Search form

DYUNG 8

Puh

1Hauh thang lhyi Yhensain Moshe lhyi taiq zis gas, Pharao jyank mas loh las, Yhensain heisoeh ge, oen taiq aq: Ngah dius jens ngos lyis loh yoh paiq bas jungh, nyamoq lyis nhang kat aq. 2Nvng ma nhang kat ge ngoek lyis gas, ngos nah mau gonh lyis puh yah yaudyei das. 3Hau jeis masyah puh vbomsdom duon thuq los das, houka nah yhen, nah yhetyos, nah yhet yvp, nah zau jens yhen, nah dius jyank mas, nah tsau mha, nah ohlhyoq piq auh mas tsain doq los das. 4Hauh puh gas, nah jyank mas, nah dius jyank mas nah zau jens dvnganhmoq jyank mas doq los das ge, ge.

5Yhensain Moshe lhyi taiq zis gas, Aron lyis taiq aq, Egutu mau mas puh toq kat das zis nah loq toeu lha, nah lhamloq lyis jeismuh lvng, jeislo lvng, thomh thoq mas toeu aq, ge. 6Housoeh las Aron gas Egutu mau gonh dah jeis thoq mas nyah loq toeu lhyi puh doq los zis yah Egutu mau gonh nywangh loh. 7Hweq kat bang eq nyamoq dah hweq yah housoeh kuot las Egutu mau mas puh tsain toq kat.

8Pharao gas Moshe yahge Aron lyis khi lha, Yhensain lhyi ngos yahge ngah mau bang jyank masyah puh shung tyamp dyei das xiklyis dung dyei geh; nah dius jens gas Yhensain lhyi phudyei das xiklyis ngos nyamoq lyis nhang kat das, ge.

9Moshe Pharao lyis taiq zis gas, Nvng yahge nah yhenbang jyank masyah puh shung tyamp las Nile lvng mas kyingh dvnyet joq shoq ngos nvng yahge nah zau jens, nah dius jens xiklyis dung dyei das shishenh nvng thyet aq, ge.

10Hwankti ka, Nvpyo nghuot bas jungh, ge.

Moshe eq, Ngamoq dah Yhensain Mangso teh dah Mangso ma bos zis gas nvng yoh seq das xiklyis nah dang yah dvyhangteh nghuot das. 11Puh gas nvng yahge nah yhen mhayah eq, nah zau jens yahge nah dius jens masyah eq thuq loh das, hauh Nile lvng mas kyingh dvnyet joq lo das, ge. 12Hauh thang lhyi Moshe yahge Aron gas Pharao jyank masyah thuq las Yhensain ka Pharao thoq mas toq toh dah puh yoeus tyamp das xiklyis Moshe ka Yhensain jyank mas dung dyei. 13Yhensain eq Moshe dung zis yah dvyhangteh kuot dyei las, hau puh gas yhen, yhen khyam, pa mha zis eq shei. 14Nyamoq hauh puh lyis tsain kui boms toh las, dvmau gonh bop nvm. 15Pharao gas puh shei zis nyvng lyis, Yhensain taiq vgus nyah nhaiqlom doms than lha nyah zomh dang ma gyo dyei.

Tyop

16Hauh thang lhyi Yhensain Moshe lhyi taiq zis gas, Aron lyis nah lhamloq toeu lha nyeis mas tsohmop lyis lyuk aq, houka Egutu mau gonh tsohmop gas tyop bweh das oen taiq aq, ge. 17Housoeh las Aron gas nyah lhamloq yah nyeis mas tsohmop lyis housoeh Egutu mau gonh dah tsohmop gas tyop bweh los las, dius jens yahge gaunyhauq thoq mas nghop tyamp. 18Hweq kat bang eq nyamoq hweq yah tyop bweh nhang das ge yomkat laus eq ma yoh kuot. Housoeh dius mas eq, gaunyhauq mas eq tyop kyingh nghuot joq. 19Hweq kat bang Pharao lyis taiq zis gas, Heika Mangso kuot zis nghuot, ge. Nghuot laus eq Yhensain taiq vgus Pharao nhaiqlom than lha nyah zomh dang ma gyo dyei.

Yvngkhungh

20Yhensain Moshe lhyi taiq zis gas, Nvpyo noq yah toq las jeislvng pheh e loh dah Pharao xikkhonh mas loh yap las, Yhensain heisoeh ge: Ngah dius jens ngos lyis loh yoh phudyei bas jungh, nyamoq lyis nhang aq. 21Nvng ngah dius jens lyis ma nhang kat lyis gas, ngos nah jyank mas, nah zau jens, nah dius jens jyank mas yvngkhungh nhang kat das. Housoeh Egutu bang dah yhen mha yvngkhungh yah dyingh joq das. Nyeisjvng mas hauh zis yah nghop joq das. 22Ngos Yhensain, haih mau mas muh zwi nyeis zis nvng seq das xiklyis hauh nyeih lyis ngah dius jens nyeis dah Goshen lhyi lhuiq toh las, houmha yvngkhungh ma nyeis das. 23Housoeh ngos ngah dius yahge nah dius jo mas kyoq toh das. Haih yomsoq muh nvpyo bweh los das, oen taiq aq, ge. 24Yhensain ka Pharao yhen mha, nyah zau jens yhen mha yvngkhungh vbomsdom nhang kat. Egutu mau gonh gas hauh yvngkhungh gvng mas yonh loh.

25Pharao Moshe yahge Aron lyis khi lha taiq zis gas, Haih mau khau mha namoq dah Mangso lhyi loh phudyei geh, ge.

26Moshe taiq zis gas, Housoeh ma gis das; Housoeh kuot lyis Egutu bang choqh ja ngamoq dah Yhensain Mangso lhyi ngheq dyei das; Egutu bang choqh ja nyamoq xikkhonh mas ngheq dyei lyis nyamoq ngamoq lyis luk yah doeuh sat das. 27Housoeh las somh nyeih cho mhanhdyvp mas Yhensain, ngamoq dah Mangso lhyi nyang ngamoq lyis taiq teh loh phudyei chah, ge.

28Pharao taiq zis gas, Yhensain, namoq dah Mangso lhyi mhanhdyvp mas loh phudyei das zis, ngos namoq lyis nhang kat das: nghuot laus eq we we ma yoh loh; ngah xiklyis shangphu dyei aq, ge.

29Moshe taiq zis gas, Ngos nah jyank masyah thuq yah dvyih Pharao yahge nyah zau jens, nyah dius jens jyank masyah nvpyo yvngkhungh dyuk das zis dung dyei das, ge.

30Housoeh Moshe Ka Pharao jyank masyah thuq las Yhensain lhyi dung dyei. 31Housoeh las Yhensain ka Moshe dang yah dvyhangteh kuot las, hauh yvngkhungh lyis Pharao yahge nyah zau jens, nyah dius jens jyank masyah dvdoeu eq ma nyet lo shoq bi tyamp nhang. 32Pharao gas haq lhain eq nhaiqlom than los las hauh dius jens lyis ma loh nhang.

Ngochang Common Language Bible

© Bible Society of Myanmar 2010

More Info | Version Index