Search form

VPOM 26

Isak Gerar mas Nyeis

1Hauh mau mas Abraham zaih lyis dah phanghkhauq thoq lyis gohtoeu phanghkhauq doms gyoh. Housoeh las Isak gas Gerar mas nyeis Philisti hwankti Abimelek jyank mas e. 2Hauh uhlyis Yhensain ka nyang lyis nyvng xoeuq las taiq zis gas, Egutu mau mas v-e; ngos nvng lyis tuonh shet das mau mas nyeis aq. 3Haih mau mas nyeis aq; ngos nah shot pheh nyeis las nvng lyis shvmanh dyei das: khasoeh ge lyis nvng yahge nah vnyau vshih lyis ngos haih mau gonh dyei das; ngos nah uwus lyis maukhi toh dang yah dvyhangteh kuot das. 4Ngos nah vnyau vshih lyis maukhung mha kyi teh nyo nhang das las, nah vnyau vshih lyis haih mau gonh dyei das: nah vnyau vshih gvng mas nyeisjvng dius nyau dvnganh gas shvmanh yoh das. 5Khasoeh ge lyis Abraham gas ngah dang gyo, ngos taiq toh dang, ngah lyi dvnganh chank kuot, ge.

6Housoeh las Isak Gerar mas nyeis. 7Houmha bang Isak yhensain nyhiq cho nyei las, nyang gas, Ngah nhamhmuh nghuot, ge. Khasoeh ge lyis Rebeka gas yungh yvmvyah houmha bang gas nyah gvng mas nyang lyis ma sat bas jungh ge nghamh las nyah yhensain nyhiq nghuot ge ma womh taiq.8Houmha nyangh nyangh nyeis thang lhyi Philisti hwankti Abimelek gas khomhbaiq masyah yoeuh kat lyis, Isak gas nyah yhensain nyhiq Rebeka yah jyet goh nyeis yvlyis nyvng. 9Housoeh las Abimelek gas Isak lyis khi lha, Yoeuh aq, nyang nah yhensain nyhiq jyoeng nghuot; hauh zis nvng gas, Ngah nhamhmuh nghuot oen chamus taiq, ge nyho.

Nyah gvng mas ngos ma shei bas jungh oen lha nghuot, ge.

10Abimelek gas, Nvng ngamoq lyis cha kuot. Dius dvyuk yuk nah yhensain nyhiq yah lwis lwis zangh yhetgoh jus lyis gas, nvng ngamoq thoq mas yaunos she kih das, ge. 11Housoeh las Abimelek gas nyah dius nyau lyis, Haih soeu lhyi laus eq, nyah yhensain nyhiq lyis laus eq shuot soeu ka sat zis xauh das, ge taiq toh.

12Hauh mau mas Isak jyo khyoq las hauh zvn lyis jyo dvxo huon xauh yhomh: Yhensain nyang lyis shvmanh dyei. 13Nyang gas nyeisgis yap tsoq lhoq las svsoh dis los. 14Yvng eq, noeu eq nyoshoq yoh, yhen mha jyeidwis jens eq dyingh los yvmvyah Philisti jens nyang lyis noh los. 15Nyah uwus Abraham zaih lyis Abraham jyeidwis jens doeu toh jeisdwang dvnganh Philisti jens yah tsain cheiq tyamp dyei.

16Abimelek gas Isak lyis, Nvng ngamoq thoq lyis yom zes bos yvmvyah, ngamoq jyank masyah thuq loh aq, ge.

17Isak gas hou mhayah thuq las, Gerar langhkhau mha nyeis. 18Hauh uhlyis Isak gas, nyah uwus Abraham zaih lyis doeu las, Abraham shei thang lhyi Philisti jens cheiq tyamp dyei jeisdwang doms soq las nyings eq nyah uwus nyhink toh zis yah dvyhangteh doms nyhink.

19Isak dah jyeidwis jens eq hauh langhkhau mha doeu lyis jeisthuq dwang nyvng. 20Nghuot laus eq Gerar mas dah yvng yoeuh bang gas, Haih zis ngamoq dah jeis dvnghuot, ge Isak dah yvng yoeuh bang yah dyoqgoh yvmvyah hauh jeisdwang lyis dyoqgoh ge dah vjyuk yah Esek ge nyhink.

21Hauh thang lhyi nyamoq jeisdwang gohtoeu dvdwang doms doeu lyis eq doms lhuot goh las, hauh yvlyis hoenggoh ge dah vjyuk yah Sitna ge nyhink. 22Hou mhayah cheh las gohtoeu jeisdwang doms doeu, houmha ka ma lhuot goh lo: housoeh las, Yhensain yang lyis nyeisgus dvm dvm dyei goeus yvmvyah yang haih mau mas jebais los lo das ge, hauh yvlyis khonhchauh ge dah vjyuk yah Rehobot ge nyhink.

23Isak hou mhayah Besheba mas doq loh. 24Hauh nyens lyis Yhensain ka nyang lyis nyvng xoeuq las, Ngos gas nah uwus Abraham dah Mangso nghuot; Vgyuk, ngos nah shot pheh nyeis; ngos nvng lyis shvmanh dyei das las, ngah jyeidwis Abraham gvng mas nah vnyau vshih lyis jebais los nhang das, ge. 25Nyang houmha phon ci lha Yhensain lhyi paiq; houmha nyah zvng eq kuot toh. Isak dah jyeidwis jens eq houmha jeisdwang tsain doeu.

Isak yah Abimelek Xamxonh

26Hauh uhlyis Abimelek gas nyang lyis joeui dyei soeu Ahuzat yahge jeszau Phikol yah dvgeh Gerar masyah Isak lyis loh xauhgoh.27Isak gas, Namoq ngos lyis hoeng lha khat thuq kat lho lha, gvshih ngah jyank mas chamus jweh los goh, ge nyamoq lyis lhom nyei.

28Nyamoq taiq zis gas, Yhensain ka nvng yah dvgeh nghuot yvlyis ngamoq seq goeus: housoeh las nvng yahge ngamoq jo mas thanghchvp toh goh. 29Ngamoq nvng lyis ma cu, nvng lyis gis khyvlyis kuot las nyens nyens tap tap nhang kat zis yah dvyhangteh, nvng ngamoq lyis ma gis khyvlyis cha ma kuot bas jungh, nvng yahge ngamoq maukhi toh goh, oen los. Nvng gas Yhensain dah shvmanh yoh soeu nghuot, ge. 30Isak gas nyamoq lyis wom khi tsoh las nyamoq eq zo shuk. 31Housoeh nyamoq nvpsangh yah toq las kyamptang, maukhi. Hauh thang lhyi Isak gas nyamoq lyis pont kat las, nyamoq nyenstap zis yah loh lo.

32Hauh nyeih lyis Isak dah jyeidwis jens gas, Ngamoq jeis nyvng goeus, ge nyamoq doeu dah jeisdwang cho nyang lyis los taiq kyoh. 33Housoeh hauh vdwang lyis Shiba nyhink. Housoeh las khvnyhik jweh shoq houmha joq dah wus lyis Besheba ge lui.

Esau Lvbau Yhensain Nyhiq

34Esau nyenhkyi nyeici zvn bos lyis Hiti dius Beri lonyi Yudit yahge Hiti dius Elon lonyi Basemat moq lyis nyi tsain hwank. 35Hauh aiq yuk gas Isak yahge Rebeka lyis nhaiqkuk nhang.

Ngochang Common Language Bible

© Bible Society of Myanmar 2010

More Info | Version Index