Search form

DYUNG 39

Phudyei Thau Ba

(Dyu 28:1-14)

1Tsai, nyamoq gas Yhensain Moshe lhyi taiq toh vgus, hau gyingshang joqyos mas phudyei bang phuqsoe lhyi wuot das zis, phauhdap dyimis eq, Aron wuot das gyingshang dyimis eq, vlanh, nesnoq, nes dah sauhkhying yah tsain kuot.

2Nyamoq ephod lyis xing khying, vlanh, nesnoq, nes dah sauhkhying yahge jyuhmahsen khying yungh yah kuot. 3Xing lhyi bat lhywa lho lha khying teh gom yoeus las jyuhmahsen seh mas vlanh, nesnoq, nes sauhkhying yah thauh tap.

4Tsoq das xiklyis vyvm aiq shot mas kvtoq twih aiq khvt kuot. 5Yhensain Moshe lhyi taiq toh vgus, dvyhangteh dah khying yah yungh yungh yoq toh dyichih lyis ephod yah dvkoeuq teh chop tap. 6Nyamoq hau unuk luk aiq koeuq lyis yungh shoq kuot las kyihau mha tap teh, Yakop lo jens 12 yuk dah nyings thwang tap las xing kyunk mas kat. 7Yhensain Moshe lhyi taiq toh vgus, hau luk aiq koeuq lyis ephod dah kvtoq twih mas tap. Houka Israel vnyau 12 koq dah gungsthaiq nghuot.

Sainhkhonh Gos Kuot

(Dyu 28:15-30)

8Nyamoq ephod kuot yvmas yhung dah misseh ja, khying ja yah dvyhangteh dah khoh thauh tap las sainhkhonh gos lyis kuot. 9Houka soefuqthunk nghuot. Vtsung loq 9 shih, khonh choeu loq 9 shih nghuot las, hau sainhkhonh gos gas aiq puk nghuot. 10Houmha phauhdap luk nyei jens dungh toh: cangxeih vjens mas pvtvmya, utapvya, myaq. 11Aiq vjens mas luknes, nila, sing. 12Somh vjens mas wakintu, mvhoya, thitun nila, 13Nyei vjens mas myet-yweh, unuk, nvgvtweq nghuot: dvkoeuq dvkoeuq xing kyunk mas tap toh. 14Yakop lo jens dvci aiq koq nghuot vgus, hau luk eq nyamoq dah nyings chank las dvci aiq nghuot. Kyihau thwang toh teh nyang koeuq nyang nyings dap las Yakop lo dvci aiq koq dah gungsthaiq nghuot. 15Sainhkhonh gos mas xing gyingh yah twih teh lhyent dah jvngchoh tsain tap. 16Nyamoq xing kyunk aiq koeuq, xing khwank aiq koeuq kuot las, hau vkhwank lyis sainhkhonh gos nyhang pheh aiq thunk mas tsain tap. 17Hau xing jvngchoh aiq koeuq lyis xing khwank aiq koeuq mas tsain twih toh. 18Hau jvngchoh vthang lhyi xing kyunk mas twih toh gvng mas hau jvngchoh gas xik mas dah ephod kvtoq twih mas tap toh goeus. 19Tsai, nyamoq xing gyingh yah vkhwank aiq koeuq kuot las hau sainhkhonh gos aiq puk mas ephod pheh tanh dah vkhau vpuk vthang aiq thunk mas tap. 20Tsai xing yah gohtoeu vkhwank aiq koeuq kuot las, xik mas dah ephod kvtoq twih 2 koeuq dah vthang, hau yungh yungh yoq dah dyichih dah goq mas chopjang vnvm mas tsain tap. 21Housoeh Yhensain Moshe lhyi taiq toh vgus, sainhkhonh gos vkhwank yahge ephod vkhwank lyis twih vlanh yah twih toh: sainhkhonh gos gas yungh yungh yoq dah dyichih goq mas joq las sainhkhonh gos yahge ephod ma gang loh das xiklyis nghuot.

Gohtoeu Phudyei Thau Ba

(Dyu 28:31-43)

22Hau ephod yah sen dah shanhzoe lhyi sauhkhying lanh yah yoq dah misseh yah kyingh dvkuot. 23Houmha dyigop phank las ma juiq loh das xiklyis yoq dah misseh yah kyet toh. 24-26Hau shanhzoe dyithang chank yah jyuhmahsen khying yungh yahge sauhkhying vlanh, nesnoq, vnes yah tvleh chvp kuot tap toh, Xing gyingh yah jyoeu kuot las, tvleh chvp jo mas jyoeu kat las tvleh dvchvp, jyoeu dvlom yvmlhaink tap. Houka Yhensain Moshe lhyi taiq toh vgus nghuot.

27Tsai, Aron yahge nyah loloeu jens xiklyis, yoq dah misyhwiq seh yah dyi chop. 28Uhthop eq, uhkyop yungh eq, lhuhkhyaq eq misyhwiq seh yah chop. 29Misyhwiq seh mas sauhkhying vlanh, nesnoq, vnes thauh tap las dyichih eq kuot dyei. Houka Yhensain Moshe lhyi taiq toh vgus nghuot. 30Xing gyingh yah vlhyoq lainh dvkoeuq kuot las Yhensain xiklyis gyingshang, ge thwang tap toh. 31Hauh yvlyis mislanh seh mas tap las uhthop mas twih tap toh: houka Yhensain Moshe lhyi taiq toh vgus nghuot.

Muh tyeh Cho

(Dyu 35:10-19)

32Housoeh Yhensain Moshe lhyi taiq toh vgus Israel jens kuot las hau Yhensain nyeis dah zvng yah sen muh dvnganh dye kuot. 33Israel jens gas hau zvng yahge nyah vnghop, houyah sen kyahsoe dvnganh, nghweh, vkhomp, vkyank, zains, phangh; 34vnes cauh toh dah yvnglus yeis nghop, shohyeis yungh nghop, vkhau mha gos das gosseh; 35Thanghchvp Kwi yahge nyah tanzoe, kwi nghop; 36kihgus yahge houyah sen dah kyahsoe dvnganh, Mangso xikkhonh mas dah ohlhyoq; 37xing gyingh yah kuot nyituonh gus yahge nyah nyitoengh yahge houyah sen dah kyahsoe dvnganh, nyituonh coeu; 38Xing phon, juot coeu, xangh, zvng khomh mas dah gosseh; 39thunk phon, thunk dvn-gya, nyah tanzoe yahge houyah sen kyahsoe dvnganh, jeislang yahge nyah khyei; 40khyamgos yahge nyah zains, nyah phangh, khyam khomh gos das gosseh yahge nyah twih, jywangh yahge zvng mas yhung dah kyahsoe dvnganh; 41Gyingshang joqyos mas phuqsoe lhyi wuot das phauh dah dyimis phudyei soeu Aron yahge nyah loloeu jens phuqsoe muh kuot lyis wuot das gyingshang dyimis, 42Yhensain Moshe lhyi taiq toh vgus, Israel jens dye kuot las Moshe jyank mas tsain chi los. 43Hau muh dvnganh lyis Moshe yoeuh las Yhensain taiq toh zis yah dvyhangteh nyamoq dye kuot goeus yvlyis nyvng. Housoeh las Moshe nyamoq lyis shvmanh dyei.

Ngochang Common Language Bible

© Bible Society of Myanmar 2010

More Info | Version Index