Search form

VPOM 40

Thung mha, Yosep Yhetmoq pho

1Hauh cho tsain bweh thang lhyi, Egutu hwankti dah zvbiq zom soeu yahge ohlhyoq piq soeu ka hwankti lhyi tsain shuot. 2Hwankti Pharao gas hau zvbiq zom uhjyung yahge ohlhyoq piq uhjyung lyis nhaiq gis yo las, 3Hau Yosep thung lungh joqyos, zungh zau dah yhen thung mas tsain lhunk toh. 4Hau zungh bang dah zau gas nyah aiq yuk Yosep lyis kyauh toh las Yosep gas nyah aiq yuk lyis phuqsoe nyeis. Nyah aiq yuk eq thung nyangh nyangh lo tsain lungh joq.

5Thung lungh nyeis Egutu hwankti dah zvbiq zom soeu yahge ohlhyoq piq ka dvnyens dvm lyis vjyuk nyang yuk nyang toeu bos dah yhetmoq dvyuk dvkoeuq tsain moq. 6Nvpsangh Yosep nyah aiq yuk jyank mas wvng loh lyis, yoeuh aq, nyah aiq yuk nyoqnho tsain dyoq. 7Housoeh las nyah yhensain yhen mha nyang yah dvgeh thung lungh nyeis, Pharao dah nhaiqbos aiq yuk lyis, Khvnyhik nah aiq yuk cha chiq goh lah, ge nyei.

8Nyah aiq yuk gas, Ngah aiq yuk yhetmoq tsain moq zis daq pho dyei soeu hank ma bos, ge tsain toeuh.

Yosep gas, Yhetmoq vjyuk cho ka Mangso yah dvsen ma nghuot lhyeh? Ngos lyis taiq kyoh aq, ge.

9Zvbiq zom uhjyung nyah yhetmoq Yosep lyis taiq kyoh zis gas, Ngah yhetmoq mas yoeuh aq, zvbiq dvnwis ngah xikkhonh mas yuk joq. 10Hauh zvbiq nwis mas vkoq somh koeuq koq joq. Hauh vkoq mas vhuq tuot yah dvyih vbuh buh los; vshih dyoms eq tsain nyhink joq. 11Pharao dah zvbiq kom eq ngos chi uhjyangh hauh zvbiq shih dyoms lyis yoeus las Pharao dah kom mha nyhet kat las hauh zvbiq kom Pharao lyis dyei, ge.

12Yosep gas, Hauh vjyuk gas heisoeh nghuot: zvbiq nwis koq somh koq gas somh nyeih nghuot. 13Somh nyeih gyo lyis Pharao gas nah yobos khyuot dyei las nah muh mas nvng lyis doms toh das: xikpheh nvng zvbiq zom ku zis yah dvyhangteh, hauh kom Pharao lyis vkhang teh doms xauh shuon dyei das. 14Nvng nyeisgis yaplhoq lyis ngos lyis soh las jyehjuh phuk aq. Pharao xikkhonh mas ngah cho taiq las, haih thung mhayah ngos lyis khyuot aq. 15Jyoengh nyang ngos lyis Hebre mau masyah khyanktau kuot shwih los, gvshih heimha eq ngos cha ma shuot yvlyis haih thung mha lhunk toh, ge kat.

16Nyang hau yhetmoq pho zis gis yvlyis ohlhyoq piq uhjyung nyvng lyis, nyang Yosep lyis nyah yhetmoq taiq zis gas, Yoeuh aq, ohlhyoq bos dah kyank somh koeuq ngah uhloms mas kih toh. 17Thoq lyis vkoeuq mas Pharao zo das xiklyis piq goeus zonoms vja ja bos las nghoq gas ngos khuk toh kyank mas zis los tsain chweh zo, ge.

18Yosep gas, Hauh vjyuk heisoeh nghuot: Kyank somh koeuq gas somh nyeih nghuot. 19Somh nyeih gyo lyis Pharao gas nah uhloms lyis thyet tyamp las nvng lyis saiqzains mas lhangh toh das. Nghoq gas nah shoh los chweh zo das, ge.

20Housoeh somh vnyeih lyis Pharao dah khoeu buisnyeis nghuot las, nyah zau jens lyis pwe tsoh. Nyah zau jens xikkhonh mas zvbiq zom uhjyung yahge ohlhyoq piq uhjyung lyis shwih thuq kat. 21Yosep pho dyei zis yah dvyhangteh zvbiq zom uhjyung lyis vkhang vgus nyah joqyos mas doms toh las nyang gas Pharao lyis xikpheh teh zvbiq doms xauh zom dyei. 22Ohlhyoq piq uhjyung lyis gas lhangh tyamp. 23Nghuot laus eq zvbiq zom uhjyung ka Yosep lyis ma soh lo, nyang lyis tohnyhik toh.

Ngochang Common Language Bible

© Bible Society of Myanmar 2010

More Info | Version Index