Search form

LEWI 15

Gungs Lhoeuh

1Yhensain ka Moshe yahge Aron lyis o mha dah lyi dyei. 2Houka Israel jens xiklyis nghuot. Yukgis dvyuk yuk ri nos lyis, hauh gvng mas nyang ma lhoq. 3Ri nos jeis ma lyen thuq nyeis laus eq, doms laus eq nyang ma lhoq. 4Nyang yhet yhetyos yahge nyang tsung joqyos eq ma lhoq. 5-6Nyah yhetyos mas zangh soeu hank eq, nyang tsung khoq yvmas tsung soeu hank laus eq, nyah dyimis cheih, gungs cheih chah. Nyenhthang jweh shoq ma lhoq. 7Ri nos soeu lyis zangh tanh soeu hank laus eq dyimis cheih, gungs cheih chah. Nyenhthang jweh shoq ma lhoq. 8Lhoq shang nhang toh soeu lyis ri nos soeu svkanh dyeh zis zangh lyis, nyang nyah dyimis cheih, gungs cheih chah. Nyenhthang jweh shoq eq ma lhoq. 9Ri nos soeu tsung dah anhzoe, tank cha laus eq ma lhoq. 10Nyang tsung dah vyhang lhyi zangh soeu eq nyenhthang jweh shoq ma lhoq: hauh vyhang lhyi wuq soeu eq dyimis cheih, gungs cheih chah. Nyenhthang jweh shoq ma lhoq. 11Ri nos soeu loq shih ma cheih gohyuk lyis zangh tanh lyis hauh soeu ka dyimis cheih, gungs cheih chah. Nyang nyenhthang jweh shoq ma lhoq. 12Ri nos soeu zangh dah tsoh auh gas khwih tyamp chah. Saiq khuq nghuot lyis gas jeis yah cheih chah.

13Ri nos soeu gis thang lhyi, nyhet nyeih langh chah, hauh thang lhyi nyah dyimis cheih, yaus nyeis jeis mas gungs cheih zis yah lhoqshang das. 14Hauh soeu ka xet vnyeih lyis khotjyauh nghuot ya guzoe aiq doeu Yhensain xikkhonh Zvng khomh, phudyei soeu jyank mas e kyauh chah. 15Phudyei soeu ka yaunos jyungshuk xiklyis dvdoeu, ngheq dyei jyungshuk xiklyis dvdoeu phudyei das. Heisoeh khyvlyis nyang gas hauh soeu xiklyis cheihshang cho kuot dyei das.

16Yukgis dvyuk yuk shauq thuq lyis nyah dvgungs gonh cheih chah, nyang nyenhthang jweh shoq eq ma lhoq. 17Misseh yah, nghuot ya shohyeis yah kuot dah kyahsoe dvja ja mas shauq gyoh zangh lyis hauh zis cheih tyamp chah. Nyenhthang jweh shoq ma lhoq. 18Vbusbih yah vmesbih yhetgoh thang lhyi aiq yuk yah gungs cheih chah. Nyah aiq yuk nyenhthang jweh shoq eq ma lhoq.

Vmesbih Gungs Lhoeuh

19Vmesbih gas mesmus lyis nyhet nyeih top ma lhoq. Nyang lyis zangh tanh soeu ka nyenhthang jweh shoq ma lhoq. 20Mesmus shishenh gyo lyis nyang tsung, nghuot ya lhain dah vyhang cha eq ma lhoq. 21-23Nyah yhetyos lyis zangh tanh soeu, nyang tsung vyhang cha lhyi laus eq tanh soeu ka nyah dyimis cheih, gungs cheih chah. Nyang nyenhthang jweh shoq eq ma lhoq. 24Mesmus vmesbih yah yhetgoh dah vbusbih gas hau vmesbih dah ma gyingshang gvng mas nyang nyhet nyeih ma lhoq. Nyang lhain dah yhetyos cha eq ma lhoq.

25Vmesbih dvyuk mesmus yoq ma nghuot, suih shon, nghuot ya mesmus yoq lai shoq suih ma doms lyis, suih ma doms dvchank mesmus yoq lyis teh ma lhoq. 26Haih shishenh gyo lyis nyang yhet dah yhetyos, nyang tsung joqyos cha laus eq ma lhoq. 27Hauh vyhang lhyi zangh tanh soeu hank eq ma lhoq las, nyah dyimis cheih, gungs cheih chah. Nyenhthang jweh shoq eq ma lhoq. 28Suih shon zis doms thang lhyi nyang nyhet nyeih langh chah. Hauh thang lhyi nyang lhoqshang das. 29Xet vnyeih lyis nyang gas khotjyauh aiq doeu, nghuot ya guzoe aiq doeu chi e lha, Yhensain xikkhonh Zvng khomh, phudyei soeu lhyi kyauh chah. 30Phudyei soeu eq yaunos jyungshuk khyvlyis dvdoeu, ngheq dyei jyungshuk khyvlyis dvdoeu phudyei chah. Heisoeh khyvlyis phudyei soeu ka nyah xiklyis cheihshang cho kuot dyei das.

31Yhensain ka Israel dius jens nyamoq dah ma lhoq cho lhyi taiq kyingh das xiklyis Moshe lhyi taiq. Housoeh nyamoq gas dvp vgungs mas joq nyang nyeis dah Zvng vwot v-oeu ma bweh bas jungh ge zis nghuot. Nyamoq lhoq lhoeuh lyis nyamoq sat zis xauh das.

32Haih goeu gas ri nos yoh soeu, shauq thuq las ma lhoq dah vbusbih; 33mesmus vmesbih, nghuot ya vbusbih gas ma lhoq dah vmesbih yah yhetgoh cho dah lyi nghuot, ge.

Ngochang Common Language Bible

© Bible Society of Myanmar 2010

More Info | Version Index