Search form

LEWI 19

Gyingshang Cho, Lyi jus cho

1Yhensain Moshe lhyi taiq zis gas, 2Israel jens dah dius phung lhyi taiq aq: Ngos Yhensain, namoq dah Mangso gyingshang yvmvyah namoq eq gyingshang nyeis geh. 3Namoq yuk khanghmuh vsainnyang ungwes uwus lyis phauh nyang chah. Ngos tyingtoh zis yah dvyhangteh No Buisnyeis lyis chank tyink chah. Ngos Yhensain, namoq dah Mangso nghuot.

4Ngos lyis tyamp las ngwis xing phvra lyis vpaiq, namoq nyang xiklyis gungslho, mangso vkuot goh: Ngos Yhensain, namoq dah Mangso nghuot.

5Nyenstap jyungshuk gaunyhauq sat lyis ngos namoq lyis dyei toh dah lyi chank geh, housoeh lyis ngos hau jyungshuk lhom yoeus dyei das. 6Hau shoh lyis hauh gaunyhauq sat nyeih nghuot ya nungs nyeih zo chah: somh vnyeih jweh shoq nyet shih yvlyis gas ngheq tyamp chah: 7Khasoeh ge lyis houka ma lhoq ma shang, hauh zis zo soeu lhyi nyah jyungshuk ma lhom yoeus das. 8Zo soeu ka Yhensain yah sen dah gyingshang vyhang lhyi ma phauh ma danh kuot yvmvyah yobos bos. Nyang lyis ngah dius dvyuk oen ma nghamh dyei lo.

9Nah maunyeis mas jyo yhomh lyis, yosgyom mas zis vyhomh. Nyet joq dah guknham vloh doms yhomh lo. 10Nah zvbiq khyam mha vgyoh kui das zis vdoms loh lo. Houka nyungs bang lvbaus xiklyis nyhet toh aq. Ngos Yhensain, namoq dah Mangso nghuot.

11Vkhauh, vmopzo, vhwah.12Nvng chank kuot das ge ma nghamh lyis ngah nyings yoeus las ma jyoeng khyvlyis mau vkhi. Houka ngah nyings mas xoqphuh cho she los. Ngos Yhensain, nah Mangso nghuot.

13Hank lyis eq vmhuih khwangh, vthyoq zo. Nvng dvyuk yuk lyis uhkung lhung lha hau uhkung phauh lyis vnhiq toh, dvnyens yangh vtoh.14Nojet soeu lhyi vnhoengh, nyoqjet soeu xik mas thunghgus vtoh. Ngos lyis gyukwoms aq. Ngos Yhensain, nah Mangso nghuot.

15Nvng soetuon yvmas koptoq zis yah lyi jus khyvlyis thyet aq; nyungs soeu lhyi nyoqnho dyei cho, dis soeu lhyi gyuk cho vchixoeuq.16Nvng hank dah khyangh eq vpu, dvyuk yuk dah kang lhyi lhaink cho cha eq vkuot. Ngos Yhensain nghuot.

17Nvng nah nhaiqlom mas hank lyis eq vhoeng: dvyuk yuk yah ma doeusgoh cho bos lyis, nyang lyis debangh yaus aq. Housoeh lyis nvng nyah yobos mas ma bos zas das.18Nvng hank lyis eq lvto vphuk, nghuot ya nhaiq ma shei zis vbos. Nvng nah yhenkyoh lyis nvnyang gungs lyis teh yoh jyetdap das. Ngos Yhensain nghuot.

19Namoq ngah lyi domsyos gyo geh: ma doeusgoh dah gaunyhauq changh lyis nyau vkat. Nah yos dvkhyangh mas ma doeusgoh dah jyo nyau aiq ja vkhyoq. Vyhang aiq ja lhuk las yoq dah dyimis vwuot.

20Dius dvyuk dah nyinhungh jons nyelo yah gohtoeu vbusbih dvyuk yhetgoh lyis nyah aiq yuk yobos xauh chah. Nghuot laus eq hau jons nyelo gas ma khyuot shih, ma luiq shih yvmvyah nyah aiq yuk lyis ma gis sat. 21Hau vbusbih gas yobos khyuot jyungshuk khyvlyis yvnglus dvdoeu ngah xikkhonh Zvng khomh mas she los das. 22Phudyei soeu ka hau zis yah hau vbusbih dah yaunos yoeus tyamp das xiklyis cheihshang cho kuot das las Mangso ka nyang lyis yobos khyuot dyei das.

23Namoq Khanan mau mas jweh las chah ja shihzains tsungh laus eq cangxeih somh zvn shih dah vshih gas ma lhoq oen nghamh geh. Hauh gyo lyis namoq hauh zis ma gis zo. 24Nyei vzvn lyis dah shih dvnganh gas namoq ngos Yhensain lhyi nhaiqshoqlang cho chixoeuq jyungshuk khyvlyis kyauh chah. 25Oeng vzvn lyis gas namoq hauh shih gis zo. Namoq hai dvnganh kuot lyis namoq dah shih zains zes shih los das. Ngos Yhensain, namoq dah Mangso nghuot.

26Suih bos shih dah shoh cha eq vzo goh. Chah ja mandan eq vkuot goh.27Namoq uhloms yvmlhaink yah cam vgom goh, nhuotmi vthyet goh. 28Shei soeu xiklyis kuk khyvlyis namoq nyang gungs mas vyos vtwank, vlhyamh khangh. Ngos Yhensain nghuot.

29Nah lonyi jens lyis yhenmuh nghe nyhiq kuot zis yah diusjons vduot nhang. Housoeh kuot lyis namoq gohtoeu mangso jyank pheh lhain loh las mau gonh wotwu dyoq cho dyingh los das.30No nyeih lyis chank nyeis geh, Ngos lyis paiq dah joqyos lyis nyoqnho ngelang dyei geh. Ngos Yhensain nghuot.

31Sidyos lyis nyei gyo bang jyank mas joeui vsang goh. Housoeh kuot lyis nvng ma lhoq das. Ngos Yhensain, namoq dah Mangso nghuot.

32Mang goeus bang lyis phauh nyang cho chixoeuq aq. Nyamoq lyis nyoqnho ngelang dyei aq. Ngos lyis gyukwoms zis yah domsyos gyo aq. Ngos Yhensain nghuot.

33Namoq mau mas nyeis dah lvbaus lyis vyhenh.34Nyamoq lyis Israel changh jens teh kuot geh, nvnyang gungs lyis jyetdap teh jyetdap geh. Namoq Egutu mau mas boengh duot ku yvlyis soh geh: ngos Yhensain, namoq dah Mangso nghuot.

35Namoq keq cho, laiq cho, suon cho mha ma jus khyvlyis kuot las hank lyis eq vmhuih.36Jus dah jvng, jvngshih, jus dah pan yhung geh. Ngos gas namoq lyis Egutu masyah shwih thuq los, Yhensain, namoq dah Mangso nghuot. 37Ngah lyi yahge ngos tyingtoh cho dvnganh lyis domsyos gyo geh. Ngos Yhensain nghuot.

Ngochang Common Language Bible

© Bible Society of Myanmar 2010

More Info | Version Index