Search form

DYUNG 5

Moshe Aron Pharao Xik mas

1Moshe yahge Aron Pharao jyank mas wvng taiq zis gas, Yhensain, Israel dah Mangso taiq nyeis: Ngah dius jens mhanhdyvp mas ngah xiklyis pwe loh yoh kuot bas jungh, nyamoq lyis nhang kat aq ge, ge.

2Pharao taiq zis gas, Yhensain dah dang gyo las ngos Israel lyis kat kat das zis gas hauh Yhensain ka hank nghuot? Ngos Yhensain lhyi ma seq, Israel lyis eq ma kat kat, ge.

3Tsai, nyah zomh gas, Hebre dius dah Mangso ka ngah zomh yah xauhgoh goeus. Housoeh las nyang ngamoq lyis yomh yah, sham yah ma sat bas jungh, somh nyeih cho mhanhdyvp mas ngamoq dah Yhensain Mangso lhyi loh yoh phudyei das toeuh dyei aq, ge.

4Egutu hwankti nyah zomh lyis taiq zis gas, Moshe yahge Aron eh, nah zomh haih dius jens lyis nyamoq muh masyah chamus she loh goh? Nah zomh dah muh loh zwi geh, ge. 5Pharao taiq shih zis gas, Yoeuh aq, Gvshih haih dius jens gas haih mau mas nyoshoq nyeis, nah zomh gas nyamoq lyis nyamoq muh masyah no nhang nyvng! ge.

6Pharao gas hauh nyeih masyah hauh dius jens lyis gungh bang yahge nyamoq dah uhshe bang lyis vmingh dyei las, 7Jyenhchvp phot yvmas namoq vkhang dyei nyeis dah huhyau vdyei lo. Nyamoq xiklyis huhyau nyamoq nyang xo yoeus bas jungh. 8Jyenhchvp gas vkhang nyhoq vgus kuot nhang chah; hou mhayah ma yoh yoms: Nyamoq lan las, nyamoq gas, Ngamoq dah Mangso lhyi loh phudyei bah, ge kaiq. 9Housoeh las nyamoq dah vbusbih jens lyis muh lhungh dyei geh nyamoq muh changh las nyamoq dah hwah dang gyo nyeis das shishenh ma bos lo das, ge.

10Dius jens dah lvgungh jens yahge Israel dah uhshe bang eq thuq e lha, Pharao heisoeh ge: Ngos namoq lyis huhyau ma dyei lo. 11Huhyau khalhye joq zis namoq nyang xo yoeus geh: nghuot laus eq namoq dah muh gas ma yoh yoms ge, ge Israel jens lyis taiq. 12Housoeh yvmvyah dius jens gas Egutu dvmau gonh huhyau xo yenh. 13Lvgungh jens eq dvnyeih dvnyeih huhyau dyei yoq lyis dye nyhoq dye shoq kuot geh, ge chank gungh yenh. 14Pharao dah lvgungh jens kat toh dah Israel uhshe bang lyis eq Vkhang vgus, nyinaq eq, khvnyhik eq jyenhchvp kuot muh chamus ma tyeh kuot goh? ge nyei zis yah tsain bat.

15Housoeh las Israel uhshe bang gas Pharao jyank wvng las, Nah jyeidwis jens lyis chamus heisoeh kuot? 16Ngamoq lyis huhyau gas ma dyei zis jyenhchvp kuot geh ge gungh. Yoeuh aq, ngamoq bat zis xauh, hauh zis nvng mas yvwons bos, ge.

17Nghuot laus eq hwankti ka, namoq lan, svsoh lan yvmvyah namoq gas, Yhensain lhyi loh phudyei goh, ge. 18Housoeh las gvshih muh loh zwi geh, huhyau gas ma dyei, nghuot laus eq jyenhchvp gas vkhang vgus dyei chah, ge kat. 19Housoeh nyeih yau nyeih kuot dah jyenhchvp vgus gas ma yoh yoms ge kat las Israel jens dah uhshe bang gas nyamoq mas shanghsenh zainsmuh jweh goeus yvlyis soh.

20Nyamoq Pharao jyank masyah thuq los lyis cho mha tsain langh nyeis, Moshe yahge Aron yah xauhgoh. 21Nyamoq taiq zis gas, Pharao yahge nyah jyeidwis jens yah ngamoq lyis hoeng nhang gvng mas Yhensain ka nah aiq yuk cha kuot yvlyis nyvng las soetuon bas jungh. Nah aiq yuk gas nyamoq ngamoq lyis sat das zis nyamoq loq mas moengsa dyei, ge.

Moshe Yhensain lhyi Lop

22Housoeh yvmvyah Moshe ka Yhensain jyank mas loh las, Yhensain eh, nvng haih dius jens lyis chamus yau nhang? Ngos lyis eq chamus nhang kat? 23Ngos nah xiklyis Pharao jyank mas wvng jis masyah nyang haih dius jens lyis shoeuhshih nyeis. Nvng nah dius jens lyis khyuot zis ma nghuot, ge.

Ngochang Common Language Bible

© Bible Society of Myanmar 2010

More Info | Version Index