Search form

DYUNG 38

Phudyei Phon Kuot

(Dyu 27:1-8)

1Tsai nyang akhesha saiq yah ngheq phudyei das phon eq kuot. Hauh xing choeu 7 pe dvkhyamh, khonh choeu 7 pe dvkhyamh mulas soefuqthunk kuot: Nyhang choeu 4 pe dvkhyamh nghuot. 2Hau nyei thunk mas khyau eq tap: hau khyau ka phon yah dvgungs teh kuot toh; nyang hauh yvlyis thunk yah tsain kyop toh. 3Phon yah sen dah auh, tsohthauh, khuq, shohzvp, nyi auh dvnganh lyis thunk yah kuot. 4Thunk dvn-gya kuot las phon lvt vjeis mas toh. 5Tanzoe jauh das xiklyis hau dvn-gya nyei thunk mas tap das zis thunk vkhwank nyei koeuq kuot. 6Nyang tanzoe dvzomh lyis akhesha saiq yah kuot las thunk kyop. 7Phon dvng das xiklyis thyishot haqshot vkhwank mas hau tanzoe dvzomh jauh toh. Nyang hau phon lhyi saiq yah kuot las vkhau khungh.

Thunk Jeislang Kuot

(Dyu 30:18)

8Nyang Yhensain nyeis dah moq zvng khomh mas los gyangh phuqsoe nyeis vmesbih jens dah thunk bvngtoenk yoeus las jeislang yahge nyah khyei kuot.

Yhensain Nyeis Zvng Khyam kuot

(Dyu 27:9-19)

9Nyang Yhensain nyeis dah zvng khyam eq kuot. Mautyi shot pheh, misyhwiq seh yah 50 gaiq xing dah khyam gos dvkoeuq kuot. 10Nyang hau zains aiqci yahge phangh aiqci lhyi thunk yah kuot las nghweh yahge zains kweh gas ngwis yah kuot. 11Mautsung shot pheh eq 50 gaiq xing dah khyam gos mas zains aiqci, nyah phangh aiqci lhyi thunk yah kuot las nghweh yahge zains kweh lyis gas ngwis yah kuot. 12Buiswvng shot dah khyam gos gas 25 gaiq xing lha, zains dvci, nyah phangh dvci kuot: zains nghweh yahge kweh gas ngwis yah kuot. 13Buisthuq shot pheh ganthoq khyam eq 25 gaiq nghuot. 14-15Khyam khomh dah gohtoeu dvshot xiklyis khyam gos gas 7 gaiq dvkhyamh xing lha zains somh lom, phangh somh koeuq nghuot. 16Khyam goms shoq dah khyam gos dvnganh gas misyhwiq seh nghuot. 17Zains dah phangh gas thunk, nghweh yahge kweh gas ngwis yah kuot: zains dah vthyoh mha ngwis yah kyop: khyam zains dvnganh lyis ngwis kweh kat toh. 18khyam khomh gosseh gas misyhwiq seh nghuot las, sauhkhying vlanh, nesnoq, vnes yah thauh saiq toh: hauh xing choeu dvci gaiq, nyhang choeu gohtoeu khyam gosseh yah dvyih, 2 gaiq dvkhyamh nghuot. 19Hauh xiklyis zains nyei koeuq, thunk phangh nyei koeuq, nghweh eq ngwis yah, zains thyoh kyop yahge zains kweh ngwis nghuot. 20Zvng khyam yahge Zvng dah jywangh dvnganh thunk nghuot.

Yhensain Zvng mas Kyahsoe

21Haih zis gas tyingtoh lyi 10 lhaih toh dah luklhywaq aiq koeuq joq dah Yhensain Nyeis dah Zvng tsuk yvmas yhung dah kyahsoe comh cho nghuot. Haih comh cho lhyi Moshe taiq toh khyvlyis, phudyei Aron lo Ithama shwih uhshe lha Lewi jens tsain chank kuot.

22Yhensain Moshe lhyi yah taiq ya taiq toh zis dvnganh lyis Yuda vkoq mas dah Hur nyeilo, Uri lo Bezele kuot. 23Nyang lyis pangh soeu, Dan vkoq mas Ahisamak lo Oholiab gas luk mas thwang tap, loqmuh dap las; vlanh, nesnoq, vnes sauhkhying yah lhyent goeus jyuhmahsen khying yungh gan mas khoh seq kat soeu nghuot.

24Hau gyingshang joqyos dah muh dvnganh xiklyis thank dah xing, lyi jus jvng khyvlyis 2,195 paung nghuot. 25Moqphung nyings mas bos bang dyei dah ngwis dvnganh, hau gyingshang joqyos jvng khyvlyis 7,550 paung nghuot.26Nyings bos bang aiqci zvn masyah thoq pheh bang dvnganh 603,550 nghuot zis yah dvyhangteh, nyamoq dvyuk dvyuk dyei zis gas lyi jus jvng khyvlyis laiq las sang nyhoq dyei.27Gyingshang zvng dah phangh yahge gosseh dah phangh shonh das xiklyis ngwis 7,500 paung wvng: phangh dvkoeuq mas ngwis 75 paung wvng las phangh dvxo nghuot. 28Bezalel gas zains dah nghweh yahge zains thyoh kyop las hauh yvlyis kweh kat das nyhenshang ngwis 50 paung yhung. 29Thunk vlu gas 5,310 paung nghuot. 30Thunk hauh zis yah Yhensain nyeis dah zvng khomh dah phangh, phon, dvn-gya yahge phon yah sen zis dvnganh, 31Khyam yvmlhaink phangh, khyam khomh phangh, zvng jywangh dvnganh, khyam yvmlhaink dah jywangh dvnganh lyis kuot.

Ngochang Common Language Bible

© Bible Society of Myanmar 2010

More Info | Version Index