Search form

VPOM 33

Yakop Esau yah Xauhgoh

1Hauh thang lhyi Yakop yoeuh kat lyis, yoeuh aq, Esau ka dius nyeixo yah los nyeis. Hauh zis nyvng lyis Lea nhaiqtang Rakhel yahge phiqkya aiq yuk lyis lo tsain gvm dyei. 2Phiqkya aiq yuk yahge nyah zomh lo jens lyis cangxeih, Lea yahge nyah lo jens lyis vgungs mas, Rakhel metang Yosep lyis thang mha toh. 3Nyang gas nyamoq dah xik pheh lai las, nyeisjvng mas nyhet lhain dupaiq las nyah vmang Esau jyank mas ni loh.

4Esau eq nyang yah xauhgoh shoq wuih los las bvlot po tanh zis yah ngaus goh nyeis. 5Housoeh Esau yoeuh kat lyis vmesbih jens yahge nyamoq lo jens lyis nyvng lyis, Hai nvng yah dvgeh los bang gas hank tsain nghuot lah, ge nyei.

Yakop gas, Mangso nah jyeidwis lyis shvmanh dyei dah lo jens nghuot, ge. 6Hauh uhlyis phiqkya aiq yuk yahge nyah zomh dah lo jens los ywi paiq gop joq. 7Lea yahge nyah lo jens eq los ywi paiq gop joq, Hauh thang lhyi Yosep metang Rakhel eq los ywi paiq gop joq.

8Esau ka, Ngos xauhgoh kat dah gaunyhauq phung ka khasoeh nghuot lah, ge nyei lyis

Yakop gas, Ngos nvng yhensain xikkhonh mas nyoqnho yoh das xiklyis nghuot, ge toeuh.

9Nghuot laus eq Esau ka, Ngah wik eh, ngos yoh zis geh, nah zisyos nvng doms yoeus toh aq, ge.

10Yakop gas, Ma nghuot, housoeh vsang, ngos nah xikkhonh mas nyoqnho yoh nghuot lyis gas ngos dyei jyungshuk lhom yoeus aq: Mangso dah nyoqnho nyvng teh ngos nah nyoqnho nyvng las, nvng eq ngos lyis jyet las lhom yoeus. 11Nah jyank mas jweh dah ngah jyungshuk gas dvjenh lhom yoeus aq; Mangso ngos lyis jyehjuh dyei goeus las, ngah xiklyis nyoshoq nghuot, ge tungh dyei yvmvyah nyang lhom yoeus.

12Hauh thang lyis Esau ka, Suh geh dyens tsain toq lo goh, ngos choshe bah, ge.

13Yakop gas, Loshang jens ngis shih, yvng shvbeq yahge noeu eq nauh shuk zis tsain chang yvlyis nvng yhensain nyang seq; dvnyeih dvm lyis nyo khat gyen goeus ya dvnganh yah shei das. 14Housoeh las nvng yhensain ka nah jyeidwis xik pheh loh langh aq: ngos gas gaunyhauq yahge loshang jens yoh suh nyhoq nvng yhensain nyeis dah Seir boms mas jweh shoq zoh zoh yah shwih gu los das, ge.

15Esau ka, Housoeh lyis gas, ngos yah los bang dvyhamh nah jyank mas toh khoq bah, ge.

Yakop gas, Cha ma chah, ngos nvng yhensain xikkhonh mas nyoqnho yoh goeus ya nghuot goeus, ge. 16Housoeh Esau ka hauh nyeihyo nyang dyens toq las Seir boms pheh tauh loh. 17Nghuot laus eq Yakop gas Sukhot ge yvmas jweh shoq loh las nyang nyeis das yhen yahge gaunyhauq zungs tsain kuot: Housoeh las hauh joqyos lyis Sukhot nyhink.

18Yakop gas Padan Aram masyah tauh los las Khanan mau Shekhem wus mas yangh yangh zan zan jweh los las wus yvm mas thoeng nyeis. 19Nyang zvng kuot dah maunyeis gas Shekhem dah uwus Hamor lo jens jyank masyah nyang ngwis kyvp dvxo yah wis zis nghuot.20Houmha eq nyang phon dvkoeuq ci lha hauh yvlyis El Elohe Israel nyhink.

Ngochang Common Language Bible

© Bible Society of Myanmar 2010

More Info | Version Index