Search form

VPOM 43

Benyamin Egutu pheh

1Gvshih hauh mau mas panghkhauq changh nyeis. 2Nyamoq Egutu masyah thuq los wom dye tsain zo thang lhyi nyamoq uwus nyamoq lyis taiq zis gas, Yah xiklyis wom dvtsiq e doms wis los geh, ge.

3Nghuot laus eq Yuda nyang lyis taiq zis gas, Hauh soeu ngamoq lyis, Namoq dah vnoeuh ma bos lyis gas namoq ngah nyoqnho ma xauh nyvng das, ge than than taiq kat. 4Ngamoq vnoeuh bos nhang kat lyis gas, ngamoq nah xiklyis guk e wis das. 5Nyang lyis ma bos nhang kat lyis, ngamoq ma e: khasoeh ge lyis hauh soeu ngamoq lyis, Namoq vnoeuh ma bos lyis gas ngah nyoqnho ma xauh nyvng das ge goeus, ge.

6Yakop gas, Namoq vnoeuh yoh cho hauh soeu lhyi taiq kyoh las ngos lyis chamus shoeuhshih nyeis goh, ge.

7Nyamoq gas, Hauh soeu nyang ngamoq cho, yah vhuh cho, namoq uwus nyeis shih lhyeh, namoq vnoeuh yoh shih lhyeh, ge jyuk yang nyei yvmvyah ngamoq gas nyang nyei thang chank las taiq kyoh goeus. Namoq vnoeuh shwih lyih aq, ge das zis gas ngamoq khasoeh yoh thoq seq das, ge.

8Yuda gas nyah uwus Yakop lyis, Haih loshang ngos yah tap kat aq; housoeh lyis ngamoq lvnyap e das las, nvng uwus eq, ngamoq eq, ngamoq lo jens eq ma shei dyuk, kang dwis das. 9Ngos kham das; nvng, nyang lyis ngah jyank masyah yoh sang das: ngos nyang lyis nah jyank mas ma doms shwih jweh los dyei goeus ya, ngos nah xikkhonh mas dvcaiq yah yau huon zis xauh bas jungh. 10Nvng hei nyhank ma sheq toh nyeis ya gvshih aiq jon jweh los hah das, ge.

11Nyamoq uwus Yakop gas, Housoeh kuot chah lyis heisoeh kuot geh; hauh soeu lhyi jyungshuk dyei das zis haih mau mas dah gis thank balsam gyei dvtsiq, dyoyhei dvtsiq, saiq xangh coeu, mura coeu, batan shih yahge lvshvp shih yoeus las namoq tu mha thuq loh geh. 12Ngwis eq aiq huon chi geh; namoq thung khonh mas bos los dah ngwis eq doms yoeus wons geh; houka whang zis nghuot das. 13Namoq vnoeuh lyis eq shwih las hauh soeu jyank mas lvnyap tauh e geh. 14Hauh soeu ka namoq vmang vnoeuh dvyuk yahge Benyamin lyis namoq yah doms nhang kat dyei bas jungh. Mangso ka namoq lyis hauh soeu xikkhonh mas nhaiqnyen cho dyei bas jungh: ngos gas kuk lyis eq kuk goeus jungh, ge.

15Housoeh nyamoq gas hauh jyungshuk eq, ngwis eq dvyuk aiq huon huon mulas Benyamin lyis eq shwih las e lhyi Egutu mau mas jweh lyis Yosep xikkhonh mas tsain yap joq. 16Nyamoq yah dvgeh Benyamin bos lyih yvlyis Yosep nyvng lyis, nyah ziszom lyis, Haih bang lyis yhen mha shwih loh aq: khvnyhik ngos nyamoq yah nyeihzvng zo das; shoh sat las womconh ba geh, ge. 17Hauh soeu eq Yosep taiq teh kuot las, hauh bang lyis Yosep yhen mha shwih loh.

18Housoeh Yosep yhen mha tsain shwih loh lyis nyamoq gas xikpheh yah thung khonh mas doms kat dyei kat dah ngwis gvng mas tsain khi hwank toh: nyang houmha thangzoe xo lha yang lyis zan zis yah jyeidwis tsoengh kuot nhang lha, yah mauhlyihzoe jens eq yoeus tyamp lo das, ge gyuk zoh lyis tsain taiq nyeis. 19Housoeh las nyamoq gas Yosep dah ziszom jyank mas loh las khomh nvm mas nyang lyis taiq zis gas, 20Yhensain eh, ngamoq xikpheh wom dvjon lyih wis ku. 21Thoenggus jweh las ngamoq dah thung lhyi tsain phank yoeuh lyis, yoeuh aq, ngamoq nyang yuk nyang toeu dah ngwis vgus gus nyang yuk nyang toeu thung khonh mas tsain bos: hauh ngwis gvshih doms chi lyih. 22Gvshih eq wom wis ngwis ngamoq gohtoeu tsain wons. Hauh ngwis ngamoq thung mha hank kat toh dyei zis ngamoq ma seq, ge.

23Nyang gas, Namoq nyenstap nyeis bas jungh, vchiq goh, namoq Mangso namoq uwus dah Mangso ka, namoq thung mha zisyos dyei; namoq dah ngwis ngos xauh yoeus goeus ge taiq las, Simon lyis nyamoq jyank mas phank kat dyei.

24Hauh soeu ka nyamoq lyis Yosep yhen mha shwih wvng las jeis dyei lho lhyi nyamoq khyei cheih. Mauhlyihzoe jens lyis eq tsain tsoh dyei. 25Hauh yhen mha nyamoq lyis nyeihzvng tsoh das ge yvmvyah, nyeih gungs lyis Yosep los lo das ge nghamhloms las nyamoq dah jyungshuk tsain sont toh.

26Gvshih Yosep yhen mha jweh lyis nyamoq chi dah jyungshuk lyis yvpkhau Yosep jyank mas chi wvng las, nyah xikkhonh mas tsain dupaiq. 27Nyang gas nyamoq yah jhent uhjyangh, xikpheh namoq taiq, namoq dah uwus lokhoq gas yangh nyeis lhyeh? Nyang kang dwis nyeis shih lhyeh, ge nyei.

28Nyamoq gas, Ngamoq uwus yanghzan nyeis khoq; nyang kang dwis nyeis shih ge toeuh las dupaiq.

29Nyang yoeuh kat lyis nyah ungwes dah lo, vnoeuh Benyamin lyis nyvng las, Haih soeu ka xikpheh namoq taiq, namoq dah vnoeuh lothank nghuot lhyeh ge las, Ngah lo eh, nvng lyis Mangso jyehjuh dyei bas jungh, ge. 30Yosep gas nyah vnoeuh lyis nyvng lyis ngaus mes yvmvyah, lvnyap toq loh las ngaus das joqyos xo nyeis: housoeh nyang nyah yvpkhau mha wvng las ngaus nyeis. 31Nyang nyoq cheih lho lha thuq los, nyah ehnyet than than toh las, wom khyoq lo geh, ge. 32Housoeh nyah xiklyis dvjus, nyamoq xiklyis dvjus, nyah jyank mas dvgeh zo bang Egutu dius xiklyis dvjus, nyang jus nyang tsain khyoq. Egutu jens gas Hebre jens yah dvgeh zo shuk lyis nyoqnho ngelang ma bos ge nghamh las nghuot. 33Vmang vnoeuh moq gas mang muh masyah lothank jweh shoq, nyenhkyi kuh masyah ngis, vzoh yah nyah xikkhonh mas tsain tsung toh. Nyamoq gas nyang changh nyang yoeuh las mauh nyeis. 34Yosep gas jus masyah nyamoq lyis vzoh yah wom yhonh dyei. Benyamin lyis dyei zis gas vmang moq lyis dyei thoq lyis oeng huon nyo. Housoeh nyamoq zo shuk las pyo nyeis.

Ngochang Common Language Bible

© Bible Society of Myanmar 2010

More Info | Version Index