Search form

LEWI 6

1Yhensain Moshe lhyi o mha dah lyi dyei. 2Dvyuk yuk Yhensain lhyi tyi dah yaunos kuot cu lhyi nyang jyungshuk phudyei chah, houka Israel changh los tank toh kyahsoe tauh dyei das zis he, nyah jyank masyah dvja ja khauh toh, mhuih yoeus toh, 3dyuk dah kyahsoe lhyi ma nyvng ge hwah las maukhi cho nghuot. 4-5Dius dvyuk gas hai dvcho cho yah yaunos kuot lyis lom ma luk gvng mas nyang yoh zis cap chah. Nyah yobos nyvng dah nyeih lyis hau kyahsoe sain lhyi dyingh shoq cap chah. Hauh thoq lyis hau kyahsoe dah oeng boms dvboms lung dyei chah. 6Hauh soeu ka Yhensain lhyi yaunos khyuot jyungshuk nyhenshang nos ma bos yvnglus dvdoeu phudyei soeu jyank mas chi los chah. Houka gyingshang joqyos mas thyet dah phauh khyvlyis nghuot chah. 7Phudyei soeu eq nyah yaunos xiklyis Yhensain lhyi phudyei las, nyang yaunos khyuot dyei zis xauh das, ge.

Ngheq dyei Jyungshuk

8Yhensain Moshe lhyi taiq toh. 9Aron yahge nyah lo jens lyis o mha dah ngheq dyei jyungshuk dah lyi dyei aq. Ngheq dyei jyungshuk lyis phon mha dvnyens gonh ngheq toh chah; nyi malyen lo dap nyeis chah. 10Phudyei soeu ka, nyah jeiyhwiq shanhzoe yahge jeiyhwiq lhuhkhyaq wuot las, phon mha ngeh gyop dah phudyei nyiyvp gaiq las phon yvm mas toh chah. 11Nyang dyimis doms thaiq lho lha hau nyiyvp lyis dvp nghe pheh lyi thungh yah cheihshang toh joqyos mas yoeus e chah. 12Phon mha nyi gas dap nyeis chah, khanhamp eq ma gis shei nhang. Phudyei soeu ka nvp yau yah houmha thangh kat las hauh thoq mas ngheq dyei jyungshuk gvn kih chah. Hauh phon thoq mas nyenstap jyungshuk coeu lhyi ngheq chah. 13Phon mha nyi vjangh dap nyeis chah. Khanhamp eq nyi ma gis shei nhang.

Jyo Jyungshuk

14O mha zis gas jyo jyungshuk lyi nghuot. Aron loloeu jens phudyei soeu ka, hauh yvlyis Yhensain lhyi phon xik mas e dyei chah. 15Phudyei soeu ka hau Jyo jyungshuk mas dah monh dvtsop, coeu yahge hau loban dvnganh yoeus las Yhensain lhyi dvnganh dyei goeus jyungshuk khyvlyis phon mha ngheq dyei das. Haih jyungshuk xangh shom ka Yhensain lhyi nhaiqdoeus nhang. 16-17Nyet goeu gas phudyei bang zo das. Hauh yvlyis bicheih ma kat ohlhyoq kuot piq las Zvng khyam khau gyingshang joqyos Yhensain xikkhonh mas zo das. Yhensain ka hauh zis phudyei bang lyis zonoms jyungshuk gvmboms khyvlyis dyei toh. Hauh zis gas yaunos jyungshuk yahge yobos khyuot jyungshuk teh svsoh gyingshang. 18Jweh los das shishenh lyis Aron dah vnyau vshih loloeu jens hank eq Yhensain lhyi dyei dah zonoms jyungshuk mas gvmboms khyvlyis yoh zo. Hauh zis zwi bang dvnganh gyingshang bang nghuot chah, ge.

19Yhensain Moshe lhyi o mha dah lyi dyei. 20Aron loloeu jens phudyei muh huon coeu juot kham nyeih lyis nyang Yhensain jyank mas (nyeih khanghmuh dah jyo jyungshuk nyhoq) phudyei jyungshuk khyvlyis monh aiq pan, nvp lyis dvgohyih, nyenhthang pheh dvgohyih nghuot. 21Hau monh lyis coeu lhoeuq, auhbanh thyeqpa mas kyap thang lhyi khyop las Yhensain nhaiqdoeus dah xangh shom khyvlyis jyo jyungshuk phudyei chah. 22Jweh los das shishenh lyis phudyei zainsmuh khyvlyis phuqsoe nyeis dah Aron dah vnyau vshih khanghmuh gas hai phudyei cho kuot chah. Houka Yhensain xiklyis phudyei khyvlyis dvnganh ngheq dyei chah. 23Phudyei soeu xiklyis phudyei dah jyo jyungshuk lyis cha eq ma gis zo, dvnganh ngheq dyei chah, ge.

Yaunos Jyungshuk

24Yhensain Moshe lhyi taiq toh. 25Hai o mha dah yaunos jyungshuk cho dah lyi Aron yahge nyah loloeu jens lyis dyei aq. Yaunos jyungshuk gaunyhauq lyis, phon dah mautsung pheh hau ngheq dyei jyungshuk tsain sat joqyos mas sat chah. Heika svsoh gyingshang jyungshuk nghuot. 26Yaunos jyungshuk phudyei dah phudyei soeu ka hau phudyei shoh lyis Yhensain xikkhonh, Zvng khyam khau gyingshang joqyos mas zo chah. 27Hauh gaunyhauq shoh lyis tanh soeu, nghuot ya tanh zis cha eq gyingshang. Hauh suih tsant zangh dah dyimis lyis eq gyingshang joqyos mas cheih chah. 28Hauh shoh jyauq dah tsoh auh lyis gas khwih tyamp chah. Thunk auh yhung lhyi ka caq las jeis yah cheih chah. 29Phudyei yhenbang yukgis lo jens dvnganh hauh shoh gis zo. Hauh zis gas svsoh gyingshang. 30Nghuot laus eq yaunos yoeus tyamp das xiklyis Zvng mas suih chi wvng los dah gaunyhauq shoh cha eq ma gis zo, ngheq tyamp chah.

Ngochang Common Language Bible

© Bible Society of Myanmar 2010

More Info | Version Index