Search form

VPOM 47

1Yosep gas Pharao jyank mas wvng las, Ngah uwus yahge ngah vmang vnoeuh moq, nyamoq dah yvng shvbeq, gaunyhauq yahge kyahsoe eq cheq Khanan masyah jweh las Goshen mas thoeng nyeis, ge taiq kyoh. 2Nyah vmang vnoeuh moq mas oeng yuk khyen lha Pharao jyank mas shwih wvng. 3Hauh uhlyis Pharao gas, Yosep dah vmang vnoeuh moq lyis, Namoq cha zwi zo, ge nyei.

Nyamoq toeuh zis gas, Ngamoq gas ngamoq phauh thyeih moq eq ngamoq eq yvng shvbeq nyhoeu zo bang nghuot, ge. 4Tsai, nyamoq gas, Khanan mau mas phanghkhauq changh las ngamoq dah gaunyhauq phung xiklyis katjang ma bos yvmvyah, ngamoq haih mau mas khau nyeis das oen tsain jweh lyih. Housoeh las gvshih ngamoq lyis Goshen mau mas jenh nyeis nhang aq, ge Pharao lyis taiq. 5Hauh uhlyis Pharao Yosep lyis taiq zis gas, Nah uwus yahge nah vmang vnoeuh moq nah jyank mas jweh lyih. 6Egutu mau gas nah xikkhonh mas dvm joq; nah uwus yahge nah vmang vnoeuh moq lyis gis thank joqyos Goshen mau mas nyeis nhang aq, Nyamoq mas kank bos bang nyvng lyis ngah gaunyhauq xiklyis uhjyung toeuq toh aq, ge.

7Yosep gas nyah uwus Yakop lyis Pharao xikkhonh mas shwih hwank toh: Yakop eq Pharao lyis shvmanh dyei. 8Pharao gas Yakop lyis, Nvng khanyhoq zvn nghuot goeus, ge.

9Yakop Pharao lyis taiq zis gas, Ngos boengh duot yenh dah zvn, ka dvxo somhci nghuot goeus: ngos dwis nyeis shishenh lyung las yau. Ngah phauh thyeih moq boengh duot yenh las dwis nyeis khoq dah nyenhkyi lhyi ma duons, ge. 10Housoeh Yakop gas Pharao lyis shvmanh dyei lho lha thuq loh. 11Housoeh las Yosep gas Pharao dah vmingh yah dvyhangteh nyah uwus yahge nyah vmang vnoeuh moq lyis Egutu mas dah gis thank joqyos ge, Ramese maunyeis mas nyeis nhang. 12Yosep gas nyah uwus lyis eq, nyah vmang vnoeuh moq lyis eq, nyah uwus yhenbang dvnganhmoq lyis yhen dius lyis tank las wom dyei, tsoh nyeis.

Phanghkhauq

13Gvshih hauh dvmau gonh panghkhauq changh nyeis las, zonoms ma joq. Egutu yahge Khanan mau gas hauh phanghkhauq gvng mas yomnhuk nyeis. 14Yosep eq Egutu yahge Khanan mau mas dius jens wis dah wom phauh ngwis dvnganh tsainh las Pharao dah yhen mha kat toh. 15Gvshih Egutu yahge Khanan mas ngwis tsain thank lyis Egutu dius dvnganh gas Yosep jyank mas los las, Ngamoq lyis zonoms dyei aq, ngamoq ngwis thank goeus yvmvyah ngamoq nah xikkhonh mas chamus shei das, ge tsain dung.

16Yosep gas, ngwis thank goeus ya namoq dah gaunyhauq dyei geh, hauh phauh namoq lyis wom dyei bah, ge. 17Housoeh nyamoq dah gaunyhauq Yosep jyank mas yoeus lyih las Yosep gas nyang, yvng shvbeq phung, noeu phung yahge mauhlyihzoe phauh wom tsain dyei las hauh zvn lyis hau gaunyhauq phauh yah womdau khoeu.

18Hauh zvn thank las thang zvn mas eq, nyamoq los sang shih zis gas, yhensain eh, ngamoq ngwis thank goeus zis gas he chank ma bos; ngamoq dah gaunyhauq eq nvng yhensain xauh yoeus goeus; nvng yhensain xikkhonh mas ngamoq gungs yahge ngamoq sain dah maunyeis mas lai las gohtoeu cha eq ma nyet lo. 19Ngamoq chamus nah xikkhonh mas shei lha munghdan dyoqbis nhang das. Ngamoq dah gungs yahge maunyeis wis yoeus las ngamoq lyis wom dyei aq; Housoeh ngamoq gas maunyeis eq cheq Pharao dah jyeidwis duot das: ngamoq ma shei shei kang dwis nyeis das zis yahge munghdan ma jyamh loh das xiklyis ngamoq lyis jyo nyau dyei aq, ge dung.

20Housoeh Yosep gas Egutu maunyeis dvnganh yvlyis Pharao xiklyis wis goeus: khasoeh ge lyis phanghkhauq changh yvmvyah Egutu dius jens nyang yuk nyang toeu sain dah maunyeis ungh las houka Pharao dah maunyeis kyingh bweh loh. 21Dius jens Egutu mau dvshot masyah gohtoeu dvshot jweh shoq bang lyis jyeidwis kuot nhang. 22Phudyei bang dah maunyeis lyis gas nyang ma wis: nyamoq lyis gas Pharao khoeu lha, Pharao nyamoq lyis dyei yvmas dvyoh nyeis. Housoeh las nyamoq gas nyamoq maunyeis ma ungh noh. 23Yosep gas dius jens lyis, Yoeuh aq, khvnyhik namoq gungs yahge maunyeis lyis Pharao xiklyis ngos wis yoeus: heimha namoq maunyeis xiklyis jyo nyau joq. 24Jyo yhomh uhlyis oeng boms dvboms Pharao lyis dyei chah. Nyei boms gas namoq jyo nyau yahge namoq yhenbang zo das xiklyis eq, namoq dah loshang jens nyhoeu das xiklyis duot das, ge.

25Nyamoq eq, Nvng ngamoq dah kang tyont dyei, nvng yhensain dah xikkhonh mas ngamoq nyoqnho yoh las ngamoq gas Pharao dah jyeidwis duot das, ge. 26Housoeh las oeng boms dvboms Pharao khywi zo bas jungh, ge Egutu mau mas vjangh joq dah lyi gas Yosep toh zis nghuot. Phudyei bang dah maunyeis kyingh Pharao maunyeis ma duot.

Yakop dah Dang Thang

27Israel dius jens gas Egutu mau Goshen mha nyeis las dis los, je eq gvgis jebais los nyeis. 28Yakop gas Egutu mas dvci nyhet zvn e nyeis las nyang dvnganh lyis dvxo nyeici nyhet zvn kang dwis khoq.

29Gvshih Yakop shei buisnyeis ni los las nyah lo Yosep lyis khi lha, Nvng ngos lyis nhaiqdoeus nghuot lyis gas, nah loq ngah tanghbauh jo mas kat aq; lomluk zis yah nhaiqnyen shohgyo cho chixoeuq las ngos lyis Egutu mas vnyhop.30Ngos shei loh lyis ngos lyis Egutu masyah yoeus doq loh las phauh thyeih moq lop mas dvnyhop aq, ge.

Yosep eq, Nvng uwus taiq toh zis yah dvyhangteh ngos kuot das, ge.

31Tsai, Yakop gas, Ngos lyis maukhi aq, ge. Housoeh las nyang eq maukhi. Housoeh Yakop gas nyah lhamloq thyoh mas nges las paiq.

Ngochang Common Language Bible

© Bible Society of Myanmar 2010

More Info | Version Index