Search form

LEWI 9

Aron Phudyei

1Gyamh huon pwe dyingh dah nungs nyeih Moshe ka Aron yahge nyah loloeu jens, Israel uhshe bang lyis khi. 2Nyang Aron lyis taiq: Nvng yaunos jyungshuk xiklyis nos ma bos noeulu kyoh dvdoeu, ngheq dyei jyungshuk xiklyis nos ma bos yvnglus dvdoeu yoeus las Yhensain lhyi phudyei aq. 3Hauh thang lhyi Israel jens lyis taiq aq. Namoq yoeus los das zis gas, yaunos jyungshuk xiklyis beqlus dvdoeu, ngheq dyei jyungshuk xiklyis nos ma bos, dvzvn dyingh noeulo dvdoeu, yvnglo dvdoeu; 4nyenstap jyungshuk xiklyis noeulu dvdoeu yahge yvnglus dvdoeu nghuot. Nyamoq coeu yah lhoeuq dah jyo jyungshuk yah dvgeh Yhensain lhyi phudyei chah. Khvnyhik Yhensain nyamoq jyank mas thuq xoeuq das yvmvyah nyamoq haih zis kuot chah, ge.

5Nyamoq gas Moshe tying toh dah vyhang dvnganh hau moqzvng xik mas tsain chi los. Dius jens dvnganh eq Yhensain lhyi paiq das xiklyis houmha los huom toh. 6Moshe taiq zis gas, Hai dvnganh kuot das zis Yhensain namoq lyis taiq toh. Housoeh las namoq Yhensain dah phunk lyis nyvng das, ge. 7Moshe Aron lyis taiq zis gas, Nah yaunos yahge dius jens dah yaunos yoeus tyamp dyei das xiklyis phon mha loh las yaunos jyungshuk yahge ngheq dyei jyungshuk phudyei aq. Yhensain taiq toh zis yah dvyhangteh haih jyungshuk dyei zis gas dius jens dah yaunos yoeus tyamp dyei das xiklyis nghuot.

8Aron gas phon mha loh las nyah yaunos jyungshuk xiklyis noeulu kyoh sat. 9Nyah loloeu jens gas hauh suih nyah jyank mas yoeus loh dyei. Aron gas hauh suih mas nyah loqnyhauh jen las phon thunk khyau mas dvkhamh tsain juot. Nyet dah suih lyis gas phon khyei mha huot khyoq. 10Hauh thang lhyi nyang yaunos jyungshuk dah coeu, jinghloms, sainh mas gis thank vdoeus lyis phon mha ngheq phudyei. Houka Yhensain Moshe lhyi taiq toh vgus nghuot. 11Nghuot laus eq shoh yahge yeis lyis gas dvp nghe mha ngheq tyamp.

12Aron nyah dah ngheq dyei jyungshuk gaunyhauq eq sat las nyah loloeu jens hauh suih lyis nyah jyank mas yoeus loh dyei. Nyang gas hauh yvlyis phon dah nyei shot mas doeuh gyon. 13Nyamoq gas nyang lyis hau gaunyhauq uhloms yahge gohtoeu vdoeus eq dyei las nyang hauh yvlyis phon mha ngheq phudyei. 14Hauh thang lhyi nyang oeu yahge bungs khyei lhyi eq tsain cheih lho lha, phon mha ngheq dyei jyungshuk thoq mas bos ngheq.

15Hauh thang lhyi nyang hau dius jens dah jyungshuk dyei. Nyang dius jens dah yaunos xiklyis dyei dah shvbeq she yoeus sat lho lha, nyah yaunos xiklyis shangphu teh shangphu dyei. 16Nyang hau ngheq dyei jyungshuk gaunyhauq eq she los las lyi yah dvyhangteh phudyei. 17Nyang jyo jyungshuk eq chi los zis yah houmha dah monh dvtsop yoeus las phon mha ngheq phudyei. (Heika nyeih khanghmuh dah ngheq dyei jyungshuk mas lung zis nghuot.) 18Nyang dius jens xiklyis nyenstap jyungshuk khyvlyis noeulu yahge yvnglus sat. Nyah lo jens gas hauh suih nyang lyis loh yoeus dyei las nyang hauh phon dah nyei shot mas doeuh gyon.19Nyamoq gas noeulu coeu yahge yvnglus coeu goeu lyis, 20gaunyhauq sainhkhonh shoh thoq mas tsain kih zis yah hau dvnganh phon mha dvng los. Aron gas hau coeu lhyi phon mha ngheq dyei. 21Sainhkhonh yahge loqyos bungssan lhyi Yhensain xiklyis lhyenwhei nyhenshang nghuot. Houka Moshe tying toh vgus nghuot.

22Aron gas phudyei cho dvnganh dye lyis dius jens thoq mas nyah loq tsain toeu lha, nyamoq lyis shvmanh dyei thang lhyi nyang gyoh los.23Moshe yahge Aron gas Yhensain dah xikkhonh Zvng khau mha wvng loh. Nyamoq thuq los las dius jens lyis shvmanh dyei lyis Yhensain dah phunk dius jens dvnganh mas bvng xoeuq. 24Yhensain ka nyetlos nyettant nyi kat kat las phon mha dah ngheq dyei jyungshuk yahge coeu ngeh jom tyamp. Dius jens hauh zis nyvng lyis nyamoq dvnganhmoq kaiq las dupaiq.

Ngochang Common Language Bible

© Bible Society of Myanmar 2010

More Info | Version Index