Search form

VPOM 13

Abram yahge Lot Ganggoh

1Housoeh las Abram gas, nyang yahge nyah yhensain nyhiq, nyang yah sen dah zisyos dvnganh yah Egutu masyah thuq las Khanan mautyi pheh loh. Lot eq dvgeh nghuot.

2Abram gas gaunyhauq zisyos, ngwis xing zisyos yah svsoh dis los. 3Khanan mautyi masyah dyung loh las Bethel wuxom, Bethel yahge Ai wus jo, 4Cangxeih lyis nyang zvng kuot las phon ci khoq ku joqyos mas jweh loh. Abram gas houmha Yhensain lhyi chungh paiq.

5Abram yah dvgeh loh dah Lot eq yvng, shvbeq, noeu kyunk, yhenbang nyoshoq yoh las, 6Nyah phvtang dvjoq mas nyeis das zis joqyos zvvs goeus: khasoeh ge lyis nyah phvtang zisyos nyo yvmvyah dvjoq mas dvgeh ma yoh nyeis lo. 7Abram dah gaunyhauq yoeuh bang yahge Lot dah gaunyhauq yoeuh bang dyoqgoh loh. Hauh uhlyis Khanan jens, Perizi jens houmha nyeis.

8Housoeh las Abram gas Lot lyis, Yang gas boeklo nghuot yvmvyah ngos yahge nah vjo mas eq, ngah gaunyhauq yoeuh bang yahge nah gaunyhauq yoeuh bang jo mas eq ma dyoqgoh bas jungh. 9Maunyeis dvjanggyon nah xikkhonh mas joq ma nghuot lhyeh? Ngos yah gang las nyeis aq. Nvng loqwi pheh loh lyis ngos loqyos pheh, nvng loqyos pheh loh lyis ngos loqwi pheh loh das, ge.

10Yhensain Sodom yahge Gomora wus ma mhont shih yoq lyis, Zoar wus jweh shoq Yodan lvng yvm chank dah wuxom pa ka jeis gis las Yhensain dah khyam teh eq, Egutu mau teh eq nghuot joq yvlyis Lot nyvng kat. 11Housoeh las Lot gas hau Yodan mauxom gonh lyis khyen yoeus las buisthuq pheh thot loh zis yah nyah phvtang ganggoh loh. 12Abram gas Khanan mas nyeis khoq shih. Lot gas hauh wuxom pa mha dah wus mas bos nyeis las Sodom wus jweh shoq nyah zvng tsain kuot. 13Sodom wus mas bang gas Yhensain xikkhonh mas yaunos kuot bang nghuot.

Abram Hebron pheh Thuot loh

14Lot Abram yah gang loh thang lhyi, Yhensain Abram lyis taiq zis gas, Gvshih nvng nyeis masyah buisthuq buiswvng, mautsung mautyi pheh yoeuh kat aq. 15Nvng nyvng kat maunyeis dvnganh yah, nvng yahge nah vnyau vshih lyis vcaiq vto dyei toh das. 16Ngos nah vnyau vshih lyis tsohmop teh jebais los nhang das. Dius dvyuk yuk tsohmop lyis yoh suon nghuot lyis gas nah vnyau vshih lyis yoh suon das. 17Nvng toq las hauh maunyeis xing choeu, lvm choeu suh loh aq, ngos nvng lyis dyei das, ge. 18Housoeh Abram gas nyah zvng lyis Hebron wus wons zains tsain yuk joqyos Mamre mas cheh las nyeis. Houmha Yhensain xiklyis phon ci dyei.

Ngochang Common Language Bible

© Bible Society of Myanmar 2010

More Info | Version Index