Search form

GYUNG 11

Tabera Nyhink Joqyos

1Dius jens gas nyamoq dah yau cho gvng mas Yhensain lhyi tsain lop zoh loh. Yhensain hauh zis xauhgyo lyis, nhaiqyo las dius jens mas nyi khyoq kat. Hauh zis nyamoq mas ngeh las nyamoq dah thoenggus dvthang monh loh. 2Dius jens gas nyamoq lyis pangh das zis Moshe lhyi kaiq. Nyang eq Yhensain lhyi dung las nyi shei loh. 3Houmha Yhensain dah nyi nyamoq mas ngeh los yvmvyah, hauh joqyos lyis, Ngeh ge dah vjyuk yah, Tabera ge nyhink.

Moshe Uhshe Bang 70 Khyen

4Houmha gohmau bang Israel jens yah dvgeh gyung suh. Nyamoq gas shoh laus; Israel jens nyang yangh, Ngamoq shoh zo mes, ge tsain lop los. 5Ngamoq Egutu mas oengdoq o nyhoq gyangh xauh zo, hauh zis ngamoq xiklyis chah phauh ma dap. Ngamoq yoh khoq dah tunghuh, lvxau, mau gyoh hoeuh, cungh hoeuh, hoeuhson lhyi soh. 6Nghuot laus eq gvshih ngamoq yom ma bos lo. Zo das zis cha ma joq lo. Dvnyeih thang lhyi dvnyeih hai mana kyingh dvnghuot lo, ge.

7Mana gas vxwi sop vwot bos dah vjeih ngis teh zis nghuot.8-9Houka nyenh lyis thoenggus mas jyweh yah dvgeh gyoh joq. Dius jens gas nungsnvp hauh zis e shenh las mhoq nghuot ya phih nhoeuq, jyauq lho lha ohlhyoq lywas tsain kuot. Hauh whitau ka tsanlun coeu yah piq dah ohlhyoq teh nghuot.

10Dius jens nyamoq zvng khomhdwang mas vhuom huom tsain lop nyeis yvlyis Moshe xauhgyo. Yhensain ka nyamoq lyis nhaiqyo yvmvyah Moshe ka ehnyet ma tap. 11Housoeh nyang Yhensain lhyi, Nvng ngos lyis chamus hei iq kuot. Ngos lyis chamus nhaiq ma doeus. Nvng ngos lyis chamus haih dius jens dvnganh dah yvwons dyei, ge. 12Nvng nyamoq dah phauh thyeih moq lyis dangthoengh toh dah mau pheh loh dah dvcho gonh mas nvng ngos lyis chamus lo yoeus soeu teh kuot nhang? Lonoeuh lyis teh ngah loq mas chamus po nhang? Ngos nyamoq lyis ma gvnkhanh, nyamoq lyis yaus kat soeu eq ma nghuot. 13Nyamoq gas ngaus las shoh sang. Ngos haih bang dvnganh xiklyis tham das shoh kha mhayah yoh das lah? 14Haih bang dvnganh lyis ngos kyingh yvwons ma thoq yoeus. Ngah xiklyis sunk lyei. 15Ngos lyis heisoeh dvkuot das lyis, ngos nah lhoeng cho lhyi ma xauh kham lo bas jungh ngos lyis nhaiqnyen zis yah sat aq, ge.

16Yhensain Moshe lhyi taiq, Nvng seq las dius jens mas uhshe bang, Israel logis jens nyhetci yuk khi tsainh las ngah xikkhonh Zvng xik mas nvng yah dvgeh yap nhang aq. 17Ngos lyih las houmha nvng yah jisgoh das: ngos nvng lyis dyei toh dah Dyos dvkhamh yoeus las nyamoq lyis dyei das; nyamoq gas nvng lyis pangh zis yah dius jens xiklyis yvwons bos yoeus das. Housoeh nvnyang kyingh ma wons noh. 18Dius jens lyis taiq aq, Nvpyo xiklyis namoq nyang cheihshang toh geh; namoq shoh xauh zo das. Namoq shoh zo mes las, Ngamoq Egutu mas nyeis lyis shoh gis gis xauh zo, ge taiq las ngaus thwe Yhensain xauhgyo goeus. Gvshih Yhensain namoq lyis shoh dyei das las shoh xauh zo das. 19Dvnyeih, aiq nyeih, oeng nyeih, dvci nyeih, aiqci nyeih lo kyingh ma nghuot. 20Namoq nho mha nvm los, nghoengh shoq lhamhmuh dvkhyvp gonh xauh zo das: khasoeh ge lyis namoq mas nyeis dah Yhensain lhyi peq tyamp las, Namoq Egutu masyah chamus thuq los au, ge nyang lyis tsain lop, ge.

21Moshe Yhensain lhyi taiq zis gas, Ngos heimha yukgis khyuk sens lyis shwih los. Nvng gas, nyamoq lyis lhamhmuh dvkhyvp gonh shoh tsoh das ge taiq lhyeh?. 22Nyamoq lyis jo shoq tsoh das zis gas, noeu, yvng dvnganh sat lyis eq ma tham das. Thomh mas oeng dvnganh gaiq los lyis eq ma tham das, ge.

23Yhensain phuk taiq zis gas, Ngos yomsoq ma bos oen nghamh lhyeh? Ngos taiq zis bweh das ma bweh das yvlyis vkhoeuq nvng nyvng das, ge.

24Housoeh las Moshe thuq loh las Yhensain taiq zis dius jens lyis taiq kyoh. Nyang uhshe bang nyhetci lyis khi huom lha zvng yvmlhaink yah toh. 25Hauh thang lhyi Yhensain jyommauh yah gyoh los las nyang yah jisgoh. Nyang Moshe lhyi dyei toh dah dyos masyah dvkhamh yoeus las uhshe bang nyhetci lhyi dyei. Nyamoq thoq mas hau dyos jweh lyis nyamoq lvpe teh kaiq los, nghuot laus eq nyamoq ma nyangh.

26Hau uhshe bang nyhetci mha aiq yuk nghuot dah Eldad yahge Medad gas zvng mas ma e, dvp mas nyeis. Nyah zomh mas eq dyos jweh los las, nyah zomh dvp khau mha lvpe jens teh kaiq los. 27Eldad yahge Medad cha kuot cho lhyi loyvm dvyuk Moshe jyank los wuih taiq.

28Hauh thang lhyi loyvm lyis yah Moshe lhyi pangh soeu, Nun lo Yoshua Moshe lhyi taiq zis gas, Svra eh, nyamoq lyis tomp aq, ge.

29Moshe toeuh zis gas, Ngah nyhenshang nvng noh lhyeh? Yhensain dah dius dvnganh lyis nyah dyos dyei las dvnganh gas lvpe jens teh kaiq nhang mes. 30Hauh thang lhyi Moshe yahge Israel uhshe bang nyhetci dvp pheh tauh loh.

Yhensain Mvne Nhang

31Yhensain ka thomh masyah lyeis nyetlos nyettant nhang. Houka mvne nghoq muot tangh los las dvp vyvm vwi dvnyeih suh joqyos jweh shoq, nyeisjvng masyah somh pe thoeu shoq no joq. 32Housoeh las dius jens gas dvnyeih gonh dvnyens gonh, nungs nyeih dvnyeih gonh mvne nghoq jyop las ma yoh thank soeu oengci joi xauh kui. Nyamoq gas dvp vyvm vwi dvkhauyah nghoq shoh tsain lhap. 33Nyamoq zo das xiklyis shoh nyoshoq nghuot shih lyis Yhensain hauh dius jens lyis nhaiq gis yo las yomh zains khyoq. 34Housoeh shoh nyoqnoq bang lyis houmha nyhop yvmvyah hauh joqyos lyis Kibrot Hatawa, nghuot ya shoh nyoqnoq bang lop, ge nyhink.

35Hou mhayah dius jens gas nyamoq thoenggus kuot dah Hazerot pheh cheh loh.

Ngochang Common Language Bible

© Bible Society of Myanmar 2010

More Info | Version Index