Search form

VPOM 32

Yakop Esau yah Xauhgoh Sont

1Yakop eq nyang loh cho tsoq loh nyeis lyis Mangso dah loeuswons bang nyang lyis los zes. 2Yakop gas nyamoq lyis nyvng lyis, Heika Mangso dah jesphung thoenggus nghuot, ge hauh joqyos lyis Mahanaim nyhink.

3Hauh thang lhyi Yakop gas Seir mau Edom pa mha nyeis, nyah vmang Esau jyank mas loeuswons bang lyis xik nhang kat. 4Nyang nyamoq lyis taiq kat zis gas, Nah jyeidwis Yakop gas gvshih jweh shoq Laban jyank mas khau nyeis. 5Ngos noeu eq, mauhlyihzoe eq, yvng shvbeq phung eq, jyeidwis vbusbih jens vmesbih jens eq nyoshoq yoh: ngos ngah yhensain xikkhonh mas nyoqnho yoh bas jungh, oen tying kat ge, oen ngah yhensain Esau lyis taiq dyei geh, ge.

6Loeuswons bang tauh los las Yakop lyis taiq zis gas, Ngamoq nah vmang Esau jyank mas jweh khoq; nyang nvng lyis zes das ge dius nyeixo yah los nyeis, ge. 7Housoeh las Yakop gas svsoh gyuk zis yah ehnyet nyo nyeis las, nyah thang chank bang, yvng shvbeq phung, noeu phung, gola-u lyis aiq gvm tsain khyoq. 8Khasoeh ge lyis, dvgvm lyis Esau nyvng las thyoq loh lyis, dvgvm gas luiq mvbeh, ge.

9Yakop gas, Ngah vphauh Abraham dah Mangso, ngah uwus Isak dah Mangso ngos lyis nah mau, nah vnyau bang jyank mas doms loh aq, ngos nvng lyis dis los nhang das ge taiq dah Yhensain eh, 10Nvng nah jyeidwis lyis chixoeuq dah jyehjuh yahge lomluk cho ngos dvkoeuq eq ma mon. Xikpheh ngos haih Yodan lvng lyis goeu uhlyis ngos lhamloq kyingh dvyoh, gvshih gas ngos aiq gvm nghuot goeus. 11Ngos lyis ngah vmang Esau loq masyah jenh lhuiq kat aq. Nyang jweh las ngos lyis eq, vmesbih jens yahge vlo jens lyis eq zan das zis chiqh. 12Ngos nvng lyis jyoengh nyeisgis nhang das; nah vnyau vshih lyis thomh yvm mas ma thoq suon lo dah sihsho teh je los nhang das ge nvng sang, ge.

13Nyang houmha dvnyens gonh nyeis las nyang yoh zisyos masyah vmang Esau lhyi jyungshuk ge, 14shvbeq zains aiqxo, beqlus aiqci, yvng zains aiqxo, vlus aiqci; 15nauh shuk gola-u somhci metang; noeu zains nyeici, noeulu dvci, luzoe zains aiqci, luzoe lus dvci khyen toh. 16Housoeh nyang phung nyang, jyeidwis jens loq mas tsomh lho lha hauh jyeidwis jens lyis, Ngah xik pheh goeu las dvphung yah dvphung we we lo kyo lha loh geh, ge taiq kat. 17Xik pheh loh soeu lhyi taiq kat zis gas, Ngah vmang Esau nvng yah xauhgoh las, Nvng hank dius nghuot? Khapheh loh, nah xik mas gaunyhauq hank zis, ge nyei lyis, 18Nah jyeidwis Yakop zis nghuot; nvng yhensain Esau lyis dyei kat jyungshuk nghuot; nyang gas thang mha nghuot shih, oen taiq aq, ge. 19Houyah dvyhangteh aiq vphung, somh vphung, xik loh soeu lhyi eq, phung khanghmuh mas chank bang lyis eq, Namoq ngah vmang Esau yah xauhgoh lyis housoeh taiq geh, ge eq; 20Nah jyeidwis Yakop thang mha dvnghuot shih, oen taiq geh, ge eq tying kat. Khasoeh ge lyis gvshih ngah xik pheh loh goeus jyungshuk yah ngos nyah nhaiqlom lhoq tap das. Housoeh ngos nyang yah xauhgoh lyis nyang ngah nyoqnho mes yoeuh mvbeh, ge Yakop nghamh. 21Housoeh nyah xik mas jyungshuk kat kat las, nyang gas hauh nyens lyis hauh dius phung yah dvgeh nyeis.

Peniel mas Yakop Lomgoh

22Gvshih hauh nyens lyis Yakop toq las nyah yhensain nyhiq nhaiqtang yahge jyeidwis nhaiqtang lyis eq, nyah lo jens dvci dvyuk moq lyis eq shwih las Yabok lvng thyitvp pheh koeuh kat. 23Housoeh nyamoq lyis shwih las nyah zisyos yoh ya yoh yvlyis koeuh kat. 24Yakop nyang dvyuk kyingh gyoh nyeis las dius dvyuk mau buh shoq nyang yah lomgoh nyeis. 25Hauh soeu ka nyang ma yoh ung zis lyis seq lyis Yakop dah dvngtsom gyi lyis thauh dyei las nyang yah lomgoh nyeis lyis nyah dvngtsom lhaiq tyamp. 26Hauh soeu ka nyoq nyvng las, Ngos lyis kat kat aq, ge.

Yakop gas, nvng ngos lyis ma shvmanh dyei lyis gas ma kat kat, ge.

27Tsai, hauh soeu ka, Nah nyings cha nghuot, ge nyei lyis, Yakop nghuot, ge taiq kyoh.

28Hauh soeu ka, Nah nyings Yakop ma nghuot lo. Nvng gas Mangso yah eq dius yah eq loeutyonh ung yvmvyah nah nyings Israel dvnghuot lo, ge.

29Yakop eq, Nah nyings cha nghuot ngos lyis taiq kyoh aq, ge nyei lyis hauh soeu ka,

Nvng ngah nyings chamus nyei, ge lho lha nyang lyis shvmanh dyei.

30Housoeh las Yakop hauh joqyos lyis Peniel nyhink. Khasoeh ge lyis ngos gas Mangso yah nyoqnho changh nyvng goh laus eq ma shei, ge. 31Peniel masyah thuq lyis buisloq baiq goeus; nyah khyei eq yhwe goeus. 32Housoeh Yakop dah dvngtsom gyi lyis thauh dyei yvmvyah, Israel jens khvnyhik jweh shoq dvngtsom gyi ma tsain zo.

Ngochang Common Language Bible

© Bible Society of Myanmar 2010

More Info | Version Index