas tap das dah phauhdap luk teh zis chi los geh.

Yhensain nyeis Zvng Kyahsoe

(Dyu 39:32-43)

10Namoq mas muh kuot lyes bang hank eq Yhensain taiq ya taiq toh vgus, 11zvng yahge nyah vnghop, nghweh, vkhomp, vkyank, zains, phangh lyis eq; 12Thanghchvp Kwi yahge nyah tanzoe aiq koeuq, hau kwi nghop, gosseh eq; 13Hau kihgus yahge nyah tanzoe, houyah sen dah kyahsoe dvnganh, Mangso xikkhonh mas dah ohlhyoq eq; 14Nyituonh gus yahge nyah kyahsoe, nyah nyitoengh yahge nyituonh coeu eq; 15Xangh phon yahge nyah tanzoe, juot coeu, xangh, zvng khomh mas dah gosseh eq; 16Ngheq phudyei das phon yah dvgeh thunk dvn-gya, nyah tanzoe yahge houyah sen kyahsoe dvnganh, jeislang yahge nyah khyei eq; 17khyamgos yahge nyah zains, nyah phangh, khyam khomh gos das gosseh eq; 18Zvng dah jywangh, khyam jywangh yahge nyah twih eq; 19phudyei bang gyingshang joqyos mas phuqsoe uhlyis bvng dyimis wuot chah, Aron yahge nyah loloeu jens wuot das gyingshang dyimis eq tsain kuot geh.

Zvng Vlu Chi Los

20Hauh uhlyis Israel jens moqhuom dvnganh Moshe xikkhonh masyah thuq loh. 21Vsainnyang ehnyet mas duon los soeu; dyei mes ehnyet bos bang dvnganh, hau Yhensain nyeis zvng kuot das xiklyis eq, houmha phuqsoe muh xiklyis eq, gyingshang dyimis kuot das xiklyis eq, Yhensain lhyi vlu chi los. 22Dyei mes ehnyet bos dah vbusbih vmesbih dvnganh, xing kyenh, nhodangh, loqkyop, ywi teh dah xing tsain chi los.Yhensain lhyi xing vlu dyei bang dvnganh jweh los. 23Vlanh, nesnoq, sauhkhying nes, misyhwiq seh, beqmauh seh, vnes cauh dah yvnglus yeis, shohyeis yungh yoh bang eq chi los. 24Ngwis yahge thunk vlu dyei bang eq, Yhensain jyank hau vlu chi los. Muh mas yhung das zis akhesha saiq yoh bang hank eq hauh zis chi los. 25Khying ba lyes dah vmesbih jens dvnganh eq nyamoq loq yah duis dah sauhkhying vlanh, nesnoq, vnes yahge jyuhmahsen khying yungh chi los 26Nyamoq gas beqmauh yah eq khying duis. 27Uhshe bang eq, ephod yahge sainhkhonh gos mas khop das unuk luk yahge gohtoeu phauhdap luk chi los. 28Nyamoq gas nghamh shom, nyi tuonh das coeu, juot das coeu, xangh coeu eq tsain chi los. 29Israel jens mas dyei mes ehnyet duon los dah vbusbih, vmesbih dvnganh gas Yhensain Moshe lhyi taiq kat muh xiklyis, Yhensain lhyi vlu los dyei.

Muh zwi bang Yhensain Zvng kuot

(Dyu 31:1-11)

30Tsai, Moshe Israel jens lyis taiq zis gas, Gyo geh, Yhensain ka Yuda vkoq mas Uri lo, Hur nyeilo Bezale lyis nyings yoeus las muh mas kat toh. 31Nyang lyis Mangso dah dyos yah tyink dyei las lyes cho, yik cho, loqmuh ja khanghmuh mas seq cho tyink dyei las, 32ngwis, xing, thunk shonh yvmas vzwvng vkhyoh seq toeuq, 33luk swih las xiq dah muh, saiq thwang muh, loqmuh ja khanghmuh nyhenshang nghuot. 34Yhensain ka nyang yahge Dan vkoq mas Ahisamak lo Oholiab lyis gohyuk lyis loqmuh yoh jyauh das xiklyis so dah joeui kat dyei goeus. 35Nyah zomh gas thwang tap muh, phauhdap soehfuh muh, jyuhmahsen yungh; sauhkhying vlanh, nesnoq, vnes seh yahge gohtoeu khoh kat bang nghuot. Nyah zomh gas muh vja ja seq, phauhdap, yungh khyvlyis seq kuot das nyhenshang Mangso yah lyes cho kat dyei zis xauh bang nghuot.

Ngochang Common Language Bible

© Bible Society of Myanmar 2010

More Info | Version Index