Search form

VPOM 19

Sodom mas dah Yaunos

1Nyenhthang lhyi hauh loeuswons vzomh Sodom mas jweh loh uhlyis Lot gas wus khomh mas tsung toh. Lot gas hauh vzomh lyis nyvng yah dvyih zes das ge toq loh las gop zoh lyis yah, 2Ngah Yhensain vzomh eh, khvnyens nah aiq yuk ngah yhen mha los jenh wvng yhet khoq geh. Khyei cheih geh: nvpyo noq yah toq loh geh, ge.

Nyah aiq yuk gas, Ma wvng, ngah aiq yuk khvnyens cho mha nyeis das, ge.

3Lot yah tungh sang lha nyah aiq yuk gas nyah yhen pheh bos wvng loh. Nyah aiq yuk xiklyis zo shuk pwe kuot las, bicheih ma kat dah sunghso lhyoq dye kyap lyis tsain zo.

4Hauh aiq yuk ma yhet shih lyis Sodom wus khyiq khanghmuh masyah los dah yukgis ngislo kuhlo hauh yhen lhyi tsain lhaink toh las, 5Lot lyis lui thuq las, Khvnyens nah yhen mha los dah yukgis tang khamha tsain nyeis? Hauh aiq yuk yah ngamoq yoh yhetgoh das xiklyis shwih thuq dyei aq, tsain ge.

6Lot gas khomh nghe pheh nyamoq jyank mas thuq loh las khomh doms nyheih toh. 7Nyang nyamoq lyis taiq zis gas, Ngah buisnoms jens eh, hei iq lhung dah muh vjenh kuot goh. 8Yoeuh aq, ngos yhen ma yoh shih dah lonyi aiq yuk yoh; nyah zomh lyis cha kuot mes kuot geh; haih aiq yuk gas ngah yhen khau mha los khau nyeis las cha eq vjenh kuot dyei goh, ge.

9Nghuot laus eq nyamoq gas Lot lyis, Phang aq, ge. Hauh thoq lyis nyamoq gas, Haih soeu ka heimha dvlos khau nyeis zis soetuon soeu kuot mes nyeis. Gvshih haih aiq yuk lyis kuot thoq lyis nvng lyis zes las ma gis zis kuot das, ge. Housoeh nyamoq Lot lyis duon tyamp las khomh thyoq das ge los. 10Nghuot laus eq hauh loeuswons aiq yuk gas loq yhonh kat las Lot lyis yvpkhau pheh she hwank lho lha khomh kyank tyamp. 11Hauh thoq lyis hauh aiq yuk gas nghe pheh bang ngislo kuhlo lyis nyoq hwah nhang lha nyamoq khomh xo ma nyvng mus.

Lot Sodom masyah Phang

12Gvshih hauh aiq yuk Lot lyis taiq zis gas, Heimha nvng yah sen bang vnyeis lo lah? Nah lomoq jens, nah loloeu lonyi jens haih wus mas nvng yoh ya yoh bang lyis hei mhayah shwih thuq aq. 13Ngah aiq yuk haih joqyos lyis mhont das: khasoeh ge lyis heimha ma gis cho hoeuh zis Yhensain xikkhonh mas svsoh kuh nyeis yvmvyah Yhensain ka ngah aiq yuk lyis haih zis mhont das xiklyis nhang kat, ge.

14Housoeh las Lot gas lomoq duot das bang lyis, Lvnyap toq geh, hei mhayah thuq geh, Yhensain ka haih joqyos lyis mhont das, ge chank taiq. Nghuot laus eq nyamoq gas, Nyang dvzeh nyeis ge nghamh.

15Nyoq nyvng lyis loeuswons aiq yuk gas, Lot lyis kywih las, Toq aq, haih wus dah yaunos mas nvng ma bos zas bas jungh, nah yhensain nyhiq yahge nah lonyi tang lhyi shwih las thuq loh aq, ge. 16Lot gas sheq nyeis. Nghuot laus eq Yhensain ka nyang lyis nhaiqnyen yvmvyah loeuswons vzomh nyang yahge nyah yhensain nyhiq lyis eq, nyah lonyi tang lhyi eq loq masyah she lha wus nghe pheh shwih thuq kat. 17Housoeh loeuswons soeu dvyuk taiq zis gas, Namoq kang luiq shoq phang geh, nungsthank pheh vlhain yoeuh, haih jangpa ma lai dvchank vno, namoq kang luiq shoq boms pheh phang geh, ge.

18Lot gas, Ngah Yhensain nhaiqtang eh, housoeh ma nghuot bas jungh. 19Yoeuh aq ngos nah xikkhonh mas nyoqnho yoh las ngah kang dwis das xiklyis nvng ngos lyis jyetdap sainhnos dah jyehjuh kuh joq, hauh dyoqbis cho ngos lyis duons las ngos ma shei bas jungh, boms mas jweh shoq ngos ma yoh doq phang. 20Yoeuh aq thyih wus gas yoh phang ko ni joq, ngis eq ngis, ngos kang xauh dwis shoq houmha phang loh nhang aq. Houka ngis joq ma nghuot lhyeh, ge.

21Hauh soeu eq, Yoeuh aq, haih cho mha eq nvng ngah xikkhonh mas nyoqnho yoh las nvng taiq dah wus lyis ngos ma mhont lo. 22Houmha lvnyap phang loh aq, nvng houmha ma jweh dvchank ngos cha ma yoh kuot, ge. Housoeh las hauh wus lyis ngis ge dah vjyuk, Zoar ge nyhink.

Sodom Gomora Monh Loh

23Lot Zoar wus mas jweh lyis nyeisjvng mas buis canh goeus. 24Hauh uhlyis Yhensain ka Sodom yahge Gomora thoq mas maukhung mhayah nyilhyam mau wus khyoq kat. 25Housoeh nyang gas hauh wus jens yahge janggyon gonh lyis eq, hauh wus mas tsain nyeis dah dius dvnganh yahge nyeisjvng mas yuk ya yuk yvlyis eq mhont. 26Lot dah yhensain nyhiq gas nungs pheh lhain yoeuh las Cohzains duot loh.

27Gvshih Abraham gas nvpsangh yah toq las nyang Yhensain xikkhonh mas yap khoq dah joqyos mas e lhyi, 28nyang gas Sodom yahge Gomora hau dvjang pa gonh yah tyoeuq kat lyis yoeuh aq, nyikhauh gas nyikhyomp zainsmuh masyah thuq dah nyikhauh teh zis hauh dvmungh gonh mas nhoenk doq los.

29Mangso ka hauh janggyon mas dah wus lyis tsain mhont uhlyis Abraham lyis soh kat las Lot nyeis dah wugungs lyis mhont uhlyis hou mhayah Lot lyis lhuiq kat.

Moab yahge Amon Apom

30Lot gas Zoar wugungs mas nyeis das zis gyuk yvmvyah, nyah lonyi tang yah dvgeh Zoar masyah thuq las boms mas loh tsain nyeis. Nyah phvbih gas Luk-uk dvkoeuq mas nyeis. 31Abi yuk vnoeuh lyis taiq zis gas, Yah aiq yuk dah uwus mang goeus. Hauh thoq lyis nyeisjvng thoq mas nyeisjvng thungh yah dvyhangteh yah aiq yuk lyis yoeus das yukgis dvyuk eq ma nyeis lo. 32Yah aiq yuk gas uwus lyis zvbiq yet nhang goh, yah uwus dah vnyau vshih bos das xiklyis nyang yah yhet goh, ge. 33Hauh nyenh lyis nyah aiq yuk gas uwus lyis zvbiq yet nhang lha vbi yuk uwus yah dvgeh wvng yhet. Nyang wvng yhet zis eq, toq loh zis eq nyah uwus ma seq.

34Nungsnvp vbi yuk gas vnoeuh lyis, Yoeuh aq, ngos vmvn uwus yah yhet goeus. Khvnyens eq nyang lyis zvbiq yet nhang lha uwus dah vnyau vshih yoh shoq nvng uwus jyank mas wvng yhet aq, ge. 35Hauh nyenhyo eq nyah aiq yuk gas uwus lyis zvbiq yet nhang lha vnoeuh yuk uwus yah dvgeh yhet. Nyang bos yhet zis eq, nyang toq loh zis eq nyah uwus ma seq. 36Housoeh las Lot dah lonyi tang ka nyah uwus jyank masyah ung mha loshang tsain chi. 37Abi gas yukgis lo khoeu lha, hauh loshang lhyi Moab ge nyhink. Nyang gas gvshih jweh shoq Moab dius dah uwus nghuot. 38Vnoeuh yuk eq yukgis lo khoeu lha hauh loshang lhyi Benami nyhink. Nyang gas gvshih jweh shoq Amon lo jens uwus nghuot.

Ngochang Common Language Bible

© Bible Society of Myanmar 2010

More Info | Version Index