Search form

LEWI 8

Aron, Lo tang lhyi Gyamh huon

(Dyu 29:1-37)

1Yhensain Moshe lhyi taiq. 2Aron yahge nyah loloeu jens lyis Zvng khomh, ngah xikkhonh mas shwih los aq. Houmha phudyei dyimis, juot coeu, yaunos jyungshuk noeulu dvdoeu, yvnglus aiq doeu yahge bicheih ma kat ohlhyoq dvkyank yoeus los aq. 3Hauh thang lhyi moq dvphung gonh houmha khi huom aq, ge.

4Moshe eq Yhensain taiq vgus kuot las, moqphung los huom lhyi, 5nyang taiq zis gas, Gvshih ngos kuot das zis gas Yhensain tying toh zis nghuot, ge.

6Moshe ka Aron yahge nyah loloeu jens lyis xik mas shwih thuq los las gungs cheih dyei. 7Nyang Aron lyis khau dyi eq shanhzoe eq huot las thyikdom mas dyichih chih dyei. Nyang ephod eq huot lho lha yungh yungh yoq toh dah dyichih nyah thyikdom mas chih dyei. 8Sainhkhonh gos eq gos dyei las, hau sainhkhonh gos vkhau mha Urim yahge Thumim kat toh dyei. 9Nyah uhloms mas uhthop thop dyei lho lha, Yhensain Moshe lhyi taiq toh vgus ngelang mas kyauh dah gyingshang vlho xinglhyoq tap dyei.

10Hauh thang lhyi Moshe ka juot das coeu yoeus las Yhensain nyeis dah Zvng yahge hauh vkhau mha dah vyhang dvnganh yvlyis juot. Heisoeh khyvlyis nyang Yhensain lhyi dvnganh kyauh. 11Nyang hau coeu dvkhamh yoeus las phon thoq mas nyhet lhain tyitsant. Phon yah sen vyhang dvnganh lyis eq, jeislang yahge nyah khyei lhyi eq juot las Yhensain xiklyis cheihshang. 12Hau juot dah coeu dvkhamh Aron uhloms mas huot kat dyei zis yah nyang lyis gyingshang nhang. 13Yhensain taiq toh zis yah dvyhangteh Moshe ka Aron dah loloeu jens lyis xik mas shwih thuq los las, dyimis huot, dyichih chih, uhthop thop dyei.

14Hauh thang lhyi Moshe ka yaunos jyungshuk xiklyis noeulu kyoh dvdoeu she los las Aron yahge nyah loloeu jens gas nyamoq loq hau noeulu uhloms mas tsain kih. 15Moshe ka hau noeulu sat, hau suih dvkhamh yoeus las phon thoq vthunk khyau mha nyah loqnyhauh yah tsain juot zis yah phon lhyi cheihshang. Nyet dah suih lyis phon khyei mha huot khyoq. Heisoeh khyvlyis nyang hauh yvlyis cheihshang lha gyingshang nhang toh. 16Moshe ka hau ungkyo dvnganh, gis thank sainh doeus, jinghloms aiq koeuq yahge houmha dap dah coeu lhyi tsain yoeus las phon thoq mas ngheq. 17Yhensain taiq toh vgus Moshe ka hau nyet dah yeis, shoh, khyeih bos dah noeulu lyis Yoeus las dvp nghe mha ngheq tyamp.

18Hauh thang lhyi, Moshe ka ngheq dyei jyungshuk yvnglus she yoeus las Aron yahge nyah loloeu jens gas hau yvnglus uhloms thoq mas nyamoq loq tsain kih. 19Moshe ka hau yvng lyis sat las, suih lyis phon nyei shot mas doeuh gyon. 20-21Nyang hau yvnglus lyis thyoq zis yah ung mha zis yahge khyei lhyi jeis yah tsain cheih las, uhloms, coeu, nyet dah yvnglus dvgungs gonh lyis phon mha ngheq dyei. Houka Yhensain taiq toh khyvlyis nghuot. Hai ngheq dyei jyungshuk gas zonoms jyungshuk nghuot las hauh xangh shom ka Yhensain lhyi nhaiqdoeus nhang.

22Hauh thang lhyi Moshe ka phudyei gyamh huon cheihshang das xiklyis hau yvnglus aiq vdoeu she los. Aron yahge nyah loloeu jens hauh uhloms thoq mas loq tsain kih. 23Moshe ka hauh yvng lyis sat, hau suih dvkhamh yoeus las Aron dah loqyos nodyen mas eq, loqyos loqmuhchamh mas eq, loqyos khyeimuhchamh mas eq juot dyei. 24Hauh thang lhyi nyang Aron loloeu jens lyis xik mas shwih thuq los las hau suih dvkhamh nyamoq dah loqyos nodyen mas eq, loqyos loqmuhchamh mas eq, loqyos khyeimuhchamh mas eq tsain juot dyei. Hauh thang lhyi Moshe ka hau nyet dah suih lyis phon dah nyei shot mas doeuh gyon. 25Nyang gas coeu, lhyank coeu, ung nghop coeu dvnganh, gis thank sainh doeus, jinghloms aiq koeuq yahge houmha dap coeu, loqyos bungssan tsain yoeus. 26Hauh thang lhyi nyang Yhensain lhyi kyauh toh, bicheih ma kat ohlhyoq kyank masyah ohlhyoq dvlhyoq, coeu yah nis dah monh dvlhyoq, ohlhyoq bu dvkoeuq tsain yoeus las, coeu yahge loqyos bungssan thoq mas kih. 27Nyang hai zonoms dvnganh Aron yahge nyah loloeu jens dah loq mas tsain kat dyei las nyamoq gas Yhensain lhyi lhyenwhei jyungshuk khyvlyis tsain dyei. 28Hauh thang lhyi Moshe ka hauh zonoms nyamoq loq masyah yoeus las phon mha ngheq dyei jyungshuk thoq mas kih las ngheq phudyei. Houka gyamh huon dah jyungshuk khyvlyis nghuot. Haih zis gas zonoms jyungshuk nghuot las hau xangh shom ka Yhensain lhyi nhaiqdoeus nhang. 29Hauh thang lhyi Moshe ka sainhkhonh yoeus las Yhensain lhyi lhyenwhei jyungshuk khyvlyis dyei. Gyamh huon dah yvnglus sainhkhonh gas Moshe gvmboms nghuot. Moshe ka Yhensain taiq toh vgus dvnganh kuot.

30Moshe ka juot coeu dvkhamh yahge phon mha suih dvkhamh yoeus las Aron yahge nyah lo jens lyis eq, nyamoq dah dyimis mas eq tyitsant. Heisoeh khyvlyis nyang nyamoq lyis Yhensain xiklyis cheihshang.

31Moshe ka Aron yahge nyah loloeu jens lyis taiq: Shoh yoeus las Zvng khomh, Yhensain xikkhonh mas jyauq las, gyamh huon jyungshuk ohlhyoq kyank mas ohlhyoq yah dvgeh houmha zo geh. Houka Yhensain taiq toh vgus nghuot. 32Nyet shih dah shoh yahge ohlhyoq lyis gas ngheq tyamp chah. 33Namoq dah gyamh huon pwe buisnyeis nyhet nyeih ma dyingh dvchank namoq Zvng khomh masyah ma gis thuq loh. 34Namoq dah yaunos yoeus tyamp dyei das nyhenshang yang khvnyhik kuot teh kuot das zis Yhensain yang lyis tying toh. 35Yhensain taiq toh dang chank kuot las nyeih nyenh nyhet nyeih top Zvng khomh mas nyeis chah. Namoq ma kuot lyis shei das. Heika Yhensain ngos lyis tying toh zis nghuot. 36Housoeh las Aron yahge nyah loloeu jens gas Yhensain Moshe lhyi yah tying toh zis dvnganh kuot.

Ngochang Common Language Bible

© Bible Society of Myanmar 2010

More Info | Version Index