Search form

DYUNG 40

Yhensain Zvng Wvng

1Yhensain Moshe lhyi taiq zis gas, 2Nvng cangxeih vkhyvp, cangxeih vnyeih lyis hau Yhensain nyeis dah zvng toeutsung chah. 3Nvng hau zvng khau mha tyingtoh lyi dvci bos dah Thanghchvp Kwi kat las gosseh yah gos toh chah. 4Kihgus lyis kat las houmha kih toh das kyahsoe kih toh chah. Hau nyituonh gus eq kat las nyitoengh eq tsain tuonh toh chah. 5Xangh ngheq dah xing phon lyis eq Thanghchvp Kwi xik mas toh las, zvng khomh mas khomh gosseh kat toh chah. 6Nvng ngheq dyei phon lyis eq zvng xikkhonh mas toh chah. 7Hau jeislang lyis eq zvng yahge phon jo mas toh las jeis kham kat chah. 8Hau yvmlhaink yah khyamgos toeutsung lha, khyam khomh mas gosseh lhangh toh chah.

9Nvng juot das gyingshang coeu yoeus las zvng yahge houmha bos kyahsoe dvnganh lyis juot zis yah zvng wvng aq. Housoeh hauh zis dvnganh gas gyingshang joq das. 10Ngheq dyei phon yahge nyah kyahsoe dvnganh lyis eq juot zis yah cheihshang lha, hau phon ka gyingshang thank phon nghuot das. 11Jeislang yahge nyah khyei lhyi eq juot las cheihshang chah.

12Aron yahge nyah loloeu jens lyis zvng khomh pheh shwih Los las gungs cheih nhang aq. 13Aron lyis hau gyingshang dyimis gvmhuot las, ngah xikkhonh mas phudyei muh wonswuq das xiklyis, nyang lyis coeu juot zis yah cheihshang chah. 14Nyah loloeu jens lyis shwih yoeus las, dyimis tsain huot lho lha, 15Ngah xikkhonh mas phudyei muh yoh wons wuq nyeis das xiklyis, nyamoq dah uwus lyis juot dyei teh nyamoq lyis eq coeu juot dyei chah: nyamoq lyis coeu juot cho ka namoq lo jens vcaiq caiq vjangh yoh phudyei das gyamh huon cho nghuot, ge.

16Moshe Yhensain nyang lyis taiq ya taiq toh vgus kuot. 17Housoeh nyamoq Egutu masyah los aiq vzvn, cangxeih vkhyvp, cangxeih vnyeih lyis Moshe ka hau Yhensain nyeis dah zvng toeutsung. 18Moshe zvng toeutsung lhyi, phangh kat, vkhomp tsuk, vkyank kat zis yah zains tsain toeutsung. 19Hau zvng thoq mas zvng mau las, hauh thoq mas vnghop yah nghop. Houka Yhensain Moshe lhyi taiq toh vgus nghuot. 20Hau luk aiq lhywaq lyis Thanghchvp Kwi mha yoeus kat, kwi vkhwank mas tanzoe jauh lho lha kwi nghop nghop. 21Hauh kwi lhyi zvng khau mha kat las, hau Thanghchvp Kwi lhyi gos toh das xiklyis gosseh kat toh. Houka Yhensain Moshe lhyi taiq toh vgus nghuot.

22Nyang Kihgus lyis zvng khau mautsung shot pheh Thanghchvp Kwi lyis gosseh dah nghe pheh toh. 23Kihgus mas Yhensain lhyi phudyei ohlhyoq kih toh. Houka Yhensain Moshe lhyi taiq toh vgus nghuot. 24Nyang nyituonh gus lyis zvng khau, mautyi shot, kihgus twi twi mha toh. 25Yhensain xikkhonh mas nyang nyitoengh tsain tuonh toh. Houka Yhensain Moshe lhyi taiq toh vgus nghuot. 26Nyang xing phon lyis zvng khau, gosseh dah xik mas toh las, 27hau phon mha nghamh shom xangh ngheq. Houka Yhensain Moshe lhyi taiq toh vgus nghuot. 28Nyang zvng dah khomh mas gosseh lhangh las, 29hau gosseh xik mas ngheq phudyei phon toh. Hau mha nyang gas ngheq phudyei lyis eq, zonoms phudyei lyis eq phudyei. Houka Yhensain Moshe lhyi taiq toh vgus nghuot. 30Jeislang lyis zvng yah phon jo mas toh las cheih das xiklyis houmha jeis tyink toh. 31Moshe, Aron yahge Aron dah loloeu jens houmha khyei loq tsain cheih. 32Nyamoq zvng khau mha wvng das lyis, phon mha loh das lyis tsain cheih. Houka Yhensain Moshe lhyi taiq toh vgus nghuot. 33Zvng yahge phon yvmlhaink yah khyam toeutsung lha, khyam khomh mas khomh gosseh lhangh toh. Housoeh Moshe hauh muh dye.

Zvng thoq mas Jyommauh

(Gyu 9:15-23)

34Hauh uhlyis jyommauh gas zvng lyis nghop las Yhensain dah phunk gas houmha dyingh joq. 35Hauh gvng masyah Moshe zvng khau mha ma gis wvng loh. 36Israel jens dah gyung cho gonh mas zvng masyah jyommauh yop loh lyis, Israel jens suh e das cho pheh dvtsain suh e. 37Jyommauh ma yoeus tyamp lyis gas, yoeus tyamp buisnyeis jweh shoq ma suh e, tsain nyeis. 38Khasoeh ge lyis Israel jens suh e gyung dvcho gonh mas, nyamoq dvnganhmoq xikkhonh mas nyeih lyis Yhensain jyommauh gas zvng lyis nghop, las nyenh lyis nyi bvng joq.

Ngochang Common Language Bible

© Bible Society of Myanmar 2010

More Info | Version Index