Search form

LEWI 20

Domsyos Ma gyo Yobos

1Yhensain Moshe lhyi taiq zis gas, 2Israel jens lyis taiq aq: Israel jens laus eq, nyamoq mas nyeis dah lvbaus laus eq, Molek mangso lhyi paiq yvmas yhung das zis nyah lo dyei soeu hank lyis laus eq dius phung gonh luk yah doeuh sat chah. 3Hank laus eq nyah lo Molek lyis dyei las ngah gyingshang Zvng lyis vwot v-oeu kuot, ngah gyingshang nyings lyis ngelhoq pyaih lyis, ngos nyang lyis tyi lha ngah dius nghuot oen ma nghamh dyei lo das. 4Nghuot laus eq dius phung ka nyang kuot yvlyis pvlhyahlyoeus kuot las nyang lyis ma sat lyis gas, 5ngos nyang hauh soeu yahge nyah yhenbang, nyang yah coq las ngos lyis lom ma luk Molek lyis paiq bang dvnganh lyis tyi das. Ngos nyamoq lyis ngah dius oen ma nghamh dyei lo das.

6Hank laus eq sidyos lyis nyeis gyo bang jyank mas joeui loh sang lhyi, ngos nyang lyis tyi lha, nyang lyis ngah dius oen ma nghamh dyei lo das. 7Ngos gas Yhensain, namoq dah Mangso nghuot yvmvyah namoq nyang gyingshang nhang geh. 8Namoq ngah lyi chank nyeis geh: khasoeh ge lyis ngos Yhensain nghuot. Ngos namoq lyis cheihshang kat.

9Yhensain ka o mha dah lyi tsain dyei. Hank laus eq nyah ungwes uwus lyis nhoengh soeu ka sat zis xauh chah: nyang shei zis gas nyang yobos bos.

10Dius dvyuk nyah Israel changh dah yhensain nyhiq yah nyi shuot lyis, hau aiq yuk lyis yah sat chah.11Dius dvyuk nyah uwus dah yhensain nyhiq dvyuk yuk yah yhetgoh soeu ka, nyah uwus lyis xoq lhoq phuh las nyah aiq yuk gonh lyis sat chah: aiq yuk yah yobos bos.12Dius dvyuk nyah doeusmuh yah yhetgoh lyis aiq yuk lyis yah sat chah. Nyamoq shuot goh goeus las yobos bos.13Vbusbih dvyuk gohtoeu vbusbih yah yhetgoh lyis hau aiq yuk vchoqh vlhauq muh kuot goeus las aiq yuk lyis yah sat chah. Nyah aiq yuk yobos bos.14Vbusbih dvyuk gas vmesbih dvyuk yahge nyah ungwes lyis nyihwank lyis, nyamoq somh yuk gonh lyis nyi ngheq sat chah: khasoeh ge lyis nyamoq xoqphuh cho kuot goeus. Housoeh teh zis namoq mas ma gis bos nhang.15Dius dvyuk gaunyhauq yah yhetgoh lyis, dius lyis eq gaunyhauq lyis eq sat chah.16Vmesbih gas gaunyhauq yah loh yhetgoh lyis, hau vmesbih yahge gaunyhauq lyis sat chah. Vmesbih eq gaunyhauq eq yobos bos.

17Vbusbih dvyuk nyah nhamhmuh nghuot ya nhamhmuh doeus soeu lhyi nyihwank lyis, nyamoq lyis moeng mas xoqphuh nhang chah. Dius phung mhayah khat thuq chah. Nyang gas nyah nhamhmuh yah yhetgoh yvmvyah yobos kham chah.18Vbusbih dvyuk mesmus nyeis vmesbih yah yhetgoh lyis, nyah aiq yuk lyis dius phung mhayah khat thuq chah. Khasoeh ge lyis nyamoq ma lhoq cho dah lyi thyoq goeus.

19Vbusbih dvyuk nyah vyi, nyah ungwes dah vbi vnoeuh yah yhetgoh lyis, aiq yuk yah suih nyo ni zis yhetgoh cho yobos kham chah.20Vbusbih dvyuk nyah phvthank phvlvt dah yhensain nyhiq yah yhetgoh lyis, phvthank phvlvt lyis xoq lhoq phuh goeus. Nyang eq hau vmesbih eq yobos xauh kham das las hank eq lo ma bos das. 21Vbusbih dvyuk nyah vmang vnoeuh yhensain nyhiq lyis yoeus lyis nyamoq lo ma bos shei das. Nyang gas ma lhoq ma shang zis kuot las nyah vmang vnoeuh lyis xoq lhoq phuh goeus.

22Yhensain taiq: Ngah lyi yahge tyingtoh dang dvnganh lyis chank kuot geh. Housoeh lyis ngos namoq lyis shwih wvng loh dah Khanan mau gas namoq lyis ma peq tyamp das. 23Houmha nyeis bang dah lyi thungh vyoeus goh. Namoq hauh mau mas yoh wvng das xiklyis ngos hau Mangso lhyi ma seq bang lyis khat thuq tyamp. Nyamoq dah ma gis zis kuot cho gvng mas ngos lyis nhaiqnos nhang. 24Nghuot laus eq ngos namoq lyis hai nyeis coeu bos las gis dah mau namoq dah vso khyvlyis dangthoengh toh goeus las ngos namoq lyis hauh zis dyei das. Ngos Yhensain, namoq dah Mangso nghuot las namoq lyis gohnyau masyah kangh toh. 25Housoeh las gaunyhauq yahge nghoq lyis kha ka ma lhoq ma shang, kha ka lhoqshang yvlyis kyoq kyoq gvn chah. Ngos ma lhoq oen taiq toh zis gas vzo, hauh yvlyis zo lyis namoq lyis ma lhoq ma shang bweh nhang. 26Namoq gas ngos yah kyingh sen lha gyingshang chah. Khasoeh ge lyis ngos Yhensain nghuot las gyingshang. Ngos namoq lyis gohtoeu dius nyau masyah kangh toh. Housoeh las namoq ngos yah kyingh dvsen.

27Vbusbih vmesbih hank laus eq sidyos lyis nyei gyo soeu lhyi lukzains yah doeuh sat chah. Hank laus eq heisoeh kuot soeu ka yobos bos.

Ngochang Common Language Bible

© Bible Society of Myanmar 2010

More Info | Version Index